بەيسەنبى, 14 اقپان 2013 6:35
وسىدان ءتورت-بەس جىل بۇرىن قالانىڭ شاعىن اۋداندارىنىڭ بىرىندە نۇرلىبەك ەسىمدى زامانداسپەن كورشى تۇردىق. ەكەۋمىز دە كۇندىز جۇمىستامىز. ال, كەشكىسىن ەسىك الدىنا شىعىپ, اڭگىمە-دۇكەن قۇراتىنبىز. ماحاببات ماشاقاتى قيىن عوي, ول اسەم ەسىمدى قىزدى اۋزىنان تاستامايتىن. ايتۋىنشا, ول اقىلىنا كوركى ساي, ۇلكەندى سىيلاي بىلەتىن قىز. بىلىمگە دەگەن قۇشتارلىعى دا ەرەكشە. ەكەۋىنىڭ ءبىرىن ءبىرى ۇناتىپ, ءجۇرىپ جاتقاندارىنا دا ەكى جىلدىڭ ءجۇزى بولىپ قالىپتى. كورشىم سۇيىكتىسىمەن بىرگە وتكىزگەن قىزىقتى ساتتەرىن اڭگىمەلەگەن سايىن ۇيىپ تىڭدايمىن. كوز الدىما بۇگىنگى ءداۋىردىڭ قىز جىبەگى ەلەستەيدى.
بەيسەنبى, 14 اقپان 2013 6:35
وسىدان ءتورت-بەس جىل بۇرىن قالانىڭ شاعىن اۋداندارىنىڭ بىرىندە نۇرلىبەك ەسىمدى زامانداسپەن كورشى تۇردىق. ەكەۋمىز دە كۇندىز جۇمىستامىز. ال, كەشكىسىن ەسىك الدىنا شىعىپ, اڭگىمە-دۇكەن قۇراتىنبىز. ماحاببات ماشاقاتى قيىن عوي, ول اسەم ەسىمدى قىزدى اۋزىنان تاستامايتىن. ايتۋىنشا, ول اقىلىنا كوركى ساي, ۇلكەندى سىيلاي بىلەتىن قىز. بىلىمگە دەگەن قۇشتارلىعى دا ەرەكشە. ەكەۋىنىڭ ءبىرىن ءبىرى ۇناتىپ, ءجۇرىپ جاتقاندارىنا دا ەكى جىلدىڭ ءجۇزى بولىپ قالىپتى. كورشىم سۇيىكتىسىمەن بىرگە وتكىزگەن قىزىقتى ساتتەرىن اڭگىمەلەگەن سايىن ۇيىپ تىڭدايمىن. كوز الدىما بۇگىنگى ءداۋىردىڭ قىز جىبەگى ەلەستەيدى.
كۇندەردىڭ كۇنىندە كورشىم ءوزىنىڭ قىزىمەن تانىستىردى اقىرى. ايتسا ايتقانداي, ءۇرىپ اۋىزعا سالعانداي سۇلۋدىڭ ءوزى ەكەن. مىنەزى دە اشىق. ءبىز تەز ءتىل تابىسىپ, ارالاسىپ كەتتىك. سول كەزدەرى كەشكە بىرگە سەرۋەنگە دە شىعىپ جۇردىك. سەرۋەندەيمىز دەگەن اتى, مەن قاستارىندا ىلەسىپ جۇرەمىن. سىرلاساتىن ەكەۋى. اڭگىمەلەرى تاۋسىلمايدى. ءتىپتى, ءبىرىن-ءبىرى كورمەسە تۇرا المايتىن جاعدايعا جەتكەنىن سەزدىم. ءبىر كۇنى نۇرلىبەكتەن «ومىرلىك سەرىگىڭدى تاپقان سياقتىسىڭ عوي, قاشان ۇيلەنەسىڭ؟» دەپ سۇراپ قالعانىم بار. «وي, قايداعى, ول ءالى 3-كۋرستا اقىلى بولىمدە وقيدى. ونىڭ اقشاسىن كىم تولەيدى؟ ءبىتىرسىن الدىمەن», دەمەسى بار ما كورشىمنىڭ.
