ونىڭ ايتۋى بويىنشا, ۇستىمىزدەگى جىلدىڭ 28 ساۋىرىندە ورتالىق سايلاۋ كوميسسياسىنا «حالىق دەموگرافياسى» قوعامدىق بىرلەستىگى جۇماتاي اليەۆتى قازاقستان رەسپۋبليكاسىنىڭ پرەزيدەنتتىگىنە كانديدات رەتىندە ۇسىنۋ تۋرالى قۇجاتتار تاپسىرعان. سايلاۋ تۋرالى كونستيتۋتسيالىق زاڭنىڭ 54-بابىنىڭ 2-تارماعىنا جانە 55-بابىنا سايكەس ءتيىستى, ياعني ونى قازاقستان رەسپۋبليكاسىنىڭ پرەزيدەنتتىگىنە كانديدات رەتىندە ۇسىنۋ تۋرالى «حالىق دەموگرافياسى» قوعامدىق بىرلەستىگىنىڭ جوعارى ورگانى وتىرىسىنىڭ حاتتاماسىنان ءۇزىندى, جەكە كۋالىگى مەن جوعارى وقۋ ورنىن بىتىرگەنى تۋرالى ديپلومىنىڭ كوشىرمەسى, سونداي-اق ومىرباياندىق دەرەكتەرىن جانە مەملەكەتتىك قىزمەتتەگى نەمەسە سايلانبالى مەملەكەتتىك لاۋازىمدارداعى جۇمىس تاجىريبەسى تۋرالى مالىمەت پەن پرەزيدەنتتىككە كانديدات بولىپ تۇسۋگە كەلىسىمى تۋرالى ءوتىنىشى جانە ورتسايلاۋكومنىڭ شوتىنا سايلاۋ جارناسىن ەنگىزگەنىن كۋالاندىراتىن قۇجاتى ۇسىنىلدى.
پرەزيدەنتتىككە كانديداتتىڭ كونستيتۋتسيادا جانە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭدا بەلگىلەنگەن تالاپتارعا سايكەستىگىن تەكسەرۋدە جاردەمدەسۋى ءۇشىن ۋاكىلەتتى مەملەكەتتىك ورگاندارعا سۇراۋ سالىپ, ءتيىستى مالىمەتتەر الىنعان.ءسويتىپ كەشە, ياعني 2019 جىلعى 2 مامىردا ورتسايلاۋكومدا جۇماتاي اليەۆتىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ وتىرىسى ءوتتى.
وتكىزىلگەن ەمتيحاننىڭ ناتيجەلەرى بويىنشا لينگۆيستيكالىق كوميسسيا قازاقستان رەسپۋبليكاسىنىڭ پرەزيدەنتتىگىنە كانديدات جۇماتاي اليەۆتىڭ مەملەكەتتىك ءتىلدى ەركىن مەڭگەرمەگەندىگى جونىندە شەشىم قابىلدادى. جۇماتاي اليەۆتىڭ مەملەكەتتىك ءتىلدى ەركىن مەڭگەرمەگەنى تۋرالى ەمتيحان ناتيجەسىن ەسكەرە وتىرىپ, كونستيتۋتسيا مەن "قر سايلاۋ تۋرالى" كونستيتۋتسيالىق زاڭدا پرەزيدەنتتىككە كانديداتقا قويىلاتىن تالاپتارعا سايكەس ەمەستىگى تۋرالى حاتتاما قابىلداندى. وسىعان بايلانىستى ورتسايلاۋكوم قاۋلىسى قابىلداندى.
وسى قاۋلىنىڭ 1-تارماعىنا ساي قازاقستان رەسپۋبليكاسىنىڭ پرەزيدەنتتىگىنە كانديدات جۇماتاي اليەۆتىڭ كونستيتۋتسيانىڭ جانە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ تالاپتارىنا سايكەس ەمەس ەكەنى انىقتالدى. ال قاۋلىنىڭ 2-تارماعى جۇماتاي اليەۆتى قازاقستان رەسپۋبليكاسىنىڭ پرەزيدەنتتىگىنە كانديدات رەتىندە تىركەۋدەن باس تارتۋدى كوزدەيدى.