«تۇركى ينتەگراتسياسىنىڭ ارحيتەكتورى» كىتابىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ تۇركى الەمىندەگى ءرولىن تولىقتاي اشاتىن بىرقاتار مەملەكەت باسشىلارىنىڭ, تانىمال ساياساتتانۋشىلار مەن ساراپشىلاردىڭ, عالىمدار مەن زيالى قاۋىم وكىلدەرىنىڭ پايىمدى پىكىرلەرى مەن ورامدى ويلارى توپتاستىرىلعان.
«ەلوردا ەپوپەياسى» باسىلىمى ەل تاۋەلسىزدىگىنىڭ نىشانى – قازاقستاننىڭ ەلورداسىنىڭ 20-جىلدىعىنا وراي شىعارىلعان. بۇل كىتاپقا «ەگەمەن قازاقستان» رەسپۋبليكالىق گازەتىنىڭ ءار جىلدارداعى سانىندا نۇر-سۇلتان قالاسىنىڭ قالىپتاسۋىن قازاقستان مەن شەت ەلدىڭ كورنەكى ساياسي جانە قوعام قايراتكەرلەرىنىڭ كوزىمەن ايشىقتاعان جاريالانىمدار ەنگىزىلدى.
ءىس-شاراعا قازاقستان رەسپۋبليكاسى اقپارات جانە قوعامدىق دامۋ مينيسترى داۋرەن اباەۆ, قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆ, قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى ءامىرحان راحىمجانوۆ, حالىقارالىق تۇركى اكادەمياسىنىڭ پرەزيدەنتى, «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالى, قازاقستان رەسپۋبليكاسى پارلامەنتى ءماجىلىسىنىڭ دەپۋتاتى فاحريددين قاراتاەۆ, ءازىربايجان رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى راشاد ماممادوۆ, قىرعىز رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى جەەنبەك قۋلۋباەۆ, بەلگىلى مەملەكەت جانە قوعام قايراتكەرلەرى, وتاندىق جانە شەتەلدىك عالىمدار, مەملەكەتتىك ورگاندار مەن ساراپشىلىق قوعامداستىق وكىلدەرى قاتىستى.
تۇساۋ كەسەر بارىسىندا «تۇركى ينتەگراتسياسىنىڭ ارحيتەكتورى» بەينەفيلمى كورسەتىلدى.
- جاقسى كىتاپ – جاننىڭ ازىعى. ەكى تۋىندىنىڭ دا بىزدەر ءۇشىن دە, كەلەشەك ۇرپاق ءۇشىن دە ماڭىزى ەرەكشە. «تۇركى ينتەگراتسياسىنىڭ ارحيتەكتورى» باسىلىمىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ءتۇبى ءبىر تۇركى حالىقتارىن ءوزارا جاقىنداستىرۋداعى ىقپالى تۋرالى مول ماعلۇمات بار. ەلباسىنىڭ كوشباسشىلىق قاسيەتتەرى مەن ماڭىزدى قادامدارعا بارۋداعى دانالىق قىرى تولىق اشىلعان. ... ال «ەلوردا ەپوپەياسى» باسىلىمىندا قازاق ەلىنىڭ باس شاھارى, جاقىندا عانا اتاۋى نۇر-سۇلتان بولىپ وزگەرگەن استانامىز تۋرالى كوپتەگەن مەملەكەت جانە قوعام قايراتكەرلەرىنىڭ, كورنەكى ساراپشىلار مەن كاسىبي مامانداردىڭ جۇرەكجاردى پىكىرلەرى توپتاستىرىلعان. ەلباسىمىز «استانا – وتانىمىزدىڭ جۇرەگى, تاۋەلسىزدىگىمىزدىڭ تىرەگى», - دەيدى. سوندىقتان, ەلوردامىزدى قانشا ناسيحاتتاساق تا – جاراسىمدى, - دەدى د.اباەۆ.
- تۇركى ينتەگراتسياسى تۋرالى ءسوز قوزعاساق, ەڭ الدىمەن, ساياسي تۇرعىدا – تۇركى دۇنيەسىنىڭ بىرلىگى, ىنتىماعى, الەۋمەتتىك-ەكونوميكالىق سالادا بىرلەسە جۇمىس ىستەي الۋى تۋرالى ايتامىز. ال, زيالى قاۋىم ءۇشىن اتالعان تاقىرىپقا جاۋاپتى بۇگىن تۇساۋى كەسىلەتىن «تۇركى ينتەگراتسياسىنىڭ ارحيتەكتورى» تۋىندىسى بەرەرى ءسوزسىز. الاشورداشىل ارىستارىمىزدىڭ تۇركىستان رەسپۋبليكاسىن قۇرۋ تۋرالى قيال-ارمانى - ەلباسىمىزدىڭ ۇلكەن باستاماسىنىڭ ارقاسىندا جۇزەگە استى. ونىڭ شىنايىلىعىنا - بارلىعىمىز كۋامىز, - دەدى ءوز سوزىندە ج.تۇيمەباەۆ.