ۇندەگەن جوقپىن, بىراق, ءبىر-ءبىرىن سونشا جاقسى كورىپ تۇرىپ وقۋدىڭ اقشاسىن ويلاپ جۇرگەنى ءبىر ءتۇرلى كورىندى ماعان. سانامدا: «ماحاببات تا ەسەپكە تاۋەلدى بولعانى ما؟» دەگەن سۇراق قالىپ قويدى. كەيىننەن ەستىسەم ارۋ اسەم تالدىقورعانعا ۇزاتىلىپ كەتىپتى.
كوپكە دەيىن ءبىرىن-ءبىرى سۇيگەن جاستاردىڭ قوسىلا الماۋلارىنا نە سەبەپ بولدى دەگەن ساۋال كوكەيىمنەن كەتپەي قويدى. بۇل ارادا جىگىتتىڭ قولىنىڭ قىسقالىعى جاستاردىڭ باعىن بايلاعان سياقتى. ءبىزدىڭ قازەكەڭنىڭ ىرىم-جىرىمى كوپ. ەڭ ءبىرىنشى كەزەكتە قىزعا تولەنەتىن قالىڭمالدى ويلايمىز. ونىڭ ەڭ تومەنگى «ستاۆكاسى» 150 مىڭ تەڭگە بولىپ تۇر قازىر. ودان سوڭ, كەلىن ءتۇسىرۋدىڭ, بەتاشار جاساۋدىڭ ءاۋرەسىمەن جۇگىرەمىز. ەسىك اشىپ بارۋ, ءتاتتى ءشاي بەرۋ دەپ تاعى شاپقىلايمىز. بۇل مىندەتتەردى اتقارىپ العان سوڭ, تويدىڭ قامىنا كىرىسەمىز, سالاقۇلاش ءتىزىم جاسايمىز. مۇنىڭ ءبارى قىپ-قىزىل اقشا. وسىنى ويلاعان اتا-انا كەيدە ايتۋلى كۇندى كەشەۋىلدەتە بەرەدى. وسىلاي, جاستاردىڭ ءبىر بىرىنە دەگەن سۇيىسپەنشىلىگى, جاس وتاۋدىڭ جاراسىمدىلىعى تۋرالى ماسەلە ەكىنشى ورىنعا سىرعىپ كەتەدى. ەندى كەيبىر دوستارىمىز بار. «ۇيدەگىلەر وسى ايدىڭ جيىرماسىندا ۇيلەن دەپ جاتىر. سوعان ءبىر «نورمالنىي» قىزدار بار ما؟» دەيدى ولار. مىنە, بۇل ەسەبى كەلىسىپ, ۇپايى تۇگەندەلگەن وتباسىنىڭ تىرلىگى. ەڭ باستىسى, قولدا تۇرعان اقشا جاراتىلىپ كەتپەي تۇرعاندا ۇيلەنىپ الۋ كەرەك. مۇنداي جاعدايدا جاستار نە ىستەيدى؟ مۇنداي جاعدايدا قالانى قايدام, اۋىلدى جەردە «الىپ قاشۋ» وپەراتسياسى باستالادى. جەڭگەلەر ينستيتۋتى جۇمىس ىستەيدى. ۇلكەن اپالار دا قۋلىققا باسىپ, تابالدىرىققا جاتىپ الادى. جاسىراتىنى جوق, تابالدىرىقتان وسىلاي اتتاپ جاتقان قىزدار دا بار. جاستار جاراسىپ جاتسا – باقىت. ال, جاراسپاسا شە؟..
بۇل تۋرالى جاستاردىڭ دا پىكىرى ءارالۋان.
