27 ءساۋىر كۇنى سۋ دوبىنان ايەلدەر كوماندالارى اراسىندا رەسەي كۋبوگىنىڭ فينالدىق كەزەڭى باستالادى. اتالعان سىنعا قاتىسۋ ءۇشىن قازاقستان كومانداسى 21 ءساۋىر كۇنى رەسەيگە ۇشىپ كەتەدى دەپ حابارلايدى Olympic.kz.
بۇل تۋرالى قۇرامانىڭ باس باپكەرى الان بالفانباەۆ مالىمدەدى.
«قازىرگى تاڭدا كوماندا مۇشەلەرى تاراز قالاسىندا وقۋ-جاتتىعۋ جيىنىن وتكىزۋدە. 21 ءساۋىر كۇنى دايىندىقتىڭ سوڭعى كەزەڭىن وتكىزۋ ءۇشىن زلاتوۋستقا ۇشىپ كەتەمىز. رەسەي كۋبوگى اياقتالعان سوڭ, ەلگە ورالىپ, جاتتىعۋدى جالعاستىرامىز. ماۋسىنىڭ 15-30 ارالىعىندا رەسەي ۇلتتىق قۇراماسىمەن بىرلەسكەن جيىن وتكىزۋدى جوسپارلاپ وتىرمىز. 2020 جىلدىڭ اقپان ايىندا وليمپيادا ويىندارىنا ايماقتىق ىرىكتەۋ ءتۋرنيرى ءبىزدىڭ ەلىمىزدە وتەدى. سول سىندا ليتسەنزياعا تالاساتىن بولامىز», - دەدى بالفانباەۆ.
ەسكە سالا كەتەيىك, سۋ دوبىنان رەسەي كۋبوگىن ۇزدىك سەگىز كوماندا ساراپقا سالادى. سونداي-اق, سۋ دوبىنان ايەلدەر قۇراماسى 12-28 شىلدە كۇندەرى كۆاندجۋدا وتەتىن الەم چەمپيوناتىنا قاتىسادى.