سەنبى, 5 مامىر 2012 7:36
قۇقىق قورعاۋ قىزمەتى ەل تىنىشتىعىنىڭ كەپىلى بولۋمەن قاتار, قاراپايىم حالىقتىڭ سەنىم ارتار تىرەگى دە. سەبەبى, ادامدار اراسىندا قانداي دا ءبىر تۇسىنبەۋشىلىك جاعداي تۋىنداي قالسا, مىندەتتى تۇردە قۇقىق قورعاۋ قىزمەتىنە جۇگىنەتىنى اقيقات. ءتىپتى, اۋىلدىق جەرلەردىڭ وزىندە بۇزاقىلار ءبىر-بىرىمەن قاعىسىپ قالسا, ۋچاسكەلىك پوليتسياعا بارىپ, ماسەلەنى شەشەدى. سوندىقتان, ءاربىر قۇقىق قورعاۋشى وتە ساۋاتتى, مادەنيەتتى جانە ەلمەن دۇرىس ءتىل تابىسا الاتىن بىلىكتى دە ءبىلىمدى مامان بولۋى ءتيىس.
سەنبى, 5 مامىر 2012 7:36
قۇقىق قورعاۋ قىزمەتى ەل تىنىشتىعىنىڭ كەپىلى بولۋمەن قاتار, قاراپايىم حالىقتىڭ سەنىم ارتار تىرەگى دە. سەبەبى, ادامدار اراسىندا قانداي دا ءبىر تۇسىنبەۋشىلىك جاعداي تۋىنداي قالسا, مىندەتتى تۇردە قۇقىق قورعاۋ قىزمەتىنە جۇگىنەتىنى اقيقات. ءتىپتى, اۋىلدىق جەرلەردىڭ وزىندە بۇزاقىلار ءبىر-بىرىمەن قاعىسىپ قالسا, ۋچاسكەلىك پوليتسياعا بارىپ, ماسەلەنى شەشەدى. سوندىقتان, ءاربىر قۇقىق قورعاۋشى وتە ساۋاتتى, مادەنيەتتى جانە ەلمەن دۇرىس ءتىل تابىسا الاتىن بىلىكتى دە ءبىلىمدى مامان بولۋى ءتيىس. وسىعان بايلانىستى ەل پرەزيدەنتى «الەۋمەتتىك-ەكونوميكالىق جاڭعىرتۋ – قازاقستان دامۋىنىڭ باستى باعىتى» اتتى جولداۋىندا ەلىمىزدەگى قۇقىق قورعاۋ ورگاندارىنىڭ قىزمەتكەرلەرىن كەزەكتەن تىس اتتەستاتتاۋدان وتكىزۋ تۋرالى ايتقان بولاتىن. ەلباسىنىڭ بۇل ءسوزى شىنىمەن-اق قوعام دامۋى ءۇشىن, قۇقىق قورعاۋ ورگاندارى ءۇشىن شەشىمىن تابۋ كەرەك ماسەلە بولىپ كەلگەن. مۇنى تالداعان زيالى قاۋىم دا اتتەستاتتاۋدان وتكىزۋدى جەدەلدەتىپ قولعا الۋ كەرەك ەكەنىن دە ايتىپ جۇرگەن بولاتىن. «حالىق سۇراسا, حان تۇيەسىن سويادى» دەمەكشى, ەلباسى ايتىپ, ەلى قولداعان بۇل سىناق كۇشىنە ەندى. «قازاقستان رەسپۋبليكاسى قۇقىق قورعاۋ ورگاندارىنىڭ قىزمەتكەرلەرىن كەزەكتەن تىس اتتەستاتتاۋدان وتكىزۋ تۋرالى» جارلىققا قول قويىلدى.
بۇل كەزەكتەن تىس اتتەستاتتاۋدىڭ ماقساتى قانداي دەگەنگە توقتالاتىن بولساق, بۇل بيزنەس پەن قوعامنىڭ قولداۋىنا جاۋاپ بەرەتىن قازىرگى زامانعى قۇقىق قورعاۋ جۇيەسىن قۇرۋعا ارنالعان كادرلىق الەۋەتتى قالىپتاستىرۋ بولىپ تابىلادى. ءسويتىپ, قۇقىق قورعاۋ سالاسىنىڭ اتىنا جامانات كەلتىرىپ, كۇيە جاقتىرىپ الىپ, بەدەلىن ءتۇسىرىپ جۇرگەن كەيبىر قىزمەتكەرلەردىڭ قىزمەتىنە ساي ەمەستىگىن انىقتاپ, ماماندار اراسىن تازارتۋ. سونىمەن بىرگە, ادال جانە كاسىبي قىزمەتكەرلەردى ىرىكتەۋدىڭ ءتيىمدى تەتىكتەرىن قۇرۋ, قۇقىق قورعاۋ ورگاندارىنىڭ كادر ساياساتىن ساپالى تۇردە وزگەرتۋ جانە وعان حالىقتىڭ سەنىمىن ارتتىرۋ.
