سەيسەنبى, 11 قىركۇيەك 2012 7:37
كەيىنگى ءوسىپ كەلە جاتقان جاس بۋىننان گۇلجاھان عاليەۆا دەگەن كىسى كىم دەپ سۇراپ كورىڭىزشى, بىلە مە ەكەن؟ قازاقتىڭ اياۋلى ءبىر قىزىنىڭ اتىندا نە كوشەنىڭ, نە بىردە-ءبىر مادەنيەت وشاعىنىڭ بولماۋى نەلىكتەن؟
سەيسەنبى, 11 قىركۇيەك 2012 7:37
كەيىنگى ءوسىپ كەلە جاتقان جاس بۋىننان گۇلجاھان عاليەۆا دەگەن كىسى كىم دەپ سۇراپ كورىڭىزشى, بىلە مە ەكەن؟ قازاقتىڭ اياۋلى ءبىر قىزىنىڭ اتىندا نە كوشەنىڭ, نە بىردە-ءبىر مادەنيەت وشاعىنىڭ بولماۋى نەلىكتەن؟
قاسيەتتى قازاقتىڭ قارا ءسوزىنىڭ قۇدىرەتىنە تابىنباۋ مۇمكىن ەمەس قوي. قازاقتا «ءسوز سۇيەكتەن وتەدى» دەگەن ناقىل بار. وسى تامسىلدەن ءتالىم تۇيسەك, ءبىر اۋىز ءسوزدى قادىرلەگەن حالىقتىڭ مۇنى ىقىلىم زاماننان باستى قۇندىلىعى رەتىندە قۇرمەت تۇتا بىلگەنىن باعامداۋعا بولادى. ءيا, ءسوز ارقىلى ءبىز ءبىر-ءبىرىمىزدى ۇعىنىسىپ, ويىمىزدى جەتكىزىپ, پىكىر الماسامىز. ادامزات اتاۋلى قاي كەزدە دە ءوزىنىڭ ۇشقىر قيالىن, وي-ارمانىن, تىلەك-ماقساتىن, كوڭىلىندەگى كوكەيكەستى قۇپيا سىرلارىن, قۋانىشى مەن رەنىشىن, كۇيىنىشى مەن ءسۇيىنىشىن ءسوز بايلىعى ارقىلى جەتكىزىپ وتىرعان. سوندىقتان دا بولار حالىق دانالىعىنىڭ: «ونەر الدى – قىزىل ءتىل» دەيتىنى. قازاق حالقى ءتىلدىڭ قادىر-قاسيەتىن بارىنشا باعالاي بىلگەننەن دە, «تۇمەن ءسوزدىڭ ءتۇيىنىن, ءبىر سوزبەن كەلتىر ءيىنىن», «ونەرپاز بولساڭ ارقالان» دەپ, ماقالداعان. ءتىل ارقىلى, ءسوز ارقىلى حالقىمىزدىڭ سان-سالالى اسىل مۇرالارى بۇگىنگى زامانعا ءدىن-امان جەتىپ, رۋحاني ازىعىنا اينالۋدا. ولار: حالىق اۋىز ادەبيەتى, اۆتورلىق ادەبيەت, دانالىق, شەشەندىك سوزدەر, قيسسا-داستاندار, ەپوستار, باتىرلار جىرى, تۇرمىس-سالت جىرلارى, تولعاۋلار, ارناۋلار, ولەڭدەر, ماقال-ماتەلدەر ت.ب.. دەمەك, پوەزيا, پروزا جانرلارى سالالارىنىڭ بارلىعى دەرلىك حالىق شىعارماشىلىعىندا ورىن الادى. بۇلاردىڭ حالىق اراسىنا كەڭ تاراۋىنا ءبىرىنشىدەن, اۆتوردىڭ ءوزى سەبەپشى بولسا, ەكىنشىدەن, قالىڭ بۇقارا قاۋىمنىڭ اراسىنان شىققان ءانشىلەر, اقىن-جىراۋلار, اۋىلدىڭ التى اۋىز ونەرپازدارى بارىنشا ۇلەس قوسقان.