ماحاببات ۇيلەنگەن سوڭ جوعالاتىن سەزىم, ال ەسەپ ءومىر بويى تاۋسىلمايدى. بىرەۋ ەسەپپەن ۇيلەنۋدىڭ سوڭى جاقسىلىققا اكەلمەيتىنىن العا تارتسا, ەندى بىرەۋلەرى ەسەپپەن ۇيلەنگەندى ءجون سانايدى. باستىسى, ەكەۋى جاراسىمدى جۇپ بولىپ, بىرگە ءومىر ءسۇرىپ, وتباسىنا يە بولىپ وتىرسا بولعانى. سودان سوڭ وزدەرى-اق ءبىر-بىرىنە ۇيرەنىسىپ, جاقسى كورە باستايدى. ۇيلەنۋدىڭ بۇل ءتۇرى كوپ جاعدايدا اتا-انالاردىڭ, جەڭگەلەردىڭ ارالاسۋىمەن ورىن الاتىنى وتىرىك ەمەس. ياعني «ۇپايى تۇگەل ۇتىلماس» دەگەننىڭ كەرى. جانە «قىزدى جەڭگە بۇزار, جەڭگەنى تەڭگە بۇزار» دەگەن دە ءسوز بار. اقشا بولسا ۇيلەنۋ قايدا قاشادى دەيسىز, دەيدى بۇگىندە جاسى 37-گە كەلگەن «سۇربويداق» جاقسىلىق سەيىتوۆ.
بۇعان جاس وتباسىنىڭ يەسى, 3 بالانىڭ اكەسى بولىپ وتىرعان داۋرەن سادىقبەكوۆ بولسا: «شىنايى ماحابباتپەن دە ۇلى تابىستارعا جەتۋگە بولادى. ەسەپپەن قۇرىلعان ماحابباتتىڭ ەسكەگى سىنىپ, قايعىعا اكەلىپ سوعۋى مۇمكىن. ويتكەنى, ءدۇنيە ادامعا ومىرلىك جولداس ەمەس. ەڭ دۇرىسى, دۇنيەگە كوز بايلاماي, شىنايى ماحابباتقا قول جەتكىزگەن دۇرىس. ال, دۇنيە – ادام قولىمەن جاسالاتىن نارسە», دەپ قارسى ءۋاج بىلدىرەدى.
بۇل ءسوزدى دە جوققا شىعارا المايسىڭ. ەسەپپەن ۇيلەنۋدىڭ سوڭى كەيدە وكىنىشتى جاعدايلارعا اكەلىپ سوعىپ جاتادى. ماسەلەن, بۇگىندەرى وبلىستىق سوت اكتىلەرىن ورىنداۋ دەپارتامەنتى تاراز قالالىق اۋماقتىق №2 بولىمىندە اليمەنت ماسەلەسى بويىنشا 3005 اتقارۋ قۇجاتى جاتىر. 400 اتقارۋ ءوندىرىسى بويىنشا بورىشكەرلەر اليمەنت تولەۋدەن جالتارىپ, قاشىپ ءجۇر. سونىڭ كەسىرىنەن بەس جۇزگە جۋىق بالا قامقورلىققا ءزارۋ بولىپ وتىر. جىل باسىنان بەرى سەگىز ادام سوت شەشىمىن ورىنداماعانى ءۇشىن اكىمشىلىك جاۋاپكەرشىلىككە تارتىلعان. التى بورىشكەر قامالىپ, ەكەۋىنە ايىپپۇل سالىنىپتى. بۇل قوعامنىڭ قاسىرەتى. وسىلاردىڭ ءبارى قازىر ءۇي بولۋدى بىلاي قويعاندا, ۇيلەنۋدىڭ ءوزى قيىنداپ بارا جاتقانىن كورسەتپەي مە؟
ءسىز قالاي ويلايسىز, زەردەلى وقىرمان؟..
تۇرسىنبەك سۇلتانبەكوۆ,
قازاقستان جۋرناليستەر وداعىنىڭ مۇشەسى.
جامبىل وبلىسى.