وقۋشىلار سارايىندا بيۋدجەتتىك سالا قىزمەتكەرلەرىنىڭ قاتىسۋىمەن وتكەن باسقوسۋدا گ.ءابدىقالىقوۆا ەلباسى نۇرسۇلتان نازارباەۆ Nur Otan پارتياسىنىڭ ءحVىىى سەزىندە الەۋمەتتىك سالالالاردى جانداندىرۋعا مۇمكىندىك بەرەتىن باسىم باعىتتاردى ايقىنداپ بەرگەنىن, حالىقتىڭ كۇنكورىسى تومەن ساناتىنىڭ تابىسىن ارتتىرۋعا, جالاقىنى كوتەرۋگە, تۇرعىن ءۇي ماسەلەسىن شەشۋگە, الەۋمەتتىك قىزمەت ساپاسىن نىعايتۋعا ەرەكشە ەكپىن تۇسىرىلگەنىن اتاپ كورسەتتى.
ايماق باسشىسى قۇمار اقساقالوۆ وبلىستا الەۋمەتتىك كومەك 6700 بالاعا بەرىلەتىنىن, مۇگەدەك بالا تاربيەلەپ وتىرعان 2 مىڭعا جۋىق وتباسى, 6764 كوپ بالالى انا اتاۋلى كومەك الاتىنىن جەتكىزدى. وبلىس ورتالىعىندا 535 ەسكى ءۇي ءسۇرىلىپ, 2 مىڭنان استام پاتەر مەن الەۋمەتتىك نىساندار تۇرعىزىلدى. كوپبەيىندى اۋرۋحانا, دارىگەرلەر ءۇشىن 200 پاتەرلىك تۇرعىن ءۇي, 2400 ورىندىق 3 مەكتەپ, ستۋدەنتتەرگە ارناپ 1932 ورىندىق 5 جاتاقحانا سالىنادى. الداعى جىلدارى الەۋەتتى 302 ەلدى مەكەندە 3 مىڭ باسپانا بوي كوتەرەدى. كوپ بالالى انالاردىڭ باسپاناعا مۇقتاجدىعى ەسكەرىلىپ, بيىل 226 پاتەر سالىنادى.
ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ ۇكىمەت تاراپىنان قابىلدانعان قولداۋ شارالارىن كەڭىنەن ءتۇسىندىردى. ەڭ باستى جاڭالىقتاردىڭ ءبىرى, اتاۋلى الەۋمەتتىك كومەك تاعايىندالعان كەزدە وتباسىنىڭ جيىنتىق تابىسىنان كوپ بالالى وتباسىلارعا جانە «التىن القا», «كۇمىس القا» توسبەلگىلەرىمەن ماراپاتتالعان كوپ بالالى انالارعا بەرىلەتىن مەملەكەتتىك جاردەماقىلار, سونداي-اق مۇگەدەكتىگى بويىنشا بەرىلەتىن جاردەماقىلار الىپ تاستالىنادى.
ءبىلىم جانە عىلىم ءمينيسترى كۇلاش ءشامشيدينوۆا تومەن جالاقىنى ەسەپتەۋگە ارنالعان كوەففيتسيەنتتەردىڭ جاڭا كەستەسى ەنگىزىلگەنىن, بۇل بويىنشا ءبىرىنشى ماۋسىمنان باستاپ ەڭبەكاقىنى الا باستايتىنىن جەتكىزدى. وقۋشىلاردى ءبىلىم بەرۋدىڭ جاڭارتىلعان جۇيەسىمەن وقىتاتىن مۇعالىمدەرگە دە ۇستەمەاقى قوسىلادى. دەنساۋلىق ساقتاۋ ءمينيسترى ەلجان ءبىرتانوۆ 200 مىڭنان استام مەديتسينا قىزمەتكەرلەرىنىڭ جالاقىسى وسەتىنىن, مۇنىڭ ءوزى جوعارى ءبىلىمدى كادر تاپشىلىعىن جويۋعا سەپتەسەتىنىن العا تارتسا, قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى مارحابات جايىمبەتوۆ جەڭىلدىكتى زاەمدار ارقىلى جايلى باسپاناعا يە بولۋ, وعان قاتىسۋ قۇقىقتارى مەن نەسيەلەر بەرۋ شارتتارىن, اۋىلدارعا ساپالى ءتىرشىلىك ءنارىن جەتكىزۋ, جولداردى قالپىنا كەلتىرۋ جايىن العا تارتتى.