كورنەكى ونەردىڭ كۇردەلىسى دە, كورىكتىسى دە – ءسوز ونەرى. ەندىگى جەردە اڭگىمە كاسىبي تۇرعىدا «كوركەم ءسوز جانرى» ونەرىنىڭ نەگىزىن قالاۋشى, ونىڭ كورنەكتى ءۋاكىلى, كوركەم ءسوزدىڭ شەبەرى قر حالىق ءارتىسى گۇلجاھان عاليەۆا (قاليەۆا) اپايىمىز تۋرالى بولماق.بالالىق شاق… وتكەن عاسىردىڭ الپىسىنشى جىلدارىنىڭ ەكىنشى جارتىسىندا باتىس قازاقستان وبلىسىنىڭ ورتالىعى ورالعا, الماتىدان گاسترولدىك ساپارمەن سول كەزدىڭ وزىندە اتاقتى «گۇلدەر» ءان-بي جاستار ءانسامبلى كەلە جاتىر دەگەن حابار حالىقتى ءدۇر سىلكىندىردى. مۇنداي ۋاقيعا وبلىس كولەمىندە ايتارلىقتاي جاڭالىق بولدى. اۋدان ورتالىعى شىڭعىرلاۋ ورال قالاسىنان 250 شاقىرىم بولسا, شالعاي جاتقان شارۋاشىلىقتار توعىز جول تورابىنان دا الىس, اۋدان ارقىلى جول ارالىعى كەم دەگەندە 370 شاقىرىم بولاتىن. وسى حاباردى ەستىگەن ءبىزدىڭ اۋداننىڭ جۇرتشىلىعى تايلى-تۇياعى قالماي, تايعا تالاسىپ ءمىنگەسكەندەي, جولداعى كولىككە ىلىككەندەرى جول شالعايلىعىنا قاراماستان ورال قالاسىن بەتكە الىپ, اعىلدى-اي كەپ. بۇل كورىنىس رەسپۋبليكا ءمادەنيەت سالاسىنداعى ەرەكشە ەستە قالاتىن قۇبىلىس-تىن. قالاعا بارىپ كونتسەرت تاماشالاپ كەلگەندەردىڭ ايتۋىنشا, مۇنداعى سول كەرەمەتتەر بەينە ءبىر اڭىز-ەرتەگى بولىپ كورىنەتىن. ايتۋشىلار جاعى ەرەن ەڭبەك تىندىرىپ كەلگەندەي مارقاياتىن. ءبىلمەككە ءبىز الگىلەرگە قۇلاق توسىپ ءاۋرەمىز. سونداعى ەستىگەندەرىمىز كورگەندەردىڭ اسەرىنەن اسىپ ءتۇسىپ جاتاتىن. ونەر شاراسىن تاماشالاعان ادام باقىتتى ەدى. سويتسەك, كەيىن ەستي كەلە ولاردىڭ 1965 جىلى الماتىدا «قازاقكونتسەرت» ءبىرلەستىگىنىڭ جانىنان قازاق كسر حالىق ءارتىسى گۇلجاھان عاليەۆانىڭ باسشىلىق ەتۋىمەن تۇڭعىش رەت اشىلعان رەسپۋبليكالىق ەسترادا جانە تسيرك ونەرى ستۋدياسىنىڭ تۇلەكتەرى ەكەنىن بىلدىك. ءبىراز جىلداردان كەيىن ءوزىم دە وسى وقۋ ورنىنىڭ تۇلەگى اتاناتىنىم ءتىپتى ءۇش ۇيىقتاسام تۇسىمە كىرمەگەن. بىراق سول كەزدەگى الماتىعا بارىپ كەلىپ, بولماسا وقىپ جۇرگەن اعا