جيىن بارىسىندا ارداگەرلەر ۇيىمىنىڭ ورتالىق كەڭەسىنىڭ توراعاسى باقتىقوجا ىزمۇحامبەتوۆ ەل ارداگەرلەرى كەزەكتەن تىس پرەزيدەنت سايلاۋىن وتكىزۋگە تولىق قوسىلاتىنىن جانە قاي جەردە تىنىشتىق بولسا, سول جەردە بەرەكە مەن بىرلىك بولارىن العا تارتىپ, ەل ەكونوميكاسى دا ارتىپ, مەملەكەتتىڭ الەۋەتى كۇشەيە تۇسەتىنىن جەتكىزدى.
«بۇگىن ءبىز رەسپۋبليكالىق ارداگەرلەر قوعامدىق بىرلەستىگىنىڭ پرەزيديۋمىن وتكىزدىك. بۇل پرەزيديۋمدا قارالعان ماسەلە پرەزيدەنتىمىز ق.توقاەۆتىڭ قازاقستان ازاماتتارىنا ارناعان ءۇندەۋىنە بايلانىستى بولدى. ارداگەرلەر ۇيىمى بۇل شەشىمگە ۇلكەن تۇسىنىستىكپەن قارايدى», دەدى ب.ىزمۇحامەتوۆ. ونىڭ ايتۋىنشا, زاڭ بويىنشا پرەزيدەنتكە كەلەسى سايلاۋعا دەيىن وتىرۋعا بولار ەدى. بىراق ق.توقاەۆ ەلدىڭ مۇددەسىن ويلاپ, كەزەكتەن تىس سايلاۋ وتكىزۋدى ۇيعاردى.
«مىنە, سوندىقتان وسى شەشىم قابىلدانىپ, 9 ماۋسىمدا ەلىمىزدە پرەزيدەنتتىك سايلاۋ وتكەلى وتىر. بۇل پرەزيدەنتتىك سايلاۋ ءتۇرلى كەلەڭسىزدىكتەردىڭ الدىن الادى. ونىڭ ۇستىنە ەلىمىز تاۋەلسىزدىك العان كەزدەن باستاپ تۇڭعىش پرەزيدەنتىمىز نۇرسۇلتان ءابىش ۇلىنىڭ تىنىمسىز ەڭبەگىنىڭ ارقاسىندا ەلىمىزگە اسا كولەمدى ينۆەستيتسيالار كەلدى. مىنە, سول ينۆەستيتسيا سالعان الپاۋىت فيرمالار, كومپانيالار قازىر الاڭداۋدا. سوندىقتان قازىر ازعانتاي ۋاقىتتىڭ ىشىندە حالقىمىز ءوزىنىڭ پرەزيدەنتىن سايلاپ, ەلدىڭ بىرلىگىن, تۇتاستىعىن, تىنىشتىعىن تولىقتاي قامتاماسىز ەتۋى ءتيىس. بۇل دەر كەزىندە قابىلدانعان شەشىم», دەدى ول.
ارداگەرلەر ۇيىمى ورتالىق كەڭەسىنىڭ كەڭەيتىلگەن وتىرىسىندا اتالعان ۇيىم توراعاسىنىڭ ءبىرىنشى ورىنباسارى ومىرزاق وزعانباەۆ 19 ناۋرىزدا ەلباسىنىڭ پرەزيدەنتتىك وكىلەتتىگىن توقتاتۋى تاريحي شەشىم بولعانىن تىلگە تيەك ەتىپ, الداعى سايلاۋدىڭ حالقىمىز ءۇشىن ماڭىزىن اتاپ ءوتتى. ونىڭ ايتۋىنشا بۇل شەشىمدى ارداگەرلەر قاۋىمى تولىق قولدايدى.
«قازاقستان تاريح ساحناسىنان ويىپ تۇرىپ ءوز ورنىن الدى. تاۋەلسىزدىك – ءتاڭىردىڭ ءبىزدىڭ ۇرپاققا بەرگەن ۇلكەن باقىتى, حالقىمىزدىڭ ماڭگىلىك قۇندىلىعى. ءبىز بۇگىنگى جەتىستىكتەرىمىزگە تاۋەلسىزدىكتىڭ ارقاسىندا قول جەتكىزدىك. قازاقستان بۇگىندە ەۋرازيانىڭ جۇرەگىندە ورنالاسقان, تاتۋ-ءتاتتى ءومىر ءسۇرىپ جاتقان كوپۇلتتى مەملەكەت. از ۋاقىتتىڭ ىشىندە ەلىمىز, سپورت, ءبىلىم, عىلىم, مادەنيەت, ونەردە ءىرى تابىستارعا قول جەتكىزدى. تاتۋلىق پەن بىرلىكتى العا تارتقان قازاقستان بۇگىندە ورتالىق ازياداعى ەلدەردىڭ كوشىن باستاپ كەلەدى. 19 ناۋرىزدا ەلباسىنىڭ پرەزيدەنتتىك وكىلەتتىگىن توقتاتۋى تاريحي شەشىم بولدى. ەلباسىمىزدىڭ تاۋەلسىز قازاقستانعا سىڭىرگەن ەڭبەگى ۇشان-تەڭىز. پرەزيدەنتىمىز قاسىم-جومارت توقاەۆ قازاقستان ازاماتتارىنا ارناعان ۇندەۋىندە الداعى ەل پرەزيدەنتىن سايلاۋدى كەزەكتەن تىس وتكىزۋدىڭ ەلىمىز ءۇشىن ماڭىزدىلىعىن نەگىزدەدى. الەمدەگى حالىقارالىق ساياسي احۋال تۇراقسىز بولىپ تۇرعان كەزەڭدە ەل قاۋىپسىزدىگىنە تىكەلەي قاتىستى, قوعامدىق-ساياسي كەلىسىمدى قامتاماسىز ەتۋ, العا قاراي نىق جىلجۋ, الەۋمەتتىك-ەكونوميكالىق دامۋ مىندەتتەرىن شەشۋ ءۇشىن پرەزيدەنتتىڭ وكىلەتتىگى تولىق بولۋى كەرەك. سايلانعان پرەزيدەنت, حالىقتىڭ سەنىمىن العان تۇلعا ەلدىڭ اتىنان باتىل شەشىمدەر قابىلداي الادى. ەل ارداگەرلەرى پرەزيدەنت سايلاۋىن وتكىزۋ ەلىمىز ءۇشىن دۇرىس شەشىم دەپ ءبىراۋىزدان قولدايدى», دەدى ءو.وزعانباەۆ.