بىلتىر وبلىستا 12200 تۇراقتى جۇمىس ورنى پايدا بولدى. قابىلدانعان شارالار ەڭبەك نارىعىنداعى تۇراقتىلىقتى ساقتاۋعا, جۇمىسسىزدىق دەڭگەيىن 4,8 پايىزعا تومەندەتۋگە ىقپال ەتتى. بيىلدان باستاپ 144 مىڭ سولتۇستىكقازاقستاندىقتىڭ, ونىڭ ىشىندە 43 مىڭ بيۋدجەتتىك سالا قىزمەتكەرىنىڭ ەڭبەكاقىسى مولايدى. بەس الەۋمەتتىك باستاما اياسىندا 719 ادام كاسىپكەرلىككە تارتىلدى. 546 ادامعا 130 ميلليون تەڭگەنىڭ قايتارىمسىز نەسيەسى ءبولىندى. كەشەندى جوسپارعا سايكەس 2021 جىلعا دەيىن 14 مىڭ جاڭا جۇمىس ورىندارى اشىلىپ, 300 ميلليارد تەڭگەنىڭ 48 جوباسى ىسكە قوسىلادى.
كيروۆ اتىنداعى زاۋىتتا قالا, اۋدان اكىمدەرىنىڭ, ءىرى ونەركاسىپ ديرەكتورلارىنىڭ, بيزنەس, كاسىپوداق وكىلدەرىنىڭ قاتىسۋىمەن وتكەن جيىندا پرەمەر-مينيستردىڭ ورىنباسارى قوس تاراپتىق ەڭبەك قاتىناسىن جانداندىرۋ, الەۋمەتتىك ماسەلەلەردى باستى نازاردا ۇستاۋ قاجەتتىگىن ايرىقشا اتاپ ءوتتى.
اكىمدىكتە وتكەن جيىندا «ءماڭگىلىك ەل جاستارى – يندۋسترياعا» باعدارلاماسىنىڭ ورىندالۋ جايى تالقىلاندى. گۇلشارا ناۋشاقىزى ەڭبەك كۇشى تاپشى, دەموگرافيالىق احۋالى كۇردەلى, بالا تۋ كورسەتكىشى تومەن تەرىسكەي ايماقتاردا ىشكى-سىرتقى كوشى-قون ۇدەرىسى, بىلىكتى ماماندار دايارلاۋ وزەكتى ەكەنىن, وسى سەبەپتى ەلىمىزدىڭ وڭتۇستىك وڭىرلەردەگى جاستارىن وقىتىپ, ماماندىق العاننان كەيىن وسى جاقتا جۇمىسقا ورنالاستىرۋدى ءدىتتەيتىن «سەرپىن-2050» باعدارلاماسى 2014 جىلدان قولعا الىنعانىن, باعدارلاماعا قاتىسۋشىلارعا تولىق جاعداي جاسالعانىن ايتتى. بۇگىندە بەس وبلىستان كەلگەن 1,5 مىڭعا جۋىق سەرپىندىك جاس وبلىستا بىلىمدەرىن جالعاستىرۋدا.
ۇكىمەت باسشىسىنىڭ ورىنباسارى ءتيىستى ورىندارعا حالىققا جاسالاتىن الەۋمەتتىك قولداۋدى باسەڭدەتپەۋدى جۇكتەپ, بىرقاتار مىندەتتەر بەلگىلەدى.
سولتۇستىك قازاقستان وبلىسى