وبلىس اكىمدىگى وتىرىسىندا ءوڭىردىڭ سانيتارلىق-ەپيدەميولوگيالىق جانە مەديتسينالىق قىزمەت كورسەتۋ جايى تالقىلانىپ, قوعامدىق دەنساۋلىق ساقتاۋ دەپارتامەنتىنىڭ باسشىسى سەرىكباي قاسماقاسوۆ ءبىرقاتار كەلەڭسىزدىكتەردىڭ بەتىن اشتى.
ول كەلتىرگەن دەرەكتەرگە قاراعاندا, بىلتىر دارىگەرگە قارالعان ءار مىڭ بالانىڭ 36,6 پايىزى كوز اۋرۋىنا شالدىقسا, 13,8 پايىزىندا جۇيكە-پسيحيكالىق دەرتى كەزدەسكەن. ال 12,9 پايىزىنىڭ ومىرتقا جوتاسىنىڭ قيسايعانى, 8,2 پايىزىندا اسقازان-ىشەك جولى اۋرۋلارى بايقالعان.
بايانداماشىنىڭ ايتۋىنشا, كەي مەكتەپتەردە كارىز جۇيەسى, سۋ ماسەلەلەرى تولىق شەشىلمەگەن. وقۋشىلاردىڭ جاسى مەن بويىنا سايكەس كەلەتىن جيھازبەن تولىق قامتىلماعان.
وڭىردەگى 480 مەكتەپتىڭ جارتىسى عانا ورتالىقتاندىرىلعان سۋ جۇيەسىنە قوسىلعان. 209 ءبىلىم ورداسىنا اۋىز سۋ تاسىپ جەتكىزىلەدى. 84 مەكتەپتە دارەتحانا دالادا ورنالاسقان. سپورت زالدارى م.جۇماباەۆ اۋدانىنىڭ 6 مەكتەبىندە, تايىنشا اۋدانىنىڭ 8 مەكتەبىندە جوق. سپورت قۇرالدارى كوپتەن بەرى جاڭالانباعان.
دەپارتامەنت باسشىسى ادام تاڭعالارلىق فاكتىلەردى دە مىسالعا كەلتىردى. اتاپ ايتقاندا, سانيتارلىق-گيگيەنالىق تازالىقتىڭ تومەندىگىنەن جانە قوعامدىق مونشالاردىڭ جەتىمسىزدىگىنەن پەديكۋلەز اۋرۋىنىڭ ءورشىپ بارا جاتقانى الاڭداتادى. ال تۋبەركۋلەزدى جۇقتىرعانداردىڭ سانى 4,5 پايىزعا كەمىگەنىنە قاراماستان, ءوڭىر رەسپۋبليكا بويىنشا الدىڭعى ورىندا تۇر. مەديتسينالىق قىزمەت ساپاسىنىڭ ءتومەندىگىنە بايلانىستى جولداناتىن ارىز-شاعىمدار ءالى كوپ. وقۋشىلاردى ىستىق تاماقپەن قامتاماسىز ەتۋدە دە ءتۇيتكىلدەر كوپ. سولتۇستىك قازاقستان وبلىسى