بۋىن اۋىلداستارىمىزدىڭ ايتۋلارىنا قاراعاندا, الماتى شىنىندا دا الەمنىڭ جەتى عالاماتىنىڭ ءبىرى «اسپالى باقتاي» بولىپ كورىنەتىن. بالاۋسا بالعىن جاستاعى بىزدەر بولساق سونى ەلتي تىڭداپ, كادىمگىدەي قيالعا قۇلاش ۇراتىنبىز. ءاسىرەسە, اسىرە اڭگىمەشىلەردىڭ «كوشەدە كەلە جاتىپ, المانى ءۇزىپ ال دا, اۋىزىڭا سالىپ جۇرە بەر», دەپ قيىنىن قيىستىرىپ ايتۋلارى تاڭعالدىراتىن. الپىسىنشى جىلداردىڭ اياعىندا اۋىلداس اپامىز قالامپىر راقىموۆانىڭ وسى وقۋ ورنىنا ءتۇسۋى قيالىمىزعا جان ءبىتىرىپ, ودان بەتەر قاناتتاندىرا ءتۇستى. ويىمنىڭ ىسكە اسىپ, ارمانىمنىڭ ورىندالار ءساتى دە كەلىپ جەتتى.بۇل 1973 جىلدىڭ جازى بولاتىن. ەلىمىزدىڭ جەر-جەرلەرىنەن ارمان ىزدەپ, ونەرگە قانات قاققان جاستار كراسين كوشەسى 78-دە ورنالاسقان رەسپۋبليكالىق ەسترادا جانە تسيرك ونەرى ستۋدياسىندا باس قوستىق. الدىمىزدان ورتا جاس شاماسىنداعى, مويىلداي قاپ-قارا شاشىن توبەسىنە ءتۇيىپ, كەلىستى كيىنگەن, ءجۇزى جىلى شىرايلى, سىمباتى وزگەلەردەن ءبولەك قاراتورى اپاي شىققانى ەسىمدە. وقىپ جۇرگەندە اعا-اپالارىمىزدىڭ: «الماتىداعى ادەمى ارۋلاردىڭ ءبىرى شارا بولسا, ەكىنشىسى گۇلجاھان اپامىز ەدى», دەگەندەرىن ءوز باسىم تالاي رەت ەستىگەنمىن. الگى كىسى سىزىلتىپ, نەبىر سيقىرلى اۋەزدى ۇنىمەن جينالعانداردى باۋراپ تا, جاۋلاپ تا الدى. قازاقستاننىڭ حالىق ءارتىسى, اتىشۋلى رەسپۋبليكالىق ەسترادا جانە تسيرك ونەرى ستۋدياسىنىڭ تۇڭعىش ۇيىمداستىرۋشىسى, ديرەكتورى كوركەم ءسوزدىڭ شەبەرى گۇلجاھان عاليەۆا اپامىزبەن تانىسۋىمىز وسىلاي باستالعان ەدى.سونداعى بىزگە ايتقان العاشقى اڭگىمەسى بىلاي باستالدى: «شىراقتارىم, بالالارىم, ءبىزدىڭ وقۋ ورنىنا قوش كەلدىڭدەر! مۇندا بار-جوعى ەكى-اق جىل وقيسىڭدار. الدارىڭىزدا وسى ستۋديانى وقىپ ءبىتىرىپ كەتكەن اعا-اپالارىڭ سياقتى سەندەر دە بەلگىلى ادامدار بولاسىڭدار», دەگەنى. ولاي دەيتىن سەبەبى دە, جوق ەمەس-ءتىن. ويتكەنى, ءوزى قۇرعان «گۇلدەر» ءانسامبلىنىڭ مۇشەلەرى بۇل كەزدە رەسپۋبليكا كولەمىندە ءوز ونەرلەرىن كەڭىنەن پاش ەتىپ, حالىقتىڭ قوشەمەتىنە بولەنىپ ۇلگەرگەن ەدى. ول كەزدە الماتىدا پ.