«ەليزابەت تۇرسىنباەۆانىڭ الەمدىك دودالاردا جەڭىپ العان ءۇش بىردەي كۇمىس مەدالى ءبىزدىڭ ەڭسەمىزدى كوتەرىپ تاستادى. ليزا «ءتورت قۇرلىق چەمپيوناتى» مەن ۋنيۆەرسيادا ويىندارىندا, سونداي-اق, جىلدىڭ ەڭ باستى سپورتتىق وقيعاسى – الەم بىرىنشىلىگىندە تۇعىردان كورىندى. بۇل ءبىز ءۇشىن ۇلكەن جەتىستىك! ودان بولەك, تۇرسىنباەۆا ايەلدەر اراسىنداعى مانەرلەپ سىرعاناۋ سپورتىنىڭ تاريحىندا تۇڭعىش رەت تورتتىك سالحوۆتى ورىندادى. ءتورت اينالىم سالحوۆ وتە قيىن ەلەمەنت. بۇعان دەيىن رەسمي جارىستاردا ونى ەشكىم ورىنداعان جوق. ياعني, ايەلدەر ورىنداپ كەلگەن ەڭ اۋىر ەلەمەنت ءۇش جارىم اينالىمدىق اكسەل بولاتىر. ايتسە دە, ليزا ءوزىنىڭ ناعىز كۇرەسكەر ءارى باتىل ەكەنىن كورسەتىپ, مانەرلەپ سىرعاناۋ سپورتىنىڭ تاريحىنا ەندى. ول ءوزىن دالەلدەدى», - دەيدى ۋزۋروۆا.
باس باپكەر ەلىمىزدە تۇرسىنباەۆادان بولەك تالانتتى جاستاردىڭ ءوسىپ كەلە جاتقانىنا باسا نازار اۋداردى.
«قىزدار اراسىندا الانا توقتاروۆا ەسىمدى تالانتتى سپورتشىمىز بار. زاگرەبتە وتكەن حالىقارالىق تۋرنيردە ۇزدىك ۇشتىككە ەندى. ازىرگە ول ءالى جاس, دەگەنمەن, قيىن ەلەمەنتتەردى ورىنداۋىمەن كوزگە ءتۇسىپ ءجۇر. ونىڭ باعدارلاماسىندا ءۇش اينالىم كاسكاد تا بار. الانانىڭ بولاشاعىنان ۇلكەن ءۇمىت كۇتەمىز. سونداي-اق, جاسوسپىرىمدەر اراسىندا ەرەكشەلەنەتىن ماريا گرەچانايانى دا اتاپ وتكىم كەلەدى. تاپ وسى قىزىمىز جاسوسپىرىمدەر اراسىنداعى الەم چەمپيوناتىندا مىقتىلارمەن يىق تىرەستىرۋى مۇمكىن. جالپى العاندا, ايەلدەر اراسىنداعى مانەرلەپ سىرعاناۋ باسەكەسىندە ايتارلىقتاي رەزەرۆ بار», - دەيدى باس جاتتىقتىرۋشى.
ەرلەر اراسىنداعى مانەرلەپ سىرعاناۋ سىنىندا دەنيس تەن سەكىلدى بىردەن كوزگە تۇسەتىن سپورتشىلار ازىرگە جوق. الايدا, راحات برالين مەن نيكيتا مانكو كەلەشەكتە جوعارى ناتيجەمەن قۋانتادى دەگەن ءۇمىت باسىم.
«راحات برالين جاسوسپىرىمدەر اراسىندا باق سىناۋدا. ال مانكو ەرەسەتەر اراسىندا ءوتتى. نيكيتانىڭ «ءتورت قۇرلىق چەمپيوناتىنا» جولداما الىپ, ەركىن باعدارلامادا ونەر كورسەتكەنىنىڭ ءوزى ۇلكەن جەڭىس. ال برالين جاسوسپىرىمدەر اراسىنداعى الەم چەمپيوناتىنا قاتىسادى دەپ جوسپارلاپ وتىرمىز», - دەدى قۇرالاي ۋزۋروۆا.
سونداي-اق, قۇرالاي ۋزۋروۆا ەليزابەت تۇرسىنباەۆانىڭ بۇرىنعى باپكەرىنە قايتا ورالۋىنا قاتىستى دا پىكىر ءبىلدىردى.
«شىنى كەرەك, ەليزابەتتىڭ قايتا ورالعانىنا قۋانىشتىمىز. ويتكەنى, ەتەري تۋتبەريدزەنىڭ قولاستىنا كەلگەلى ول وتە ءساتتى ماۋسىم وتكىزدى. ليزا مانەرلەپ سىرعاناۋداعى العاشقى قادامىن سول تۋتبەريدزەدەن باستاعان. دەمەك, رەسەيدەگى مانەرلەپ سىرعاناۋ مەكتەبى وعان جاقىن. سوندىقتان, بۇرىنعى باپكەرىنە قايتا ورالعانى جاقسى بولدى. ءبىر عانا ماۋسىم ىشىندە ول ەلەمەنتتەردى تۇراقتى تۇردە ورىنداپ, باعدارلاما ساپاسىن دا جاقسارتتى. ەركىن باعدارلامانى جاڭارتىپ, 4 اينالىم سالحوۆتى قوستى. «ءتورت قۇرلىق چەمپيوناتى» مەن ۋنيۆەرسيادا ويىندارىندا اتالعان ەلەمەنتتى ورىنداۋ بارىسىندا ليزا قۇلاپ قالدى. بىراق سونىڭ وزىندە بۇل تۇعىردىڭ ەكىنشى ساتىسىنان كورىنۋگە مۇمكىندىك بەردى. تۇرسىنباەۆانى كىشكەنتاي كەزىنەن بەرى بىلەمىن. ول وتە باتىل جانە كۇرەسكەر قىز. ونىڭ ۇستىنە, ەتەري سەكىلدى مىقتى باپكەردىڭ قولىنا ءتۇستى. سول سەبەپتى, ودان ەندى تەك جەڭىس كۇتەمىز. ليزانىڭ ارقاسىندا كەلەسى جىلعى الەم چەمپيوناتىنا ءۇش كۆوتا جەڭىپ الدىق. مۇنىڭ ءبارى ەلىمىزدە مانەرلەپ سىرعاناۋ سپورتىنىڭ كەڭىنەن تارالۋىنا ۇلەس قوسۋدا», - دەيدى باس باپكەر.
الداعى ماۋسىمدا قازاقستاندىق مانەرلەپ سىرعاناۋشىدار جاسوسپىرىمدەر مەن ەرەسەكتەر اراسىنداعى الەم چەمپيوناتىندا ءساتتى ونەر كورسەتۋدى جوسپارلاپ وتىر.