بەيسەنبى, 14 ماۋسىم 2012 7:08
12 ماۋسىم كۇنى الاڭعا ا توبىنىڭ كوماندالارى شىعىپ, ەكىنشى تۋردى باستاپ بەردى. ءبىرىنشى بولىپ گرەكيا-چەحيا قۇرامالارى بەتتەستى. مۇنىڭ سوڭىنان پولشا جانە رەسەي فۋتبولشىلارى كۇش سىناستى. ءبىرىنشىسى چەحتاردىڭ جەڭىسىن ايعاقتاپ, ەكىنشىسى بەيبىت تارقاسقان ويىندار توپتاعى جۇمباقتىڭ ءالى تولىق شەشىلمەگەنىن ءبىلدىردى.
بەيسەنبى, 14 ماۋسىم 2012 7:08
12 ماۋسىم كۇنى الاڭعا ا توبىنىڭ كوماندالارى شىعىپ, ەكىنشى تۋردى باستاپ بەردى. ءبىرىنشى بولىپ گرەكيا-چەحيا قۇرامالارى بەتتەستى. مۇنىڭ سوڭىنان پولشا جانە رەسەي فۋتبولشىلارى كۇش سىناستى. ءبىرىنشىسى چەحتاردىڭ جەڭىسىن ايعاقتاپ, ەكىنشىسى بەيبىت تارقاسقان ويىندار توپتاعى جۇمباقتىڭ ءالى تولىق شەشىلمەگەنىن ءبىلدىردى.
گرەكيا-چەحيا – 2:1. ماتچتاعى بارلىق ماسەلە دەمەگەندە دە, سونىڭ تۇگەلگە جۋىعى باستاپقى ەلەڭ-الاڭ شاقتا شەشىلىپ قويىلعانىنا قاراماستان, بۇل چەمپيوناتتاعى قىزىقتى كەزدەسۋلەردىڭ ءبىرى بولدى. ويىننىڭ 6 مينۋتىندا-اق الاڭنىڭ شارتتى قوناقتارى – چەحتار ەكى دوپ ايىرىمىمەن الدا كەلە جاتتى. ەسەپتى 3 مينۋتتا پەتر يراچەك اشتى, سوسىن 6 مينۋتتا ۆاتسلاۆ پيلارج «حالىقتىق كوماندانىڭ» باسىمدىعىن ودان ءارى نىعايتا ءتۇستى. ءبىر ايتارلىعى, گرەكتەر وسىمەن ەكىنشى ويىن قاتارىنان ءوز شايقاستارىنىڭ ءبىرىنشى بولىگىن قارسىلاستارىنا قارسىلىقسىز بەرىپ قويۋىمەن ەرەكشەلەندى. ونىڭ ۇستىنە, ەللادا جۇراعاتتارى ءحالىن نەگىزگى قاقپاشى كوستاس حالكياستىڭ كۇتپەگەن جەردەن جاراقات الىپ, ورنىن ميحاليس سيفاكيسكە بوساتىپ بەرۋى بۇرىنعىدان دا قيىنداتىپ جىبەردى.
وسىلاي ىركىلىپ ويناعان گرەكتەر تايم بىتۋگە جاقىن قالعان شامادا چەحتار داربازاسىنىڭ تورىن ءبىر ءدۇر سىلكىندىرىپ ءوتىپ ەدى. بىراق قاپتالداعى تورەشىنىڭ جالاۋ بۇلعاڭداتۋىمەن گول ەسەپكە الىنباي تاستالدى. مۇنىڭ ەسەسىنە كەلەسى تايمنىڭ دەبيۋتىندە فەرناندۋ سانتۋش شاكىرتتەرىنىڭ تەز جولدارى بولىپ كەتتى. مۇندا پەتر چەحتىڭ ورەسكەل قاتەلىگىن پايدالانا بىلگەن تەوفانيس گەكاس ءبىر دوپتىڭ قارىمتاسىن قايتارىپ ۇلگەردى. بۇدان ءارى ەللادا قىراندارى ەسەپتى تەڭەستىرۋگە جانتالاسا ۇمتىلدى. بىراق ولارعا بۇل كۇنى جەڭىلىستەن قۇتىلۋدىڭ ورايى كەلمەدى. جاعدايدى جاقسى پايىمداي بىلگەن چەحتار قارسىلاس كوماندانىڭ اپتىققان ارىنىن اقىرىن باسىپ وتىردى. ال كەزدەسۋدەن كەيىن چەحيا قۇراماسىنىڭ باس جاتتىقتىرۋشىسى ميحال بيلەك ءوزىنىڭ ويىن ناتيجەسىنە قاتتى قاناعاتتانعاندىق بىلدىرەتىنىن ايتتى.