ي.چايكوۆسكي اتىنداعى كوللەدج (وقۋ مەرزىمى 4 جىل), كونسەرۆاتوريانىڭ ەكى جىلدىق دايىندىق كۋرسى بار-تۇعىن. ءسويتىپ, گۇلجاھان اپايدىڭ ۇگىت-ناسيحاتىنىڭ ارقاسىندا قالاعا كەلگەن جاستار ستۋديانىڭ سۋ جاڭا ستۋدەنتى بولىپ شىعا كەلدىك. العاش اشىلعاندا وقۋ ورنىنىڭ الدىنداعى نەگىزگى ماقسات وبلىستىق فيلارمونيالارعا, الماتى كونتسەرتتىك ۇجىمدارىنا جەكە-سوليستەر دايارلاۋ بولسا, بۇل مىندەتتى مۇنداعىلار تولىعىمەن ابىرويمەن اتقاردى دەي الامىز. ەكى جىلدىڭ ىشىندە ماماندىقتىڭ قاي سالاسىندا بولسىن اجەپتاۋىر اۋىزعا ىلىگەتىن ورىنداۋشىلىق دەڭگەيگە جەتۋ وڭاي شارۋا ەمەس ەكەنى بەلگىلى. الايدا, مۇنداي جەتىستىكتەرگە گۇلجاھان اپاي باستاعان اعا-اپالارىمىزدىڭ ارقاسىندا جەتكەنىمىزدى ەشقاشان ەستەن شىعارعان ەمەسپىز. بۇگىنگى ۇرپاق الدىندا ءبىر كەزدەرى ءبىزدەرگە ءتالىم-تاربيە بەرگەن قازاق كسر حالىق ءارتىستەرى ج.ەلەبەكوۆ, ع.قۇرمانعاليەۆ, پروفەسسورلار ب.جىلىسباەۆ, ق.مۇحيتوۆ, ح.تاستانوۆ, ك.كەنجەتاەۆ, ن.ءشارىپوۆا, س.ءشارىپوۆ, ن.تەمىرحانوۆا, ن.ناۆروتسكايا, ت.ب. ەسىمدەرىن ماقتان تۇتۋدان تالعان ەمەسپىز. وقۋ مەكەمەسىنىڭ قىسقا مەرزىم ىشىندە ايتارلىقتاي تابىسقا جەتۋى اتالمىش ابزال جانداردىڭ ارقاسىندا بولاتىن. ءويتكەنى, بۇلاردىڭ بارلىعى دەرلىك كونسەرۆاتوريادا, تەاتردا, ودان قالسا, بەلگىلى كونتسەرتتىك ءبىرلەستىكتەردە, جوعارى كاسىبي دەڭگەيدە ىستەيتىن شەبەر ماماندار بولاتىن. ولار دومبىرا, ءداستۇرلى ءان, بي, ۆوكال, تسيرك ونەرى, كوركەم ءسوز جانرى سياقتى پاندەردەن ساباق الدى. 1965 جىلدان باستاپ اتالمىش وقۋ ورنى كوپتەگەن ساحنا شەبەرلەرىن دايارلادى. ولاردىڭ اراسىندا حالقىمىزعا بەلگىلى گ.تالپاقوۆا, ءا.ەڭكەباەۆ, ق.بايبوسىنوۆ, ج.كارمەنوۆ, ق.بەكبوسىنوۆ, ق.راحيموۆا, ر.تاجىباەۆ, ت.ب. ەسىمدەر بار. وسى ماماندىقتار بويىنشا 1973-1975 جىلدارى وقىعان مەنىڭ زامانداستارىمنىڭ كوبى ءبۇگىندە ەلىمىزگە تانىمال ونەر يەلەرى. ولاردىڭ قاتارىندا م.مۇكامانوۆ, ع.مۇحامەدين, ت.راحيموۆ, ءا.سارسەنباەۆ, م.وتارباەۆ, ح.