وعان يگىلىكتى شارانى اشىپ, تۇرعىنداردان الدىمەن ءسۇيىنشى سۇراعان الماتى قالاسى اكىمىنىڭ كەڭەسشىسى ماماي احەتتىڭ سويلەگەن سوزىنەن جاۋاپ ىزدەپ كورەيىك. «عىلىم مەن مادەنيەتتىڭ, ونەردىڭ ورداسىنا اينالعان ارۋ الماتىمىزدا حالقىمىزعا ەڭبەگى ءسىڭگەن نەبىر تۇلعالاردىڭ ەسىمدەرى قۇرمەتپەن اتالىپ تۇراتىن يگى ءداستۇر بار, – دەدى بەلگىلى عالىم-كەڭەسشى. – بۇگىنگى سالتاناتتىڭ ءبىر ەرەكشەلىگى سول – اۋىلدا ءوسىپ, اۋىل شارۋاشىلىعىن وركەندەتىپ, اۋىلدىڭ جايىن كۇيتتەگەن اردا ازاماتىمىزعا سول كەزدەگى استانامىز الماتىدا نەلىكتەن سونشاما قۇرمەت كورسەتىلدى ەكەن دەيسىز؟ شىنتۋايتىندا ناعىز ەڭبەك مايتالماندارىنا كەشە دە, بۇگىندە دە لايىقتى كوڭىل ءبولىنىپ ءىليپات كورسەتىلگەن, كورسەتىلىپ كەلەدى دە. ەندەشە, كىل ونەر مەن مادەنيەتتىڭ, عىلىمنىڭ مارقاسقالارى قاتارىندا استانامىز الماتىدان سول كەزدە اۋىل ادامىنا ءۇش بولمەلى ءپاتەردىڭ تەگىن بەرىلۋى تەكتەن تەك ەمەس, ۇلى ەڭبەكتىڭ وتەۋى دەپ ۇعىنۋمىز كەرەك».
قۇرىعى قۇتتى جىلقىشىنىڭ ۇلى, اۋىل شارۋاشىلىعى عىلىمدارىنىڭ دوكتورى نۇرعالي بيعازيەۆ قالا اكىمى كەڭەسشىسىنىڭ ساليقالى ءسوزىن بىلاي ساباقتاستىردى.
– 80-جىلداردىڭ باسىندا ەل ارالاۋعا شىققان قازاقستان باسشىسى دىنمۇحامەد قوناەۆ اتاقتى «لۋگوۆوي» اسىل تۇقىمدى جىلقى زاۋىتىنا ات باسىن ىركەدى. اۋىل ەڭبەكشىلەرىمەن جىلى شىرايلى كەزدەسۋ بارىسىندا ديمەكەڭ اكەمىزدىڭ ەڭبەك كورسەتكىشىنە قاتتى ءسۇيسىنىپ باس شايقاعانى بار ەكەن. سوندا, «اينالايىن ءنادىر, ءوركەنىڭ ءوسسىن, ماڭداي تەرىڭ اقتالسىن, ءوزىڭ تۇرماساڭ دا ءوسىپ كەلە جاتقان شيەتتەي بالا-شاعاڭ بار ەكەن, كادەڭە جاراتارسىڭ», – دەپ ەسەنتاي وزەنىنىڭ جاعاسىنان وسى ءۇش ءبولمەلى ءۇيدى سىيعا تارتقان. اعايىندى ون بالانىڭ دەنى وسى ۇيدە وستىك-وندىك. يگى ىسكە تىكەلەي قولداۋ كورسەتىپ, قامقور بولعان قالا باسشىلىعىنا مىڭ دا ءبىر راحمەت. بۇگىن, مىنە, اكەمىزدىڭ رۋحى, ەل قامىن جەگەن ابىز اعالارىمىزدىڭ قۇرمەتى ءۇشىن جاسالىپ جاتقان ۇلكەن تاريحي وقيعاعا بارشاڭىز كۋا بولدىڭىزدار.
– ەلىمىز ەتەك-جەڭىن جيناپ, تاۋەلسىزدىك تۋىن كوتەرگەن تۇستا ءنادىر اعامىز بيلىك ورىندارىنا ءوتىنىش جاساپ اۋىلىمىزدا العاشقى مەشىتكە ورىن تاۋىپ, ونىڭ العاشقى تاسىن ءوز قولىمەن قالاپ ەدى, – دەدى كوكدونەن اۋىلىنىنىڭ يمامى قايرات قاجى. اۋىلدا دا, الماتىدا دا ايشىقتى ءىزى سايراپ جاتقان سوتسياليستىك ەڭبەك ەرىنىڭ, كسرو كومپارتياسى ءححVى سەزىنىڭ دەلەگاتى داڭقتى جىلقىشىنىڭ ەل يگىلىگى ءۇشىن ەتكەن ەرەن ەڭبەگى تۋرالى سالتانات بارىسىندا قازاقستان رەسپۋبليكاسىنىڭ ءمادەنيەت قايراتكەرى قىدىرالى قويتاي, ىشكى ىستەر سالاسىنىڭ ارداگەرى, پولكوۆنيك ساتىمبەك رىسپاەۆ جانە باسقا دا ازاماتتار قىزىقتى ەستەلىك-ويلارىن ورتاعا سالدى. بەلگىلى ايتىس اقىنى سەرىك قالي جىردان شۋماق شاشتى.
تاريحقا باي مىڭجىلدىق جاسى بار الماتىنىڭ مۇراعاتى بۇگىن تاعى ءبىر ايتارلىقتاي قۇندى دەرەكپەن, قۇجاتپەن, وقيعامەن تولىقتى.
الماتى