پولشا-رەسەي – 1:1. بۇل ويىننىڭ قورىتىندى ناتيجەسىن ءار مامان ءارتۇرلى باعالادى. ولاردىڭ اراسىندا «ورىستار قولدا تۇرعان جەڭىسىنەن ايىرىلىپ قالدى» دەگەن ويعا ۇران قوسقاندار دا, «ۆارشاۆا ءبىتىم-شارتى جانعا جاعادى» دەپ كوڭىل كوتەرگەندەر دە بار. بىزدىڭشە, وسىنىڭ ەكەۋىندە دە دايەكتى دانەك كەزدەسەدى. بۇكىل كەزدەسۋ بويىنا پولياكتاردىڭ جالاڭ اتقا جايداق ءمىنىپ الىپ, تولاسسىز شابۋىل ۇستىندە جۇرگەنى دە, سونىڭ قاباتىندا رەسەيلىكتەردىڭ ايتارلىقتاي بايىپتى ءارى ويلى ويىن كورسەتە ءبىلگەندەرى دە شىندىق. اينالىپ كەلگەندە, وسى تەڭ ويىن ەكى جاقتىڭ ەڭسەسىن ەزە بەرمەيتىن كورنەكتى كورسەتكىش بولىپ شىققان سياقتى. ەڭ باستىسى, ەكى كوماندانىڭ دا شيرەك فينالعا شىعۋ ءمۇمكىندىكتەرى سول كۇيى ساقتالىپ قالدى.
تاعى ءبىر ايتا كەتەتىن ءجايت, بۇل ماتچ رەسەي قۇراماسىنىڭ قوسىنىنداعى وزەكتى ماسەلەلەردىڭ دە شەتىن شوكەلەپ شىعارىپ كەتتى. الدىمەن پولياكتار وسىنىڭ الدىندا چەحتار ۇستاتپاعان تىزگىندى بەرىپ, ولاردى دوپقا باقىلاۋ جاساپ وتىرۋعا ءماجبۇر ەتتى. وزدەرى بولسا, قورعانىستىڭ سوڭعى بۋىنىن تاس ءتۇيىن ەتىپ بەكىتىپ الىپ, وعان دەيىنگى كەڭىستىكتى اشىپ تاستادى. وسىعان وراي ديك ادۆوكاتتىڭ جىگىتتەرى بويلارىندا كۇش-جىگەرلەرى تاسىپ تۇرعان ءبىرىنشى تايمنىڭ ونە-بويىندا سول قورعاندى بۇزىپ-جارىپ وتۋگە ءبىرنەشە رەت ارەكەت جاساپ باقتى. بۇل ەكى ورتادا پيششەك-بلاششيكوۆسكي تاندەمىنىڭ وقتا-تەكتە سۋىلداعان قارسى شابۋىلدارى بولماسا, پولياكتار جاعى قارسىلاستارىن اسا ءبىر قيىن جاعدايعا قالدىرا قويمادى. ال زىمىرانداي زىرعىعان الەكساندر كەرجاكوۆتىڭ, ەكىنشى تولقىنمەن ەكپىندەي كەلەتىن الان دزاگوەۆ پەن اندرەي ءارشاۆيننىڭ, ارتقى تۇپكىردەن تۇرە شاباتىن يۋري جيركوۆتىڭ ارقاسىندا پولياكتار الاڭى ارا-تۇرا بورىككەن قويدىڭ قوتانىنداي دۇرلىگىپ قالىپ جاتتى. مۇنداي ويىننىڭ گول سوعۋعا دا ءمۇمكىندىك بەرەتىنى اقيقات ەدى.
