فورۋمنىڭ اشىلۋ سالتاناتىندا وبلىستىق جاستار ساياساتى باسقارماسىنىڭ باسشىسى مارات جۇرقاباەۆ جاستاردى وبلىس اكىمى ارحيمەد مۇحامبەتوۆتىڭ اتىنان قۇتتىقتاپ, فورۋم جۇمىسىنا ساتتىلىك تىلەدى. ارقالىق قالاسىنىڭ اكىمى ەلدار كۇزەمباەۆ قۇتتىقتاۋ سوزىندە وبلىستاعى ارقالىق جاس قالا ەكەنىن, وندا جۇمىس ىستەيتىن جانە وقيتىن 4 مىڭ جاس تۇراتىنىن ايتتى. ەكى كۇنگە سوزىلعان فورۋمنىڭ العاشقى كۇنى وبلىستىڭ بارلىق شالعايىنان جينالعان جاستار ارقالىق وڭىرىندەگى ساكرالدى ورىندارعا باردى جانە وڭىردەگى ءىرى ءوندىرىس كاسىپورىندارى مەن ۇيىمداردى ارالاپ, اۋىل شارۋاشىلىعىنداعى ءىرى جوبالارمەن تانىستى.
ەكىنشى كۇنى فورۋمعا جينالعان ءومىردىڭ بارلىق سالاسىنداعى جۇمىسشى جاستار, قىزمەتكەرلەر ءتورت سەكتسياعا ءبولىنىپ, ونىڭ جۇمىسىن ارنايى استانادان شاقىرىلعان سپيكەرلەر دانيل فايزۋللاەۆ, الماس كۇمىسقاليەۆ, اسلان تولەنوۆ, دانيەل دۋشمانوۆ جۇرگىزدى. وندا جاستاردىڭ كوشباسشىلىعى, الەۋمەتتىك جەلىلەردەگى جاستار ساياساتى, جەكە تيىمدىلىك, تەحنولوگيالىق كاسىپكەرلىك جونىندە جانە اۋىل جاستارى ءۇشىن وزەكتى دەگەن تاقىرىپتارعا اڭگىمە ءوربىدى, ترەنينگتەر وتكىزىلدى. فورۋمدا اۋىل جاستارىنا ءتيىمدى كاسىبي باعدارلار بەرىلدى, ول وندىرىستەردە يننوۆاتسيالىق جوبالار جاساۋعا قاناتتاندىرادى, جاستار بيزنەسىنىڭ ءورىسىن كەڭەيتىپ, ولاردىڭ تۇلعالىق جانە ينتەللەكتۋالدىق الەۋەتىنىڭ ارتۋىنا ىقپال ەتەتىن بولادى.