قوعامدىق بىرلەستىكتىڭ جەتەكشىسى داۋرەن بابامۇرات بۇل جولعى سايلاۋدىڭ الدىڭعىلارعا ۇقسامايتىنىن, جاڭا جاعداي ەكەنىن تىلگە تيەك ەتتى. «قالىپتاسقان جاعدايدا وسى ۋاقىتقا دەيىن ەكونوميكا مەن حالىقارالىق دەڭگەيدەگى ەلباسىنىڭ جەتىستىكتەرىن ساقتاي وتىرىپ, جاڭا بەلەستەرگە ۇمتىلۋ ءۇشىن حالىققا دا ساياسي ايقىندىق قاجەت. حالىقتىڭ كوكەيىندە نە بار, قانداي ماسەلەلەر مازالايدى؟ كوپشىلىك سايلاۋعا تۇسەتىن ازاماتتاردان وسىنى كۇتەدى. «ەكونوميكا ەلگە جۇمىس ىستەۋى كەرەك. شاعىن جانە ورتا بيزنەسكە ەركىندىك بەرۋ كەرەك. جەمقورلىقپەن كۇرەستى شىنايى تۇردە جۇرگىزۋ قاجەت. ساياسي رەفورمالارعا جول اشۋ كەرەك. ەلگە بىرلىك, سايلاۋعا ادىلدىك, ەكونوميكاعا تۇراقتىلىق قاجەت. سول سەبەپتى سايلاۋ ناۋقانىنا بارىنشا قاتىسۋ ءدال قازىر ءاربىرىمىزدىڭ ءمىندەتىمىز», دەدى د.بابامۇرات.
سپيكەر سونداي-اق شەتەلدەن كەلگەن ينۆەستورلاردى ەرتەڭ قازاقستاندا جاعداي قانداي بولادى, حالىقتىڭ جاعدايى قالاي قالىپتاسادى, العا قويعان ماقساتتارىمىز قايتىپ شەشىلەدى دەگەن ماسەلەلەر الاڭداتىپ وتىرعانىن جەتكىزدى. سەبەبى «حالىقارالىق زاڭ پرەزيدەنتتىڭ مىندەتىن ۋاقىتشا اتقارۋشى» دەگەندى قابىلدامايدى. مۇنىڭ سوڭى ەلدەن ينۆەستيتسيانىڭ جىلىستاۋىنا الىپ كەلۋى دە ابدەن مۇمكىن.
«قازاق ەلىنىڭ بىرلىگىنە جانە بىرتۇتاستىعىنا سىنا قاققىسى كەلەتىندەر ءوز ءىشىمىزدە دە, سىرت ەلدەردە دە بارشىلىق. ەل باسقارۋعا لايىقتى تۇلعانى تانىپ, وعان سەنىم ءبىلدىرۋدى كەشىكتىرۋگە بولمايدى», دەپ اتاپ ءوتتى د.بابامۇرات. ونىڭ ايتۋىنشا, قازاقستاننىڭ ءمۇددەلەرىن الەمدە ىلگەرىلەتۋ جانە ناتيجەلى حالىقارالىق بايلانىستاردى ساقتاپ قالۋ ءۇشىن مەملەكەت بيلىگىنىڭ ساباقتاستىعى قاجەت.
حالقىمىز سوڭىنان جۇرتتى ەرتە الاتىن, الەمدىك قوعامداستىق الدىندا قازاقستاندى لايىقتى تانىستىرا الاتىن تۇلعانى وركەنيەتتى جولمەن تاڭداۋى ءتيىس. زاڭدى سايلاۋ – ەل بولاشاعىنىڭ تۇراقتىلىعىنىڭ كەپىلى. سوندىقتان جاستار وكىلدەرى بۇل ناۋقاندى زاڭ اياسىندا وتكىزۋگە بارىنشا اتسالىساتىن بولادى.
الماتى