تاپ سولاي ستاندارتتى جاعدايدا الان دزاگوەۆ تاعى دا جارق ەتە ءتۇستى. اندرەي ءارشاۆيننىڭ قيالاي تاستاعان دوبىنا تالاسا-تارماسا ۇمتىلعان ەكى جاق ويىنشىلارى اراسىندا وسى جاس شابۋىلشىنىڭ باسى بارىنەن ەپتىرەك قيمىلدادى. ودان سىدىرا ۇشقان دوپقا پشەمىسلاۆ تىتون جەتە المادى. قول سوزىم جەردەن وتە شىققان سنارياد قاقپاشىنىڭ سول جاق بۇرىشىنا بارىپ توپ ەتە قالدى. گول! الايدا, رەسەيلىكتەردىڭ بۇدان كەيىن دە ەسەپتى ۇلعايتۋعا ىڭعايلارى بولىپ ەدى. بىردە كەرجاكوۆتىڭ سوققىسى ايدالاعا كەتتى, بىردە جيركوۆ پاس جەتكىزۋدە سىلبىرلىق كورسەتتى. تاعى بىردە تورەشى الاڭ يەلەرىنىڭ شيرەك فينالعا شىعۋ مۇمكىندىكتەرى بىردەن تومەن ءتۇسىپ كەتپەگەنىن قالاعانداي تىرلىك جاسادى. ايتالىق, ونىڭ بىرەر رەت پولياكتار قاقپاسىنا پەنالتي بەلگىلەۋىنە ابدەن بولاتىن ەدى.
كەزدەسۋدىڭ وسى تۇسىندا الاڭ يەلەرى دە گول سوعۋدىڭ بىرنەشە مۇمكىندىگىن جىبەرىپ الدى. ورىستاردىڭ قورعانىس شەبىن لەۆاندوۆسكي بىرنەشە رەت كوكتەي وتە شىقتى. ونى توقتاتۋعا يگور دەنيسوۆ ۇلگەرە الماي قالسا, سەرگەي يگناشەۆيچ كومەككە ازەر ۇلگەرىپ ءجۇردى. اراسىندا مالافەەۆ قۇتقارىپ تۇردى. ۇزىلىستەن كەيىن رەسەيلىكتەر شابۋىلشىلارىنىڭ شارشاپ قالعاندارى انىق بايقالدى. مۇنى سەزىنگەن پولياكتار بۇرناعىدان دا ورشەلەنە العا ۇمتىلدى. ناتيجەسىندە ولاردىڭ قاۋىپتى جۇبى ەڭىستەن سالسا, توسكە وزاتىن تارلاندىعىن تانىتتى. اۋەلى ارشاۆين جيركوۆقا ءدال پاس بەرە الماي قالدى. ونى ءىلىپ العان بلاششيكوۆسكي ءوزىنىڭ ءارىپتەسىمەن بىرگە العا قاراي زاۋلادى. سول پاتىمەن جۇگىرىپ كەلە جاتىپ دوپ ۇرعان ياكۋب ونى مالافەەۆ قورعاعان قاقپانىڭ وڭ جاق بۇرىشىنا سولق ەتكىزدى. وسىلايشا پولياكتاردىڭ ءاۋ باستان مىقتى سانالعان وڭ قاناتى ءوزىن ءوزى اقتاپ شىقتى. بۇدان كەيىن دە ەكى جاقتىڭ ەسەپتى وزگەرتەتىن مۇمكىندىكتەرى بولدى. بىراق قارسىلاستار ودان ءتيىستى ناتيجە شىعارا المادى. اقىر سوڭىندا ەكى جاق بەيبىت تارقاسۋعا كەلىسكەندەي سىڭاي تانىتتى.
