جۇما, 29 ماۋسىم 2012 6:40
بۇرناعى كۇنى پورتۋگاليا مەن يسپانيانىڭ اراسىندا وتكەن ءبىرىنشى جارتىلاي فينالدىق ويىننىڭ نەگىزگى جانە قوسىمشا ۋاقىتتارىندا ەسەپ اشىلمادى. سودان سوڭ وسى تۋرنيردە قاتارىنان ەكىنشى مارتە ماتچتان كەيىنگى پەنالتيگە جۇگىنۋگە تۋرا كەلدى. وندا «قىزىل فۋريانىڭ» باعى جاندى.
جۇما, 29 ماۋسىم 2012 6:40
بۇرناعى كۇنى پورتۋگاليا مەن يسپانيانىڭ اراسىندا وتكەن ءبىرىنشى جارتىلاي فينالدىق ويىننىڭ نەگىزگى جانە قوسىمشا ۋاقىتتارىندا ەسەپ اشىلمادى. سودان سوڭ وسى تۋرنيردە قاتارىنان ەكىنشى مارتە ماتچتان كەيىنگى پەنالتيگە جۇگىنۋگە تۋرا كەلدى. وندا «قىزىل فۋريانىڭ» باعى جاندى.
ماتچقا دەيىن. يسپانيا قۇراماسى وسىمەن قاتارىنان ەكىنشى رەت قۇرلىق چەمپيوناتىنىڭ فينالىنا شىعىپ وتىر. ەگەر وسىندا تاعى دا جەڭىسكە جەتەر بولسا, ول باسى سوناۋ وتكەن عاسىردىڭ 1960 جىلىنان باستالاتىن ەۋروپا بىرىنشىلىگىندە قاتارىنان ەكى رەت چەمپيوندىققا قول جەتكىزگەن ءبىرىنشى قۇراما بولار ەدى. ال مىنا كەزدەسۋدىڭ الدىندا ەكى جاق تا جەڭىستەن ءۇمىتتى ەكەندىكتەرىن جاسىرعان جوق. اسىرەسە, پاولۋ بەنتۋ باستاعان پورتۋگالدار ولىسپەي بەرىسپەيتىندەرىن الدەنەشە رەت ايتتى. وعان قاراعاندا ۆيسەنتە دەل بوسكە سابىر ساقتادى.
دەرەك. يسپانيا قۇراماسى بۇعان دەيىن ەكى رەت – 1964 جانە 2008 جىلدارى قۇرلىقتا ءبىرىنشى كوماندا اتانعان. ال پورتۋگاليا 2004 جىلى ءوز ەلىندە وتكەن دودانىڭ فينالىندا گرەكتەرگە جول بەرىپ قويدى. ونىڭ بۇدان وزگە ءىرى تابىسى جوق. بۇل قۇرامالار, ارعى جاعىن ايتپاعاندا, XXI عاسىردىڭ وزىندە ءوزارا بىرنەشە رەت كەزدەسىپ قويدى. ايتالىق, 2002 جانە 2003 جىلدارى بولعان جولداستىق كەزدەسۋلەردىڭ بىرىنشىسىندە يسپاندار 3:0 ەسەبىمەن جەڭىپ, ەكىنشىسىندە 1:1 دەگەن تەڭ ناتيجە تىركەلدى. ال 2004 جىلعى قۇرلىق چەمپيوناتىندا پورتۋگالدار 1:0 ەسەبىمەن باسىم ءتۇستى. سودان سوڭ 2010 جىلعى الەم بىرىنشىلىگىندە تاپ وسىنداي ەسەپپەن ۇتىلدى. مۇنىڭ ەسەسىنە, بۇلاردىڭ اراسىنداعى سوڭعى وتكەن جولداستىق كەزدەسۋدە پورتۋگاليا 4:0 ەسەبىمەن جەڭىسكە جەتتى.
ويىن. ايتسا ايتقانداي, پورتۋگالدار بۇل ماتچتا يسپاندارعا ءبىراز پروبلەما جاساپ بەردى. الاڭدا ءىس جۇزىندە تەپە-تەڭ ويىن ءجۇردى. مۇندا كوماندالار وتە ساق وينادى دەپ تە ايتا المايمىز. سوعان قاراماستان, قاۋىپتى ساتتەر مۇلدەم دەرلىك بولعان جوق. ءبىرىنشى تايمدا ەكى جاق جابىلىپ ءجۇرىپ, ەكى سوققى عانا جاسادى. ونىڭ ەكەۋىن دە پورتۋگالدار ۇردى. جالپى, ولار ماتچتى بەلسەندى باستادى. وزدەرىنىڭ وڭتايلى سول قاناتىمەن العا قاراي قيقۋلاي ۇمتىلعان ولار تەز بۇرىشتاما دوبىن سوعۋعا دا قول جەتكىزدى. ونى راۋل مەيرەلەش قاقپانىڭ ەندىگىنە تۋرالاپ جەتكىزىپ ەدى, يكەر كاسيلياس قاۋىپتى دوپتى قاقپادان اسىرىپ قانا تىنشۋ تاپتى. بۇدان كەيىن يسپاندار ۇدەرە كوتەرىلدى. ولاردىڭ وڭ قاناتتان وربىتكەن شابۋىلدارى الاڭنىڭ ورتاسىنان ءۇزىلدى. پورتۋگالداردىڭ ورتالىق قورعاۋشىسى پەپە قاقپا الاڭىنا كەلىپ قالعان فورۆارد الفرەدو نەرگەدونىڭ ءوزىنەن سىتىلىپ كەتۋىنە جول بەرمەدى. كەلەسى كەزەكتە قارسى شابۋىلعا شىعۋ ءمۇمكىندىگىن «سەلەساۋ» جاعى دا قۇر جىبەرمەدى. ەكى جاقتىڭ جورىقتارى وسىلاي كەزەك-كەزەك تولقىندانا وربىگەن ءبىرىنشى بولىك ەشبىر ناتيجەسىز اياقتالدى.
