رەسمي مالىمەت بويىنشا, ەلىمىزدەگى ەڭ الىپ مەگاپوليستە جۇمىسسىز جاستاردىڭ سانى 16 مىڭنان اسىپ جىعىلادى. بۇل شارا جاستارعا ءبىلىم بەرۋ وشاقتارىندا قاي سالا ماماندارىنا سۇرانىس كوپ نەمەسە تاپشى ەكەنىن جانە ەڭبەك ءوتىلىنسىز دە جۇمىسقا ورنالاسۋعا بولاتىنىن انىقتاۋعا سەپتەستى. جوعارى وقۋ ورىندارىنىڭ تۇلەكتەرى مەن جۇمىسسىز جاستارعا ارنالعان بوس ورىندار جارمەڭكەسىن الماتى قالاسى «اتامەكەن» ۇلتتىق كاسىپكەرلەر پالاتاسىنا قاراستى «Jas Qadam» قوعامدىق قورى ۇيىمداستىرىپ وتىر. جارمەڭكەگە بيىل 300-دەن استام جۇمىس بەرۋشى كومپانيا قاتىستى. ولاردىڭ ساپىندا «Magnum Cash Carry» ساۋدا جەلىسى, CRATA حالىقارالىق زاڭ فيرماسى, DHL, HCK, Creetgo IT-كومپانياسى ءتارىزدى كوپتەگەن ىرگەلى ۇجىمدار بار. شارا اياسىندا 200-گە تارتا ءبىتىرۋشى ءتۇلەك اتالعان كومپانيالاردا تاعىلىمدامادان وتۋگە مۇمكىندىك الدى. وعان قوسا جاستاردىڭ بيزنەسكە دەگەن ىنتاسىن ارتتىرۋعا باعىتتالعان سەمينار ساباقتار وتكىزىلىپ, كاسىپكەرلىكتى دامىتۋ, تۇرعىن ءۇي ماسەلەلەرىن شەشۋ, پسيحولوگيالىق جانە زاڭگەرلىك كومەك كورسەتۋ شارالارى ۇيىمداستىرىلدى.
«تۇڭعىش پرەزيدەنتىمىز نۇرسۇلتان نازارباەۆ 2019 جىلدى جاستار جىلى دەپ جاريالاپ, وسكەلەڭ ۇرپاقتى جان-جاقتى قولداۋعا باعىتتالعان ءىس-شارالار ءتىزبەگىن سارالاپ بەردى. وسى ماقساتتا جاستارعا ارنالعان ءتۇرلى جوبالار لەگى ىسكە اسۋدا. كاسىپورىندار ءۇشىن – بۇل ەڭبەككە قابىلەتتى حالىقتىڭ ەڭ ۇزدىك وكىلدەرى اراسىنان بولاشاعى بار مامانداردى تاڭداپ الۋدىڭ بىرەگەي مۇمكىندىگى. ستۋدەنتتەر ءۇشىن ءوزىن الەۋەتتى جۇمىس بەرۋشىلەرگە ۇسىنۋدىڭ وڭتايلى جولى. ءبىزدىڭ ميسسيامىز – قازاقستانداعى جۇمىسسىزدىق دەڭگەيىن تومەندەتۋ», دەيدى «SelfMade» جوباسىنىڭ ۇيلەcتىرۋشىسى ايگۇل نيسۋپوۆا.
بوس جۇمىس ورىندار ءجارمەڭكەسىن وتكىزۋ جاس ماماندارعا عانا ەمەس, جۇمىس بەرۋشىلەر ءۇشىن دە ماڭىزدى. «جاستار وزدەرىن قىزىقتىراتىن بوس ورىندار تۋرالى مالىمەت السا, ءبىز ءۇشىن ءتۇلەكتەردىڭ ىسكەرلىك قاسيەتىن باعالاۋعا مۇمكىندىك تۋادى» دەيدى جۇمىس بەرۋشى ۇيىمداردىڭ وكىلدەرى.
الماتى