ۇلكەن تالاسپەن كەلگەن بۇل تەڭ ويىن 4 ۇپايمەن رەسەيدى ءبىرىنشى ورىندا قالدىرا بەرسە, ەكىنشى ساتىعا 3 ۇپايلى چەحيا كوتەرىلدى. ال پولياكتاردا – 2, گرەكتەردە 1 ۇپاي بار. بۇل جاعداي كەلەسى كەزەڭگە ءالى وسى تورتتىكتىڭ قاي-قايسىسى دا تالاسا الاتىنىن بىلدىرەدى.
كەشە كەشكە دانيا – پورتۋگاليا, گەرمانيا – گوللانديا قۇرامالارى اراسىنداعى ويىندارمەن ەكىنشى تۋردىڭ ويىندارى جالعاسىن تاپتى. بۇلاردىڭ الدىڭعىسىندا كەزدەسۋ 3:2 ەسەبىمەن پورتۋگاليانىڭ پايداسىنا شەشىلدى.
سەرىك ءپىرنازار,
«ەگەمەن قازاقستان».
_________________
ويلار, پىكىرلەر, كوزقاراستار
يواحيم لەۆ, گەرمانيا قۇراماسىنىڭ باس جاتتىقتىرۋشىسى: – مەن جەڭىسكە جەتكەن قۇرامدى وزگەرتپەۋ كەرەك دەگەن قاعيداتتى بارلىق ۋاقىتتا بىردەي ۇستانا بەرمەيمىن. سوندىقتان گوللانديامەن ماتچتىڭ ستارتتىق قۇرامىندا بىرقاتار وزگەرىستەر ورىن الىپ قالۋى ابدەن مۇمكىن. مەن ءاردايىم توسىن نارسەلەر جاساۋعا قۇمارمىن. ال ميروسلاۆ كلوزەنىڭ جاراقاتىنان ايىعا باستاعانى قاتتى قۋانتادى. ول ساۋىققان كەزىندە الەمدىك دەڭگەيدەگى ويىنشى بولىپ شىعا كەلەدى. دەمەك, وعان كوپ ءۇمىت ارتامىز.
مورتەن ولسەن, دانيا قۇراماسىنىڭ باس جاتتىقتىرۋشىسى: – مەن ءبىزدىڭ قۇرامانىڭ ءدال قازىرگىدەي جاقسى قاقپاشىلارعا تولى بولعان كەزىن ەسىمە تۇسىرە المايمىن. بۇل, ارينە, جاقسى. الداعى ويىنداردا ونىڭ پايداسى تيمەسە, زالالى بولمايدى. ال 2008 جىلدان بەرى پورتۋگاليامەن 4 رەت كەزدەسىپپىز. سولاردىڭ ەكەۋىندە ءبىز, بىرەۋىندە قارسىلاستارىمىز جەڭگەن. بۇل جولعىسىن بىلمەيمىن. بىراق ءبىز قالاي دەگەندە دە توپتان شىعۋعا كۇش سالامىز.
ماتە دەبيۋشي, فرانتسيا قۇراماسىنىڭ قورعاۋشىسى: – مەن انگليامەن بولعان تەڭ ويىننىڭ ناتيجەسىن وڭدى دەپ ەسەپتەيمىن. وسى ويىننىڭ قالاي باستالعانىن ءبىر ءسات ەسكە ءتۇسىرىپ كورەيىكشى. سول كەزدە ءبارى تۇسىنىكتى بولا تۇسەدى. العاشقى 20 مينۋتتا ءبىز ءوزىمىزدى ءوزىمىز جوعالتىپ الدىق. سودان كەيىن عانا ەس جيدىق. سوندىقتان تەڭ ويىن – ءادىل كورسەتكىش. دەگەنمەن, ءالى ەشتەڭە جوعالتا قويعان جوقپىز. الداعى ەكى ماتچ ءبىزدىڭ تاعدىرىمىزدى ءتيىمدى شەشەدى عوي دەپ ويلايمىن.
