قۇقىق قورعاۋشىلاردىڭ پايىمداۋىنشا, تۇنگى 23.00-دەن باستاپ تاڭعى 8.00-گە دەيىنگى ارالىقتا قوعامدىق ورىنداردا الكوگول ونىمدەرىن ساتۋعا تىيىم سالعان ءجون.
– تۇرعىن ۇيلەردىڭ ءبىرىنشى قاباتىندا ورنالاسقان كوڭىل كوتەرۋ ورىندارىنىڭ 23.00-گە دەيىن, ال ءوز الدىنا جەكە عيماراتتاعى مەيرامحانالار, باسقا دا نىساندار تۇنگى 2.00-گە دەيىن عانا جۇمىس ىستەگەنىن قالايمىز. ادام تۇنگى ساعات 2-گە دەيىن ءىشىپ, ودان كەيىن دە ۋداي ماس بولىپ وتىرا بەرسە, مۇنىڭ سوڭى جاقسىلىققا اپارمايدى, ونى دەنساۋلىق ساقتاۋ ۇيىمدارى دا قۇپتايدى. ءتۇن اۋعاننان كەيىن دە توقتاماي ىشكەن ادام نە ءوزى قىلمىس جاسايدى, نە بولماسا كوشەدە قىلمىستىڭ قۇربانى بولۋى مۇمكىن. ءبىز مەملەكەتتىك ەمەس كۇزەت قۇرىلىمدارىمەن ىنتىماقتاستىق جاساستىق, ولار مەيرامحانالاردىڭ ىشىندە بولعان وقيعالار كەزىندە عانا بىزگە كومەكتەسەدى. الايدا, ادەتتە مەيرامحانالاردىڭ باسشىلىعى جانجالداسقان ادامداردى سىرتقا شىعارىپ جىبەرۋگە تىرىسادى. ولار ءۇشىن نە بولسا دا وزدەرىندە ەمەس, باسقا جەردە بولعانى كەرەك, – دەيدى ول.
پوليتسەيلەردىڭ كەلتىرگەن دەرەكتەرىنە سۇيەنسەك, ىشىمدىك ساتۋعا شەكتەۋ قويۋعا سالماقتى سەبەپ بار دەۋگە بولادى. جالپى, قالاداعى قىلمىستاردىڭ 30 پايىزى قوعامدىق ورىنداردا الكوگولدى ىشىمدىك ىشكەن ادامدار جاسايدى ەكەن. ەلوردادا ەڭ كوپ قۇقىقبۇزۋشىلىق «الماتى» اۋدانىندا تىركەلگەن. قالاداعى ەڭ كوپ توبەلەس بولاتىن, سۋىق قارۋ قولدانىلاتىن, ۇرلىق جاسالاتىن ورىنداردىڭ قاتارىندا «رىبا موەي مەچتى», «پاراگون», «گۋدبار», «حيتى XX ۆەكا», «ستامبۋل», «قازاقشا ديسكوتەكا», «چارلي چاپلين» سىندى مەيرامحانا, ءدامحانا, كاراوكە-بارلار اتالادى. «ەسىل» اۋدانىنداعى «پۋنكت پ», «زولوتو», «EskoBar» سياقتى ورىنداردا دا قىلمىس ءجيى جاسالادى ەكەن.دەگەنمەن, قۇقىق قورعاۋشىلاردىڭ ۇسىنىسىنا ەلوردالىق رەستوراتورلاردىڭ, كوڭىل كوتەرۋ نىساندارىن ۇستايتىن باسقا دا كاسىپكەرلەردىڭ قارسى ءۋاجى بار. قالالىق كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى كەڭەستىڭ وتىرىسىنا كەلگەن ولار الكوگولدى ىشىمدىكتەر ساتىلاتىن ۋاقىتتى شەكتەۋ, قور-قورعا تىيىم سالۋ بيزنەسمەندەردى اياقتان شالۋمەن بىردەي ەكەنىن ايتادى.
– ونىڭ سالدارىنان كوڭىل كوتەرۋ, دەمالىس ورىندارى ايتارلىقتاي شىعىنعا باتادى. جۇمىس ورىندارى قىسقارىپ, قالا بيۋدجەتىنە تۇسەتىن سالىق تۇسىمدەرى ازايادى. وعان قوسا, كولەڭكەلى الكوگولدى ونىمدەردى ساتۋ نارىعى بەلەڭ الۋى مۇمكىن. نۇر-سۇلتان قالاسىنىڭ دەمالىس ورىندارىنىڭ كونتسەپتسياسى ءدال تۇنگى ۋاقىتتا جۇمىس ىستەۋگە نەگىزدەلگەن. ەگەر 23.00-دەن باستاپ تاڭەرتەڭگە دەيىن الكوگولدى ونىمدەردى ساتۋعا شەكتەۋ قويىلسا, كوپتەگەن نىساندار جابىلۋعا ءماجبۇر بولادى, – دەيدى ولار. بۇل شەكتەۋ ەلوردانىڭ تۋريستىك يميدجىنە دە نۇقسان كەلتىرەدى دەپ سانايدى.
تاعى ءبىر ايتا كەتەرلىگى, سوڭعى ۋاقىتتا كوڭىل كوتەرۋشىلەرگە تەمەكى, قور-قور, ەلەكتروندى سيگارەت سىندى زاتتار ۇسىناتىن ورىندارعا پوليتسەيلەردىڭ رەيدتەرى جيىلەپ كەتكەن كورىنەدى. وسىعان بايلانىستى قالالىق كاسىپكەرلەر پالاتاسىنا مەملەكەتتىك ورگانداردىڭ ارەكەتىنە بايلانىستى مەيرامحانا, ءدامحانا, بارلاردىڭ يەلەرىنەن تۇسكەن شاعىمدار دا كوبەيگەن.