توپەەۆ, ق.يمەنوۆ, ب.قۇرمانعوجاەۆ, قادىر, تورعىن قاشقاباەۆتار, ب.سازابەكوۆ, ك.بايعاراەۆ, ب.سامەدينوۆا, م.وماروۆا د.ايمانوۆ سياقتى ت.ب. كەيىنگى تولقىن جاستارمەن ۇزاراتىن ءتىزىمدى شۇبىرتا جالعاستىرا بەرۋىمە بولادى.گۇلجاھان عاليقىزىنىڭ ءوز جۇمىسىنا بەرىلگەندىگى سونشالىق تۇلەكتەرىنىڭ بارلىعىن قامقور قاناتىنىڭ استىنا الىپ جۇرەتىن. سونداي تۇلەكتەردىڭ ءبىرى مەن ەدىم. وقۋدى بىتىرگەندە ماعان اپايدىڭ: «الماتىدا قالدىرىپ, قالاعان كونتسەرتتىك بىرلەستىككە جەكە ورىنداۋشى (سوليست) ەتىپ ورنالاستىرامىن, وسى جىلى ءۇيدى دە الىپ بەرۋگە كومەگىمدى اياپ قالمايمىن, ازىرگە بىراق تەك ماعان وقۋىمدى ءارى قاراي جالعاستىرام دەگەندى ايتپا», دەگەنى انالىق مەيىرىممەن تەڭ ءسۇيىسپەنشىلىگى بولاتىن. وسى ويدى مەنىڭ جەتەكشىم, پروفەسسور ق.مۇحيتوۆقا دا ايتىپ, قولقا سالعان كورىنەدى. مىنە, سول جىلداردان بەرى ارادا زۋلاپ قانشاما جىلدار ءوتىپتى. بۇگىندە ءوزىمىز دە الدىمىزدان سانداعان شاكىرت ۇشىرىپ وتىرعان ۇستازعا اينالدىق. ەس ءبىلىپ, ەتەك جاپقان ىرگەلى ەل بولعانىمىزعا جيىرما جىلدان اسىپ بارادى. قازاق حالقى ءومىرىنىڭ تال بەسىكتەن جەر بەسىككە دەيىنگى كەزەڭىن قاشاندا تارازىلاپ, كەشەگىسى مەن بۇگىنگىسىن باجايلاپ وتىراتىن ەجەلدەن دانالىعىمەن دارالانعان ەل ەكەنىن تاريحتان بىلەمىز. بۇگىنگى ۇرپاق كوڭىل كونشىتەر نە بار دەپ سۇراي قالسا, ارينە, شۇكىرشىلىك ەتەر جايىمىز مول شىعار. الايدا ادامزات بالاسىنىڭ ومىرىندە قۋانىشىمەن قوسا, كوڭىلگە كىربىڭ ءتۇسىرەر ءجايتتەر دە كەزدەسپەي تۇرمايدى. ول دا ءبىر ءومىردىڭ زاڭدىلىعى بولىپ ەسەپتەلسە كەرەك. ەلىنە ەڭبەك ەتىپ, كەلەر ۇرپاققا ءتالىم-تاربيە بەرىپ, ونەرگە باۋلىعان ۇستازدار ءومىرىنىڭ كەيبىر تۇستارى اتالىپ جاتقانمەن, ال ەندى كەيبىرەۋلەرىنىڭ جاساعان قىرۋار ەڭبەگىن ۋاقىتتىڭ كوشكىن قۇمى جاۋىپ قالىپ جاتاتىنى جانعا باتادى. اتى-جوندەرى كوپ اۋىزعا ىلىكپەي, تاسادا قالىپ قويعانداي سەزىلەدى. حالقىنىڭ ونەرى مەن مادەنيەتى ءۇشىن توككەن تەرى, ەڭبەگى لايىقتى باعاسىن الىپ ۇلگەرمەگەن تارىزدەنەدى. ءتىرشىلىك