ازەربايجان ميللي مەدجليسىنىڭ ءتوراعاسى وكتاي سابيروعلى اسادوۆپەن اڭگىمە بارىسىندا كاسپي كونۆەنتسياسىن راتيفيكاتسيالاۋدىڭ ماڭىزدىلىعى اتاپ ءوتىلدى. د.نازارباەۆانىڭ پىكىرىنشە, ول كاسپي ماڭى ەلدەرى اراسىنداعى ساياسي جانە ەكونوميكالىق ىنتىماقتاستىقتى ودان ءارى دامىتۋعا قۋاتتى سەرپىن بەرەدى, سونداي-اق كاسپي ايماعىنداعى تۇراقتىلىق پەن قاۋىپسىزدىكتى نىعايتۋعا قىزمەت ەتەتىن بولادى. جۇزدەسۋشىلەر تالقىلاناتىن ماسەلەلەرگە قاتىستى كوزقاراستارىنىڭ ورتاقتىعىن اتاپ ءوتىپ, ءوزارا ءىس-قيمىلدىڭ بارلىق سالالارىنداعى ىنتىماقتاستىقتى جالعاستىرۋدى ۇسىندى.
قىرعىز رەسپۋبليكاسى جوگوركۋ كەنەشىنىڭ توراعاسى داستان جۇمابەكوۆپەن كەزدەسۋ بارىسىندا تاراپتار پارلامەنتارالىق بايلانىستار ماڭىزدى بولىگى بولىپ تابىلاتىن ەكىجاقتى قارىم-قاتىناستاردى ودان ءارى تەرەڭدەتۋدى جاقتايتىندارىن ايتتى. شەكارا ماڭى ىنتىماقتاستىعى, ساۋدا-ەكونوميكالىق ءوزارا ءىس-قيمىلدى, ءتۋريزمدى دامىتۋ ماسەلەلەرى تالقىلاندى. قازاقستان سەناتىنىڭ باسشىسى وسىعان وراي «ورتالىق ازيا شەنگەنى» ءوڭىردىڭ تۋريستىك الەۋەتىن كەڭەيتۋگە مۇمكىندىك بەرەتىنىن اتاپ ءوتتى.
تۇركپا باس حاتشىسى التىنبەك مامايۋسۋپوۆپەن جۇزدەسۋدە تۇركپا-نىڭ قازىرگى كەزدەگى قىزمەتى, اسسامبلەيانىڭ كەزەكتى جالپى وتىرىسىنا دايىندىق ماسەلەلەرى قوزعالدى, سونداي-اق تۇركىتىلدەس مەملەكەتتەر پارلامەنتتەرى اراسىنداعى ءوزارا ءىس-قيمىلدى ودان ءارى دامىتۋ جونىندە پىكىر الماسىلدى. ا.مامايۋسۋپوۆ تۇركپا جۇمىسىنداعى قازاقستاندىق پارلامەنتشىلەردىڭ بەلسەندى قىزمەتىنە توقتالدى.
ارمەنيا ۇلتتىق جينالىسىنىڭ توراعاسى ارارات ميرزويانمەن ەكىجاقتى ىنتىماقتاستىقتى نىعايتۋ ماسەلەلەرى تالقىلاندى. سەنات باسشىسى ساۋدا-ەكونوميكالىق ءارىپتەستىكتى كەڭەيتۋ ءۇشىن ۇكىمەتارالىق كوميسسيا قۇرۋدى ۇسىندى. تاراپتار زاڭ شىعارۋ قىزمەتىندە تاجىريبە الماسۋ ءۇشىن پارلامەنتتىك دوستىق توپتارىنىڭ الەۋەتىن بەلسەندى پايدالانۋ قاجەتتىگى تۋرالى ورتاق پىكىرگە كەلدى.
سەنات باسشىسى جۇزدەسۋشىلەردى ەلىمىزدەگى ماڭىزدى ىشكى ساياسي وقيعالار تۋرالى حاباردار ەتىپ, قازاقستاننىڭ قازىرگى زامانعى ساياسي جۇيەسى بيلىكتىڭ, مەملەكەتتىڭ ساياسي جانە ەكونوميكالىق دامۋىنىڭ تولىق ساباقتاستىعىن قامتاماسىز ەتەتىنىن اتاپ ءوتتى. قازاقستان پرەزيدەنتىنىڭ الداعى كەزەكتەن تىس سايلاۋى تۋرالى ايتا كەلىپ, د.نازارباەۆا «پارلامەنتشىلەر زاڭ شىعارۋشى بيلىك وكىلدەرى رەتىندە سايلاۋ الدىنداعى ناۋقاندى زاڭنىڭ رۋحى مەن ارپىنە تولىق سايكەس وتكىزۋگە, سونداي-اق سايلاۋدىڭ ءادىلدىگى مەن اشىقتىعىن قامتاماسىز ەتۋگە نيەتتەنىپ وتىر», – دەدى.سەنات توراعاسى تمد پارلامەنتارالىق اسسامبلەياسىنىڭ جالپى وتىرىسىنا قاتىستى.
پارلامەنتشىلەر تمد پاا تۇراقتى كوميسسيالارى دايىنداعان 11 ۇلگى زاڭنامالىق اكتىلەر مەن ۇسىنىمداردىڭ جوبالارىن قارادى. وندا قۇقىقتىق ماسەلەلەر جونىندەگى كوميسسيا («يپوتەكا تۋرالى», «مۇراگەرلىك قۇقىعى تۋرالى», «ادۆوكاتۋرا جانە ادۆوكاتتىق قىزمەت تۋرالى», «سوت-ساراپتاما قىزمەتى تۋرالى», قورعانىس جانە قاۋىپسىزدىك ماسەلەلەرى جونىندەگى كوميسسيا («ازاماتتىق قورعاۋ تۋرالى»), ەكونوميكا جانە قارجى ءجونىندەگى كوميسسيا («باعا بەلگىلەۋ تۋرالى» ۇلگى زاڭداردى, تمد-عا قاتىسۋشى مەملەكەتتەر ءۇشىن ىشكى سۋ كولىگىنىڭ ۇلگى كودەكسىن); ءبىلىم جانە عىلىم جونىندەگى كوميسسيا «عىلىمي-تەحنيكالىق اقپارات تۋرالى» ۇلگى زاڭنىڭ جاڭا ءماتىنى مەن «نانوتەحنولوگيالار ەتيكاسى تۋرالى» ۇسىنىستاردى ازىرلەگەن بولاتىن.
شاراعا تمد پاا-داعى پارلامەنتتىك دەلەگاتسيالاردىڭ باسشىلارى, دوستاستىق ەلدەرىنىڭ زاڭ شىعارۋ ورگاندارىنىڭ وكىلدەرى, تمد پاا تۇراقتى كوميسسيالارىنىڭ مۇشەلەرى, دوستاستىقتىڭ سالالىق ورگاندارىنىڭ, ۇلتتىق اتقارۋشى بيلىك ورگاندارىنىڭ وكىلدەرى, عالىمدار مەن ساراپشىلار قاتىستى.