ەكىنشى تايمدا يسپاندار دوپقا كوبىرەك يەلىك ەتە باستادى. ولار وزدەرىنە ۇيرەنشىكتى فۋتبولعا كوشۋگە ۇمتىلىپ باقتى. پورتۋگالدار وسى تۇستا پرەسسينگتى ەداۋىر كۇشەيتتى. جالپى, ويىنشىلاردىڭ شارشاعانى بايقالعان بۇل كەزەڭدە شيەلەنىستى ساتتەر كوبەيە ءتۇستى. سولاردىڭ بىرىندە پورتۋگالداردىڭ ەكەۋگە تورتەۋ بولىپ شىققان ءساتىنىڭ ءوزى نەگە تۇرادى. الايدا, بۇل دا بوسقا كەتتى. بىراق ويىن اياعى جاقىنداعان سايىن ەكى جاقتىڭ دا ءوز قاقپالارىنىڭ امان قالۋ جاعىن كوبىرەك كۇيتتەيتىندەرى ءبىلىنىپ قالدى. سول ۇرگەدەك كوڭىل كۇي نەگىزگى ۋاقىتتان كەيىنگى ءۇشىنشى جانە ءتورتىنشى قوسىمشا تايمداردا دا اڭعارىلدى. بىرتە-بىرتە فۋتبولشىلاردىڭ كەزدەسۋدە جەڭىلگەنشە, پەنالتيدە باقتارىن سىناپ كورۋگە ىنتالى ەكەندىكتەرى ايقىندالا بەردى. بۇل ۋاقىتتارى يسپان تاكتيكاسىنا قارسى ويىندا بارلىق كۇش-قۋاتتارىن سارقىپ العان پورتۋگالداردىڭ شارشاپ قالعانى دا بايقالدى. مۇنى تيىمدى پايدالانعان يسپانيا قۇراماسى تىزگىندى ءوز قولىنا الدى. بۇعان قوسا ونىڭ ويىنشىلارى ەكەۋلەپ-ۇشەۋلەپ ءجۇرىپ, رونالدۋدىڭ ەركىن قيمىلداۋىنا مۇلدە مۇمكىندىك بەرمەي قويدى. وسىنىڭ رەتىندە اشىق قالعان ناني ءبارىبىر كريشتيانۋدەي ويناي المادى. مۇنىڭ ءبارى, اينالىپ كەلگەندە, «قىزىل فۋريانىڭ» دەسىن ارتتىرا ءتۇستى. بالكىم, «فۋتبول قۇدايى» سول شاقتاردا ەرەكشە ەكپىن العان باسىمدىعىن ىنتالاندىرعان دا بولار, ول ماتچتان كەيىنگى پەنالتيدە ۇستەم كورىندى. «سەلەساۋ» ساپىنان دوبىن قاقپا باعانىنا تيگىزگەن ءۇشىنشى ويىنشى – الۆەش «قىزىل فۋريانى» فينالعا دا شىعارىپ بەردى.
ءبىر قىزىعى, وسى جولى ءبىرىنشى رەت جەڭىلگەن جاقتىڭ ويىنشىسى ماتچتىڭ ۇزدىگى بولىپ تانىلدى. ول اتاققا جارتىلاي قورعاۋشى راۋل مەيرەلەش قول جەتكىزدى. پورتۋگاليا قۇراماسىنىڭ ۇزاق ۋاقىت بويى ورتالىق شەپكە ەگەلىك ەتۋلەرىندە وسى ويىنشىنىڭ ەڭبەگى زور بولدى.
ماتچتان كەيىن. «پورتۋگالدار كەرەمەت قورعانا ءبىلدى, – دەدى كەزدەسۋدەن كەيىن ۆيسەنتە دەل بوسكە. – بىزدە دە مۇمكىندىكتەر از بولعان جوق. سوندىقتان شايقاس بارىنشا تەڭ ءوتتى. بىزگە تەك ويىننان كەيىنگى ساتتىلىك كومەكتەستى. وسىعان وراي ءتۋرنيردى تاماشا ەتىپ وتكىزگەنى ءۇشىن پورتۋگاليا قۇراماسىن قۇتتىقتاعىم كەلەدى». پاولۋ بەنتۋ دە وسىعان ۇقساس سوزدەر ايتتى. ول بۇكىل پورتۋگاليا ەلى ءبىزدىڭ ويىنىمىزدى ماقتان تۇتاتىنىنا سەنىمدىمىن, دەگەن مازمۇنداعى ويىن جەتكىزدى.
ال كەشە تۇندە گەرمانيا مەن يتاليا اراسىنداعى ماتچتىڭ قورىتىندىسىمەن ەكىنشى فيناليستىڭ ەسىمى بەلگىلى بولدى. اقتىق ايقاس 1 شىلدە كۇنى كيەۆتە وتەدى.
سەرىك ءپىرنازار,
«ەگەمەن قازاقستان».