ساپار بارىسىندا پارتيا توراعاسى نۇرسۇلتان نازارباەۆتىڭ «قۇتتى مەكەن» پارتيالىق جوباسىن جۇزەگە اسىرۋ ماقساتىندا «نۇرلى جول», «نۇرلى جەر» تۇرعىن ءۇي قۇرىلىسى مەملەكەتتىك باعدارلامالارى اياسىندا سالىنىپ جاتقان كوپقاباتتى تۇرعىن ءۇيدىڭ قۇرىلىسىمەن تانىستى.
جامبىل وبلىستىق قۇرىلىس باسقارماسىنىڭ باسشىسى جايىقباي شالداروۆ №15 مولتەك اۋدانىنداعى 80 پاتەرلى تۇرعىن ءۇي قۇرىلىسى 2018 جىلى قاراشا ايىندا باستالعانىن, باس مەردىگەر – «اگرومامانداندىرىلعان قۇرىلىس» جاۋاپكەرشىلىگى شەكتەۋلى سەرىكتەستىگى ەكەنىن ايتىپ ءوتتى. سونىمەن قاتار, 5 قاباتتى كوپپاتەرلى تۇرعىن ءۇي اعىمداعى جىلى شىلدە ايىندا پايدالانۋعا بەرىلەدى دەپ جوسپارلانعانىن دا جەتكىزدى.
«Nur Otan» پارتياسى جامبىل وبلىستىق فيليالى پارتيالىق باقىلاۋ كوميسسياسىنىڭ توراعاسى اباي نۇرجانوۆ, تاراز قالاسى اكىمىنىڭ مىندەتىن اتقارۋشى بەيسەنبەك جانبوسىنوۆ وتكەن جىلى «نۇرلى جەر» مەملەكەتتىك باعدارلاماسىن ىسكە اسىرۋ ماقساتىندا رەسپۋبليكالىق بيۋدجەتتەن جالعا بەرىلەتىن تۇرعىن ءۇي قۇرىلىسىنا 1 ميلليارد 406 ميلليون 511 مىڭ تەڭگە, وبلىستىق بيۋدجەتتەن 164 ميلليون 245 مىڭ تەڭگە قاراجات ءبولىنىپ, «اراي» تۇرعىن القابىندا جانە «بايتەرەك» مولتەك اۋدانىندا جالپى تۇرعىن ءۇي الاڭى 14 مىڭ شارشى مەتردى قۇرايتىن 3 تۇرعىن ءۇي, ياعني 240 پاتەر پايدالانۋعا بەرىلگەنىن اتاپ ءوتتى. نەسيەگە بەرىلەتىن تۇرعىن ءۇي قۇرىلىسىنا 4 ميلليارد تەڭگەدەن اسا قاراجات ءبولىنىپ, №15 مولتەكاۋداندا 80 پاتەرلى 10 تۇرعىن ءۇيدىڭ قۇرىلىس جۇمىستارى باستالىپ, 9 ءۇي پايدالانۋعا تاپسىرىلعان. جالپى وتكەن جىلى 12 كوپقاباتتى تۇرعىن ءۇي, ياعني 960 پاتەر پايدالانۋعا بەرىلگەن. ال, №15 مولتەكاۋدانداعى 80 پاتەرلى 9 تۇرعىن ءۇيدىڭ قۇرىلىسى بىلتىرعى جىلى قاراشا ايىندا باستالىپ, بيىلعى تامىز ايىندا اياقتالادى دەپ جوسپارلانىپ وتىر. بۇل قۇرىلىسقا جالپى قۇنى 5 ميلليارد تەنگەدەن اسا قارجى قاراستىرىلعان بولاتىن.
جامبىل وبلىسى