- ەڭ باستىسى, بۇگىن تۇساۋى كەسىلەتىن ەكى كىتاپتىڭ باستى كەيىپكەرى – تەك قازاقستان ءۇشىن عانا ەمەس الەمنىڭ قازىرگى تاريحىنداعى كەمەڭگەر تۇلعا نۇرسۇلتان نازارباەۆ. بۇگىن وقىرماندارىنا جول تارتقالى وتىرعان كىتاپتار قازاقستان كوشباسشىسىنىڭ كوپقىرلى قايراتكەرلىگىنىڭ ەكى باعىتىنا ارنالعان. ونىڭ ءبىرى - ەلباسىمىزدىڭ بارشا تۇركى حالىقتارىنىڭ باسىن بىرىكتىرىپ, باۋىرلاس تۇركى ەلدەرىمەن قارىم-قاتىناستى نىعايتۋعا سىڭىرگەن ەرەن ەڭبەگى بولسا, ال ەكىنشىسى – جالپى قازاقتىڭ تاريحىندا العاش رەت مەملەكەتىنىڭ استاناسىن تاڭداپ قانا قويماي, اۋىستىرۋ تۋرالى شەشىم قابىلدانعانىمەن, بىراق ونىڭ ورىندالۋىنا سەنە قويماعان كوپتىڭ كۇمانىن جوققا شىعارىپ, سارىارقاعا تاۋەلسىز ەلىمىزدىڭ قاسيەتتى ءتورى, قۇتتى مەكەنى, ەل تىرەگى – نۇر-سۇلتاندى سالىپ بەرۋى, - دەپ اتاپ ءوتتى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى, ساياسي عىلىمدارىنىڭ دوكتورى, پروفەسسور ا.راحىمجانوۆ.
تۇساۋكەسەردە ءسوز سويلەگەن دەپۋتات ف.قاراتاەۆ, ەلشىلەر - ر.مامادوۆ پەن ج.كۋلۋباەۆتار ەلباسىمىزدىڭ تۇركى الەمىنىڭ تانىلعان ليدەرى جانە تۇركى ينتەگراتسياسىنىڭ ناعىز ارحيتەكتورى ەكەندىگى تۋرالى پىكىرلەرى, سونداي-اق ن.ءا.نازارباەۆتىڭ تۇركى ەلدەرىنىڭ اراسىنداعى دوستىق جانە باۋىرلاستىقتى قۇرۋداعى ۇلەسىنە بەرگەن جوعارى باعالارى ءبىر جەردەن شىقتى.
- بىلتىر ەلوردامىزدىڭ 20 جىلدىعىنا وراي ەل گازەتى «ەگەمەندە» 280-نەن استام ماقالا, سۇحبات, ساراپتاما, ەستەلىك جارىق كورگەن ەدى. ولاردىڭ قاتارىندا ەلباسىمەن بىرگە استانانىڭ قاداسىن قاعىسقان, ەلوردانىڭ قالىپتاسۋىنا ۇلەس قوسقان تۇلعالارمەن بىرگە كوپتەگەن شەت ەلدىك مەملەكەت قايراتكەرلەرى دە بولدى. بۇگىنگى نۇر-سۇلتاننىڭ داستانىن جازعان بۇل ماقالالاردى «ەلوردا ەپوپەياسى» دەپ توپتاستىردىق. ال «تۇركى ينتەگراتسياسىنىڭ ارحيتەكتورى» دەپ اتالاتىن ەكىنشى كىتابىمىزعا نەگىزىنەن تامىرلاس, باۋىرلاس ەل باسشىلارى, كورنەكتى مەملەكەت قايراتكەرلەرىنىڭ ارنايى جازعان ماقالالارى مەن ەستەلىكتەرى جيناقتالدى... بارشاڭىزعا بەلگىلى, تۇركى اكادەمياسىنىڭ ۇيىتقى بولۋىمەن, كاسىبي زەرتتەۋ توبى ءۇش جىلدان بەرى تۇركىتىلدەس مەملەكەتتەردە الەۋمەتتىك ساۋالناما جۇرگىزىپ كەلەدى. وسى زەرتتەۋلەردە ءارتۇرلى ەلدەردىڭ ازاماتتارى ءبىر اۋىزدان ەلباسىن تۇركى دۇنيەسىنىڭ ەڭ تانىمال تۇلعاسى رەتىندە تانىپتى. بىلتىر تانىمال جۋرناليست كۇرشاد زورلۋ جۇرگىزگەن زەرتتەۋىندە ن.ءا.نازارباەۆتىڭ تۇركيادا ينتەرنەتتە ەڭ كوپ قارالعان تۇلعا ەكەنىن انىقتاعان. بۇل زەرتتەۋلەردىڭ ناتيجەسى ەلباسىنىڭ تۇگەل تۇركىنىڭ تۇتقاسى ەكەنىن ايگىلەپ تۇرعانى انىق!, - دەگەن د.قىدىرالى ءوز كەزەگىندە مينيستر د.اباەۆقا, بارلىق اۆتورلارعا جانە ءا.راحىمجانوۆ ارقىلى ەلباسى كىتاپحاناسىنىڭ ۇجىمىنا كىتاپتى باسىپ شىعارۋدا قولداۋ كورسەتكەندەرى ءۇشىن ريزاشىلىعىن ءبىلدىردى.
ءىس-شارا اياقتالعاننان كەيىن قوناقتار ءۇشىن ەلباسى كىتاپحاناسى بويىنشا ەكسكۋرسيا جۇرگىزىلدى.