________________
ماتچ مينياتيۋرالارى
* سەيسەنبى كۇنى چەمپيوناتتىڭ ا توبىندا ەكىنشى تۋردىڭ ەكى ويىنى وينالدى. ولاردى ستاديوننان 96 950 ادام تاماشالادى. ال بىرىنشىلىك باستالعالى بەرگى كورەرمەن سانى 472 245-كە جەتىپ وتىر.
* ەكى ويىندا 5 گول سوعىلدى. بۇل كورسەتكىش ءار ويىندا ورتا ەسەپپەن 2,5 گول سوعىلعان كورسەتكىشتى ساقتاپ قالدى. جالپى, بىرىنشىلىك باستالعالى قاقپاشىلار ءوز قاقپالارىنان 25 رەت دوپ الىپ شىقتى.
* بىرىنشىلىكتىڭ مەرگەندەر ساپىنا تاعى دا وزگەرىس ەندى. ونى 3 گولمەن رەسەي قۇراماسىنىڭ شابۋىلشىسى الان دزاگوەۆ باستادى. سول سياقتى چەح ۆاتسلاۆ پيلارج ەكىنشى گولىن سوقتى. ودان باسقا ۋكراين اندرەي شەۆچەنكو, حورۆات ماريو ماندجۋكوۆيچ ەكى دوپتىڭ اۆتورى بولىپ وتىر. بۇل كۇنى 1 دوپ سوققاندار قاتارىنا چەح پەتر يراچەك, پولياك ياكۋب بلاششيكوۆسكي قوسىلدى. بۇلاردان باسقا تاعى 9 ويىنشىدا 1 گولدان بار.
* بۇل كۇنى چەحتار توماش روسيتسكي, پەتر يراچەك, گرەكتەر ۆاسسيليس توروسيديس, ديميتريس سالپينگيديس, پولياكتار روبەرت لەۆاندوۆسكي, ويگەن پولانسكي, رەسەيلىكتەر يگور دەنيسوۆ, الان دزاگوەۆ ەسكەرتۋ الدى.
* تورەشىلەر بىرىنشىلىك باستالعالى بەرى 2 ويىنشىنى الاڭنان قۋىپ, 32 ويىنشىعا ەسكەرتۋ بەردى.
* ۇزدىك ويىنشى اتاعىنا پەتر يراچەك (چەحيا), ياكۋب بلاشيكوۆسكي (پولشا) يە بولدى.
________________
دەرەكتەر مەن دايەكتەر
* ۋەفا حورۆاتيا قۇراماسىنا قارسى ءىس كوتەرمەكشى. وسى حالىقارالىق ۇيىمنىڭ رەسمي سايتى حابارلاعانداي, بۇل يرلاندياعا قارسى ويىن كەزىندە وسى ەل جانكۇيەرلەرىنىڭ جاساعان بەيباستاقتىقتارىنا بايلانىستى بولماق. حورۆات فاناتتارى ماتچ كەزىندە پەتارد اتىپ, فەيەرلەر جاققان.
* اندرەي شەۆچەنكو جول وقيعاسىنا ۇرىنىپ قالدى. شۆەتسيامەن بولعان ماتچتان كەيىن ايەلى كريستەن پازيكپەن بىرگە ۇيىنە قايتىپ كەلە جاتقان فۋتبولشىنىڭ ماشينەسىنە ءبىر دجيپ كەلىپ سوعىلعان. وقيعا بولعان جەردە تىسقا شىققان فۋتبولشىنى جانكۇيەرلەر قورشاپ الىپ, قولتاڭبالار بەرۋگە ءماجبۇر ەتىپتى.