بولعان سوڭ, ءتۇرلى جاعدايلار ورىن الىپ جاتادى عوي. كەي تۇلعالاردىڭ وزدەرى دۇنيەدەن وزعانمەن ارتىنداعى ىزدەۋشىلەرىنىڭ ارقاسىندا ءجيى-ءجيى ەسىمدەرى ەسكە الىنىپ جاتاتىنى تاعى شىندىق. ولاردىڭ اتى كوشەگە, مەكتەپكە, مادەنيەت وشاقتارىنا بەرىلۋى سول كىسىنى حالقىنىڭ ارداقتاۋى ءىسپەتتى كورىنەدى. ۇلان-اسىر دۇركىرەتىپ توي وتكىزەدى. وسىندايدا بىزدەر ۇستازدارىمىزدىڭ الدىنداعى پارىزىمىزدى وتەي الدىق پا دەگەن ويعا قالامىز. پارىز عانا ەمەس, مۇنى ءتىپتى ءاربىرىمىزدىڭ قارىزىمىز دەسەك, ارتىق ايتقاندىق بولا قويماس. ەڭسەنى ءزىل باتپان وي قايىستىرعاندا, قايران اعالار-اي, قايران اپالار-اي, دەپ سەن ءۇشىن ءومىرىن اياماعان اياۋلى جاندار بەينەسىنە سابىرسىز ۇڭىلۋگە تۋرا كەلەدى. سولاردىڭ ەڭبەگى ءتيىستى ءدارەجەدە اتالسا دەگەن نيەتپەن قولىما ادەيى قالام الدىم. گۇلجاھان اپامىز وسىنداي ەلى قانشا قۇرمەت كورسەتسە دە كوپتىك ەتپەيتىن ەرەكشە جان. ءبىر كەزدەرگى ەلىنىڭ ەركەسى, بۇگىندە تۋعان جۇرتى ەڭبەگىنە, ارۋاعىنا تاعزىم ەتۋگە ءتيىس سول اپامىزدىڭ ەسىمىن نەگە جوعارى كوتەرە الماعانبىز دەپ ويلانامىن كەيدە.اكەسى ناۋبەت زامانىندا ەلىنە قايىرىمدىلىق جاساۋىمەن ەستە قالعان, كەيىن ستاليندىك قۋعىن-سۇرگىنگە ۇشىراعان, ال ءوزى جاستايىنان جەتىمدىكتىڭ تاقسىرەتىن تارتىپ وسكەن, بىراق تا تەكتىلىگىنىڭ ارقاسىندا, سوناۋ ماسكەۋدەگى گيتيس-ءتى وقىپ بىتىرگەن ءازىز جاندى قالاي اسپەتتەسەك تە جاراساتىن جاقسى ىستەرى وتە كوپ. تۇلپاردىڭ تۇياعىنداي, التىننىڭ سىنىعىنداي گۇلجاھان اپامىزدىڭ ءومىردەگى, ونەردەگى تاعدىرى ءالى تالاي ارنالى اڭگىمەگە ارقاۋ بولا بەرەرىنە سەنەمىن. مەن سول بۇلاق ويدىڭ كوزىن ءتۇرتىپ اشۋدى عانا ويلادىم. ءوزى تالاي ءسۇيسىنگەن الاتاۋىنىڭ ەتەگىندەگى سىڭعىرلاعان سىرلى سازدىڭ سيقىرى تولىق اشىلماعانمەن, تۇلعانىڭ وزىنە لايىق تۇعىرىن ءىزدەۋگە تالپىندىم.