جالپى, «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستە تەمەكى زاتتارىن تۇتىنۋعا تىيىم سالىنعان جەرلەردىڭ ءتىزىمى كورسەتىلگەنىن ايتا كەتەيىك. ارنايى جابدىقتالعان بولمەسى بار نىسانداردا, نە بولماسا اشىق الاڭداردا وعان تىيىم سالىنباعان. باستىسى, تەمەكى نەمەسە قور-قور شەگەتىن ورىندا سۋسىن مەن تاماق ۇسىنىلماۋعا ءتيىس. الايدا, بۇل تۇستا دا زاڭدىق تۇرعىدا رەتتەلمەگەن جايتتار بار. كاسىپكەرلەردىڭ سوزىنە قاراعاندا, قور-قوردىڭ ءوزى قۇرامداس بولىگىنە قاراي تەمەكىسى بار نەمەسە تەمەكىسى جوق بولىپ بولىنەتىن كورىنەدى. ال قۇقىق قورعاۋشىلار بولسا ونىڭ قۇرامىنا ساراپتاما جاساپ اۋرە بولماي-اق, بىردەن ايىپپۇل سالۋعا بەيىل.
– ەلوردالىق قۇقىق قورعاۋشىلار تۇراقتى تۇردە رەيد جاساپ, اكىمشىلىك جاۋاپكەرشىلىككە تارتادى. كاسىپكەرلەردەن تۇسكەن شاعىمدار بويىنشا, مەيرامحانا, ءدامحانالاردا ادام كوبەيەتىن كەشكى ۋاقىتتا پوليتسەيلەردىڭ التى-جەتەۋى بىردەن كەلىپ, قوناقتاردى شوشىتادى, بۇل نىسانداردىڭ جىلدار بويى قالىپتاستىرعان يميدجىنە, ءوزى جيناعان نەمەسە قارىزعا الىپ اقشا سالعان بيزنەسىنە كەدەرگى كەلتىرەدى, – دەيدى قالالىق كاسىپكەرلەر پالاتاسىنىڭ ءبولىم باستىعى نۇرجان بۋكين.ال پوليتسيا باسقارماسى باستىعى ورىنباسارىنىڭ ايتۋىنا قاراعاندا, قۇقىق قورعاۋشىلار رەيد كەزىندە زاڭ تالاپتارىن نەگىزگە الادى. ولار ءۇشىن قور-قوردىڭ قۇرامى, نەدەن جاسالعانى ماڭىزدى ەمەس. ماڭىزدىسى – زاڭ بويىنشا قوعامدىق ورىنداردا شىلىم شەگۋگە تىيىم سالىنعانى.
– زاڭدا قوعامدىق ورىنداردا شىلىم شەگۋگە تىيىم سالىنعانى تۋرالى جازىلعان, ونىڭ نەدەن جاسالعانى تۋرالى جازىلماعان. ەلىمىز سالاماتتى ءومىر سالتىن قالىپتاستىرۋعا بەت الىپ كەلەدى, ءار 10 ادامنىڭ ۇشەۋى شىلىم نەمەسە قور-قور شەگەدى. كەشقۇرىم بالالارىمىزدى ەرتىپ ءبىر جەرگە دەمالۋعا باردىق دەلىك. قاسىڭدا بۇرقىراتىپ شەگىپ وتىرعان بىرەۋ ءۇشىن نەگە باسقالار ۋلانۋى كەرەك؟! كاليانعا ارنالعان جەكە بولمە جاساڭىزدار, – دەيدى ت.ءابدىراحمانوۆ.
ونىڭ ايتۋىنشا, پوليتسەيلەر رەيد كەزىندە بيزنەستى تەكسەرمەيدى, تەك قوعامدىق تارتىپكە باقىلاۋ جاسايدى. سول سەبەپتى رەيد ءۇشىن پروكۋراتۋرانىڭ ۇيعارىمىن الۋ مىندەتتى ەمەس. ءتارتىپ بۇزىلعان جاعدايدا ايىپپۇل ءدامحانا, مەيرامحانا, بارلاردىڭ يەسىنە عانا ەمەس, تەمەكى نەمەسە قور-قور شەگۋشىگە دە سالىنادى.تاعى ءبىر ايتا كەتەرلىگى, قوعامدىق دەنساۋلىق ساقتاۋ دەپارتامەنتى كەزىندە قور-قور قۇرامى مەن قۇرىلعىسىنا ساراپتاما جاساپ, ۋلى زاتتار بار ەكەنىن, شەگۋگە ارنالعان قۇرىلعىنىڭ ءتۇرلى باكتەريالارعا تولى لاس ەكەنىن انىقتاعان.
– ەگەر كاسىپكەرلەر قوسىمشا ساراپتاما جاسالعانىن قالاسا, جۇمىستى تاعى دا جولعا قويا الامىز, – دەدى قالالىق قوعامدىق دەنساۋلىق ساقتاۋ دەپارتامەنتى باستىعىنىڭ ورىنباسارى ايگۇل شاعالتاەۆا.
كاسىپكەرلەردىڭ, مەملەكەتتىك ورگاندار وكىلدەرىنىڭ پىكىرلەرى تىڭدالا كەلە, كاسىپكەرلەردى قولداۋ كەڭەسى قالالىق پوليتسيا باسقارماسىنان رەيدتەردى ۋاقىتشا توقتاتا تۇرۋ تۋرالى ءوتىنىش جاسادى. ەندى كاسىپكەرلەر جۋىق ارادا كوڭىل كوتەرۋ ورىندارىندا تەمەكى نەمەسە قور-قور شەگەتىن ارنايى ورىندار جاساۋعا ءتيىس.