بۇل تۋرالى جۋىردا كوپبالالى انالارمەن كەزدەسۋدە ەلوردالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا مالىمدەدى.
كەزدەسۋگە سونداي-اق, قالالىق كاسىپكەرلەر پالاتاسى ادامي كاپيتالدى دامىتۋ ءبولىمىنىڭ باستىعى جانار تورەبەكوۆا, بيزنەستى قارجىلاي ەمەس قولداۋ ءبولىمىنىڭ ساراپشىسى دانيار مونتاەۆ, قالالىق جۇمىسپەن قامتۋ ورتالىعى ديرەكتورىنىڭ ورىنباسارى دانيار نۇرپەيىسوۆ, جۇمىسپەن قامتۋ جانە الەۋمەتتىك قورعاۋ باسقارماسىنىڭ ءبولىم باسشىسى ايگۇل نۇرەكەنوۆا, ينۆەستيتسيالار جانە كاسىپكەرلىكتى دامىتۋ باسقارماسى ءبولىم باسشىسىنىڭ مىندەتىن اتقارۋشى ادىلەت تىلەپوۆ قاتىستى.
زيۋار جۇمانوۆا, اقگۇل تۇرعانباەۆا جانە نازگۇل بايماعانبەتوۆا 80 كوپبالالى انالاردىڭ اتىنان ءوتىنىش ءبىلدىرىپ وتىرعاندىقتارىن ايتا كەلىپ, ولارعا جۇمىسقا ورنالاسۋ مۇمكىندىگىن بەرۋ تۋرالى ۇسىنىس ايتتى. ايتۋلارىنشا, ۇيىمنىڭ قۇرامىنا كىرۋگە نيەت بىلدىرگەن كوپتەگەن ايەلدەردىڭ جاسى 40 شاماسىندا, تۇرمىسقا جاس كەزىندە شىققاندىقتان ولاردىڭ باسىم بولىگىنىڭ ءبىلىمى دە, ەڭبەك ءوتىلى دە جوق. ولار «انالار مەن ايەلدەر وداعىن» قۇرۋعا نيەتتى.
بەلسەندىلەر كوپبالالى ايەلدەر مەن ولاردىڭ بالالارى بوس ۋاقىتىن پايدالى وتكىزە الاتىن الاڭ اشقىسى كەلەدى, سونداي-اق, ولار ءوز قولدارىمەن دايىندالاتىن ونىمدەردى ساتۋعا مۇمكىندىك الادى. اكىمدىك بولىمشەلەرىنىڭ ماماندارى ولارعا كاسىپكەرلىك داعدىلارىنا وقىتۋدان باستاۋ, استانالىق نارىقتى الدىن الا زەرتتەپ, تاۋارلاردىڭ, جۇمىستار مەن قىزمەتتەردىڭ نەعۇرلىم سۇرانىسقا يە تىزبەسىن انىقتاۋعا كەڭەس بەردى.
كاسىپكەرلەر پالاتاسىنىڭ وكىلدەرى «بيزنەس-باستاۋ» باعدارلاماسى تۋرالى ايتىپ, جاڭادان باستاعان بيزنەسمەندەر قانداي مەملەكەتتىك قولداۋ شارالارىنا ۇمىتكەر بولاتىنىن ەگجەي-تەگجەيلى ءتۇسىندىرىپ بەردى. ولارعا قويىلاتىن باستى تالاپ: 1 ايدان 3 ايعا دەيىنگى مەرزىمگە سوزىلاتىن وقۋدى جىبەرمەۋ. كۋرستاردا تاۋەكەلدەردى قالاي ەسەپكە الۋ جانە بازالىق قۇجاتتامانى قالاي قۇرۋ كەرەكتىگى ەگجەي-تەگجەيلى باياندالادى. تولىق بيزنەس-جوسپار ازىرلەنگەننەن كەيىن گرانت الۋعا ءوتىنىم بەرۋگە بولادى.
«جۇمىس ىزدەپ جۇرگەن تۇلعالار رەتىندە ەسەپتە تۇرعان قالا تۇرعىندارى ەلوردادا سۇرانىسقا يە ماماندىقتار بويىنشا 1 ايدان 3 ايعا دەيىن تەگىن وقۋ كۋرستارىنان وتە الادى: اسپاز, كونديتەر, ناۋبايشى, تىگىنشى, ماسساجيست, ەلەكتر, گازبەن دانەكەرلەۋشى, بالاباقشا تاربيەشىسى, سلەسار-سانتەحنيك, ەلەكترومونتەر, كيبەرقاۋىپسىزدىك مامانى, انيماتسيا جانە ۆيدەوگرافيكا, ساۋدا جونىندەگى مەنەدجەر. وقۋدان كەيىن قالانىڭ جەكە كومپانيالارىندا جۇمىسقا ورنالاسۋ ۇلەسى وتە جوعارى», – دەپ اتاپ ءوتتى ساۋلە نۇرعوجينا.
ەلوردانىڭ جۇمىسپەن قامتۋ جانە الەۋمەتتىك قورعاۋ باسقارماسىندا كوپبالالى انالارمەن وسىنداي كەزدەسۋلەردىڭ تۇراقتى نەگىزدە وتكىزىلەتىندىگىن مالىمدەدى.