ەلىمىزدەگى كوپتەگەن مادەنيەت وشاقتارى مەن ونەر ۇجىمدارىنىڭ قۇرىلۋ تاريحى تىكەلەي وسى كىسىنىڭ ەڭبەگىمەن بايلانىستىرىلادى. ناقتىلاپ ايتساق, گۇلجاھان اپامىزدىڭ مۇرىندىق بولۋىمەن 1965 جىلى رەسپۋبليكالىق ەسترادا ءجانە تسيرك ونەرى ستۋدياسى, 1969 جىلى «گۇلدەر» ءان-بي جاستار انسامبلى, 1970 جىلى الماتى مەملەكەتتىك تسيركى اشىلسا, قازاقستان كولەمىندە وبلىس فيلارمونيالارىنا «كوركەم ءسوز شەبەرلىگى جانرى» بويىنشا ماماندار دايارلاۋعا دا العاش سەبەپشى بولعان وسى تۇلعا. حالقىنىڭ رۋحاني يگىلىگىنە وسىنشاما قىرۋار مۇرا قالدىرعان ەسىمنىڭ سانادان ءبىرتىندەپ كومەسكى تارتا باستاۋى ەلدىگىمىز بەن كەڭدىگىمىزگە نۇقسان كەلتىرەتىن ءمىن دەپ ەسەپتەيمىز. سول سەبەپتى جوعىمىزدى تاۋىپ, بارىمىزدى باعالاپ جاتقان تاۋەلسىزدىگىمىزدىڭ بەلەسىندە ونەرگە ءومىرىن ارناعان مۇنداي تاعدىرلارعا تاعزىم ەتىپ, تاۋداي تۇلعاسىن بيىكتەتەر بولساق, مۇنىڭ كەيىنگى ءوسىپ كەلە جاتقان وسكەلەڭ ۇرپاق ءۇشىن دە ۇلكەن ونەگە مەكتەبى بولارى حاق.قازاقستاننىڭ حالىق ءارتىسى گۇلجاھان عاليەۆانىڭ ەسىمىن ۇلىقتاۋ ماقساتىندا ج.ەلەبەكوۆ اتىنداعى ونەر كوللەدجىندە «كوركەم ءسوز وقۋ شەبەرلىگى جانرى» بويىنشا گ.عاليەۆانىڭ كلاسى قالپىنا كەلتىرىلسە, ونىڭ اتىنداعى رەسپۋبليكالىق كوركەم ءسوز وقۋ شەبەرلەرىنىڭ بايقاۋى ۇيىمداستىرىلسا, قازۇوۋ-دە «كوركەم ءسوز شەبەرلىگى جانرى» بويىنشا گ.عاليەۆانىڭ كلاسى اشىلسا, الماتىداعى دوستىق داڭعىلىنداعى «ءۇش الىپ» اتالاتىن گ.عاليەۆانىڭ تۇرعان ۇيىنە مەموريالدىق تاقتا ورناتىلسا, كۇننەن كۇنگە رۋحاني ساۋلەتى اسقاقتاي ءتۇسكەن ەلوردامىزداعى ءبىر كوشەگە, جاڭادان بوي كوتەرگەن ونەر وشاقتارىنىڭ, بولماسا كونتسەرتتىك ۇجىمداردىڭ ءبىرىنە ەسىمى بەرىلسە, «كوركەم ءسوز وقۋ شەبەرلىگى» جانرى بويىنشا گ.عاليەۆانىڭ شىعارماشىلىق كەشتەرى ءوتىپ, ونىڭ ءومىرى مەن ونەرى جايىندا ەستەلىك كىتاپتار جارىق كورسە قانداي عانيبەت بولار ەدى. الماتى مەملەكەتتىك «گۇلدەر» ءان-بي انسامبلى قازاق كسر حالىق ءارتىسى گ.عاليەۆانىڭ ەسىمىنە سۇرانىپ-اق تۇرعانداي. تۇرپاتى تۇنىق تۇلعاعا دەگەن بۇل حالقىنىڭ تۇرعىزعان رۋحاني ەسكەرتكىشى ءھام ءبارىمىزدىڭ پارىزىمىز بەن قارىزىمىزدىڭ وتەلگەنى بولار ەدى.ورىنباي دۇيسەن,قازاقستاننىڭ ەڭبەك سىڭىرگەن قايراتكەرى.