- جەر ءجانناتى جەتىسۋ ءوڭىرى تاريحي تۇلعالار مەكەنى. قابانباي, قاراساي, رايىمبەك باتىر باستاعان ەل قورعاعان ەرلەر مەن ءىلياستاي اقىن تۋعان مەكەنگە ەلمەن ەتەنە ارالاسىپ, تۇرعىنداردىڭ پىكىرىن ەستۋگە كەلدىم, - دەدى قاسىم-جومارت توقاەۆ كەزدەسۋدە.
مەملەكەت باسشىسى الدىندا وبلىستىق ارداگەرلەر كەڭەسىنىڭ توراعاسى ەرمەك كەلەمسەيىت, ايماقتاعى ىسكەر ايەلدەر قاۋىمداستىعىنىڭ ءتورايىمى ريمما سالىقوۆا, جەكە كاسىپكەر, «ءمادينا» تىگىن تسەحىنىڭ يەسى ايمان بيعاليەۆا جانە باسقالار ءسوز الىپ, وڭىردە اتقارىلىپ جاتقان ىستەر جايىندا اڭگىمەلەدى.
ەل دامۋىنا ەرەكشە ۇلەس قوسىپ وتىرعان جەتىسۋ ولكەسىندە ەڭبەك كورىگى قىزىپ تۇر. جىل باسىنان بەرى ايماقتاعى ونەركاسىپ ءوندىرىسىنىڭ ناقتى كورسەتكىشى 103,7 پروتسەنتتى قۇراپ, 185,6 ملرد تەڭگەنىڭ ءونىمى وندىرىلگەن. ونىڭ ىشىندە تاۋ-كەن ءوندىرىسى 72,5 پروتسەنتكە, جەڭىل ونەركاسىپ 19,1 پروتسەنتكە كوبەيگەن.
پرەزيدەنت الماتى وبلىسىنا ساپارى اياسىندا تالدىقورعان قالاسىنداعى الەۋمەتتىك, دەمالىس نىساندارىن ارالاپ, قاراتال اۋدانىنداعى «اشىق اكىمدىك» جوباسىمەن تانىستى.