8 بەن 12 جاس ارالىعىنداعى ءانشى بالالار بايقاۋىنا ساراپشىلىق ەتكەن قازىلار القاسىنىڭ جەتەكشىسى, وپەرا ءانشىسى زارينا التىنباەۆانىڭ ءوزى دە وسىنداي جاۋاپتى سايىستىڭ تالايىن باسىنان وتكەرگەن. سوندىقتان دا كىشكەنتاي ونەرپازداردىڭ بويىنداعى قورقىنىش پەن تولقۋدى جانە ونى قالاي جەڭۋدى جاقسى بىلەدى. قازىلار ورالدىق ورەندەردىڭ جاۋاپتى سىندا جانىپ كەتپەي, بار تالانتىمەن كورىنۋىنە جاعداي جاسادى. «بالا داۋىسى» بايقاۋى جوعارى دەڭگەيدە ءوتتى.
جۇزدەن اسا كۇمىس كومەي جاس ءانشى باق سىناعان بايقاۋدا تاڭداۋ 10 جاسار تۇگەلباي الىمجانعا ءتۇستى. №4 مەكتەپتىڭ وقۋشىسى ادەمى داۋىسىمەن, ساحنا مانەرىمەن جانە ەرەكشە سەزىمتالدىعىمەن قازىلار القاسىن ءتانتى ەتتى. ول ورىنداعان «ماما» ءانى تىڭداعان جاننىڭ جۇرەك قىلىن شەرتىپ, عاجاپ كۇيگە بولەدى.
– بايقاۋدىڭ قورىتىندى ءناتيجەسى جاريالانار تۇستا قاتتى تولقىدىم. سايىستىڭ پروديۋسەرى فاريدا نيازوۆا ساحنادان مەنىڭ اتى-ءجونىمدى جاريالاعان ساتتە قۋانىشىم قوينىما سىيماي كەتتى. باقىتتىمىن, – دەيدى كىشكەنتاي جەڭىمپاز.
تۇگەلباي ءالىمجان ەندى قازاقستاننىڭ ءار وڭىرىنەن ىرىكتەلىپ شىققان 16 جەڭىمپازبەن بىرگە «جۇلدىزدى ارمان ۇيىندە» وتەتىن فينالدىق سايىسقا قاتىسىپ, باتىس قازاقستان وبلىسىنىڭ نامىسىن قورعايدى. بايقاۋدىڭ سۋپەرفينالى الدىندا بالالار ۆوكال, حورەوگرافيا جانە ارتىستىك شەبەرلىك ساباقتارىنا قاتىسىپ, ساحنا ونەرىنىڭ قىر-سىرىنا ۇيرەنەدى.
«بالا داۋىسى – 2019» بايقاۋىنىڭ جەڭىمپازى مۋزىكالىق وقۋ ورنىنا ارنالعان ءبىلىم گرانتى مەن ديسنەيلەند ەرتەگىلەر الەمىنە ساياحات جولداماسىنا يە بولماق. ايتا كەتەيىك, «بالا داۋىسى» ۇلتتىق بالالار ءان بايقاۋىن ءاليا نازارباەۆا باسقاراتىن «جاندانۋ الەمى» قورى قازاقستان رەسپۋبليكاسىنىڭ تۇڭعىش پرەزيدەنتى قورىنىڭ سونداي-اق ءبىلىم جانە عىلىم مينيسترلىگىنىڭ قولداۋىمەن بيىل ءتورتىنشى مارتە ۇيىمداستىرىلىپ وتىر. باتىس قازاقستان وبلىسى