بيىل كونفەرەنتسياعا 2 مىڭعا جۋىق عىلىمي ماقالا كەلىپ ءتۇستى. عىلىمي كونفەرەنتسيانىڭ جۇمىسى «ق.ساتباەۆ جانە ونىڭ ءبىلىم بەرۋ مەن عىلىمداعى ءرولى» اتتى تاقىرىپتان باستالىپ, فيلولوگيا, تاريح, ولكەتانۋ, فيلوسوفيا, ساياساتتانۋ, ماتەماتيكا, ينفورماتيكا, ەكونوميكا, مەديتسينا, اۋىل شارۋاشىلىعى, مادەنيەتتانۋ, پەداگوگيكا, ەتنولوگيا جانە باسقا باعىتتار بويىنشا جالعاسىن تاپتى.
عىلىمي شاراعا وبلىس اكىمى بولات باقاۋوۆ قاتىستى. ۋنيۆەرسيتەت رەكتورى گاۋحار احمەتوۆا قاتىسۋشىلارعا ساتتىلىك تىلەدى. ۋنيۆەرسيتەت عىلىمي ورتالىعىنىڭ حابارلاۋىنشا, كونفەرەنتسياعا اقتوبە, الماتى, نۇر-سۇلتان, قاراعاندى, قوستاناي, كوكشەتاۋ, ورال, تاراز جانە رەسەي قالالارىنان 1500-دەن استام ماقالا كەلىپ تۇسكەن.
عىلىمي ماتەريالدار بويىنشا 22 توم جيناق باسىپ شىعارىلدى. ۋنيۆەرسيتەت وتكىزىپ كەلە جاتقان «ساتباەۆ وقۋلارىنا» 17 جىل ارالىعىندا 35 مىڭعا جۋىق جاس عالىم مەن دارىندى وقۋشىلار قاتىسقان. 2001 جىلدان بەرى 222 تومعا جيناقتالعان 19 مىڭنان استام ماقالا جارىق كوردى. ءار كونفەرەنتسيانىڭ كۇن تارتىبىندە كاسىبي نەگىزدەلگەن جاۋاپتاردى تالاپ ەتەتىن جاڭا ماسەلەلەر قاراستىرىلادى. وبلىس ورتالىعىنداعى №16 مەكتەپ ليتسەيدىڭ مۇعالىمى ايجامال سلانبەكقىزىنىڭ وقۋشىلارى جىل سايىن حالىقارالىق «ساتباەۆ وقۋلارى» عىلىمي كونفەرەنتسياسىنا قاتىسىپ, جەڭىمپاز اتانىپ ءجۇر. ايجامال باتاەۆا جالپى ءبىلىم بەرەتىن مەكتەپتەردىڭ 8-9-سىنىپتارىنا فيزيكا ءپانىن تەرەڭدەتىپ وقىتۋ باعدارلاماسىنىڭ اۆتورى, سونىمەن قاتار 5-سىنىپتارعا جاراتىلىستانۋ ءپانىن فيزيكا عىلىمىنىڭ تەوريالىق ەلەمەنتتەرى ارقىلى وقىتۋ باعدارلاماسىنىڭ اۆتورى. وتكەن جىلى «كوشباسشى پەداگوگ-2018» اتاعىن يەلەنىپ, د.قوناەۆ اتىنداعى توسبەلگىمەن ماراپاتتالدى.ال باياناۋىل اۋدانىنداعى تورايعىر ورتا مەكتەبىنىڭ تاريح ءپانى مۇعالىمى باقىتگۇل احمەتوۆانىڭ ايتۋىنشا, ساتباەۆ وقۋلارىنا قاتىسقان 9-سىنىپ وقۋشىسى نازەركە سەرىكباي «تورايعىر وڭىرىندە جىلقى مالىن ءوسىرۋدىڭ ءتيىمدىلىگى», ال 7-سىنىپ وقۋشىسى ايىم ەگىنتاي «قازاق كوشىنىڭ تۇرلەرى مەن ەرەكشەلىكتەرى» جونىندە عىلىمي جۇمىس جازىپتى.
اكادەميا پرەزيدەنتى, تەحنيكا عىلىمدارىنىڭ دوكتورى نۇرلان رىسپانوۆتىڭ قاتىسۋىمەن وقۋ ورىندا «تاۋ-كەن عىلىمدارى ۇلتتىق اكادەمياسىنىڭ» فيليالى اشىلدى. ن.رىسپانوۆتىڭ ايتۋىنشا, ۋنيۆەرسيتەت عالىمدارىنىڭ ماقساتى – جەرگىلىكتى كاسىپورىنداردىڭ باسەكەگە قابىلەتتى بولۋىنا, ءونىمنىڭ وزىندىك قۇنىن ازايتۋعا ارنالعان يننوۆاتسيالىق جوبالاردى ازىرلەۋ. سونىمەن بىرگە ورتالىقتىڭ تەحنيكالىق ءبىلىم الاتىن ستۋدەنتتەرگە دە ەسىگى اشىق. عىلىم قۋعان, يننوۆاتسيا ءتىلىن بىلەتىن ءبىلىمدى جاستار – ەل بولاشاعى.
بار عۇمىرىن عىلىم مەن ءبىلىمگە ارناعان قانىش اتالارىنىڭ قۇرمەتىنە ارنالعان عىلىمي جيىن جاس عالىمداردىڭ عىلىم سالاسىندا جاڭالىق اشۋلارىنا اشىلعان جول. پاۆلودار وبلىسى