وسىعان بايلانىستى جارلىقپەن جوعارى اتتەستاتتاۋ كوميسسياسى تۋرالى ەرەجە, ونىڭ قۇرامى, كەزەكتەن تىس اتتەستاتتاۋدى وتكىزۋ قاعيداسى جانە ءتيىستى ءىس-شارالاردىڭ جوسپارى بەكىتىلدى. قۇقىق قورعاۋ ورگاندارىنىڭ قىزمەتكەرلەرىنە كەزەكتەن تىس اتتەستاتتاۋدى وتكىزۋ كەزىندە اتتەستاتتاۋدان ءوتۋشىنىڭ قىزمەتىنە, ونىڭ سىبايلاس جەمقورلىققا قارسى زاڭنامانى ساقتاۋىنا باعا بەرىلەتىن بولادى. اتتەستاتتالاتىن قىزمەتكەردىڭ ادامي بەت-بەينەسىن ايقىندايتىن ونىڭ كاسىبي جانە جەكە باس ەرەكشەلىكتەرىن باعالاۋعا ەرەكشە نازار اۋدارىلاتىندىعى قاتاڭ تاپسىرىلدى. سوندىقتان, بۇل ناعىز ءبىلىمدىلەر مەن بىلىكتىلەردىڭ سىناعىنا اينالماق. كەزىندە بۇقپانتايلاپ ءوتىپ كەتكەن قىزمەتكەرلەر قاقپا سىرتىنا شىعارىلادى. ويتكەنى, وسى سىناقتى الۋ ءۇشىن ساي تاسىنداي جاساقتالعان جوعارى اتتەستاتتاۋ كوميسسياسى, ورتالىق جانە وڭىرلىك اتتەستاتتاۋ كوميسسيالارى قۇرىلىپ وتىر.
اتتەستاتتاۋدىڭ جۇيەسى دە جەڭىل-جەلپى وتەم دەۋشىلەرگە ەرىك بەرمەيدى. سەبەبى, سىننان وتكەن ءاربىر قۇقىق قورعاۋشى قازاقستان رەسپۋبليكاسىنىڭ زاڭناماسىن بىلۋمەن قاتار جانە لوگيكالىق ويلاۋ قابىلەتىن كومپيۋتەرلىك تەستىلەۋدى, ءتيىستى قۇقىق قورعاۋ ورگانى قىزمەتىنىڭ ەرەكشەلىگىن ەسكەرە وتىرىپ دەنە شىنىقتىرۋ, اسكەري جانە قىزمەتتىك دايارلىق بويىنشا بەلگىلەنگەن نورماتيۆتەردى تاپسىرۋدى, سونداي-اق پسيحولوگپەن اڭگىمەلەسۋدى باستان وتكەرەدى. ونىمەن قوسا, قىزمەتكەرمەن پرەزيدەنت جانىنداعى جوعارى اتتەستاتتاۋ كوميسسياسى, نە ءتيىستى اتتەستاتتاۋ كوميسسياسى وتكىزەتىن اڭگىمەلەسۋ بولىپ, ءتيىستى شەشىم شىعارۋىن قامتيدى.
سىبايلاس جەمقورلىقپەن تاباندى كۇرەسۋدى تەمىردەي تارتىپكە اينالدىرعان ەلباسى بۇل كوميسسيا جۇمىسىنىڭ دا اياعىن شالىس باسپاۋىن قاتاڭ ەسكەرتتى. پرەزيدەنت جانىنداعى قۇقىق قورعاۋ ورگاندارىنىڭ قىزمەتكەرلەرىن كەزەكتەن تىس اتتەستاتتاۋدان وتكىزۋ جونىندەگى جوعارى اتتەستاتتاۋ كوميسسياسى تۋرالى ەرەجەدە مىندەتتەر ايقىندالدى.
ماسەلەن, كوميسسيانىڭ مىندەتتەرىندە كەزەكتەن تىس اتتەستاتتاۋدان قۇقىق قورعاۋ ورگاندارى ءبىرىنشى باسشىلارىنىڭ ءبىرىنشى ورىنباسارلارىن جانە ورىنباسارلارىن, قۇقىق قورعاۋ ورگاندارى ۆەدومستۆولارى باسشىلارىن جانە ولاردىڭ ورىنباسارلارىن, قۇقىق قورعاۋ ورگاندارى ورتالىق اپپاراتتارىنىڭ دەپارتامەنتتەرى باستىقتارىن (باس پروكۋراتۋرانىڭ جانە قارجى پوليتسياسىنىڭ قۇزىرەتىنە ءتىل ساياساتى, اقپاراتتىق جانە قۇجاتتامالىق قامتاماسىز ەتۋ, مەملەكەتتىك قۇپيالاردى قورعاۋ ءماسەلەلەرى كىرەتىن دەپارتامەنتتەرىنەن, سونداي-اق تىلدىق جانە قارجىلىق قامتاماسىز ەتۋ دەپارتامەنتتەرىنەن باسقا), قۇقىق قورعاۋ ورگاندارىنىڭ اۋماقتىق نەمەسە ولارعا تەڭەستىرىلگەن مامانداندىرىلعان بولىنىستەرىنىڭ باسشىلارىن جانە ولاردىڭ ورىنباسارلارىن, قۇقىق قورعاۋ ورگاندارىنىڭ ۆەدومستۆولىق جوعارى وقۋ ورىندارىنىڭ باسشىلارىن جانە قۇقىق قورعاۋ ورگاندارىنىڭ ورتالىق اپپاراتتارىنىڭ رەسپۋبليكالىق اتتەستاتتاۋ كوميسسيالارىنىڭ قۇرامىنا كانديداتتاردى وتكىزۋ تاپسىرىلعان.
مىنە, وسىلايشا ەڭ اۋەلى قۇقىق قورعاۋ سالاسىن باسقارىپ وتىرعان باسشىلاردان باستاپ, بۇكىل قاتارداعى قىزمەتكەر دە وسى سۇزگىدەن ءوتىپ, ءوز بىلىكتىلىكتەرى مەن ءبىلىمىن ءىس جۇزىندە دالەلدەيدى. سونىمەن قاتار, بۇل سىناق قۇقىق قورعاۋ سالاسىن تازارتىپ قانا قويماي, كاسىبي شەبەرلىكتەرىن شىڭداپ, ءبىلىمدەرىن كوتەرىپ, جاۋاپكەرشىلىكتەرىن ارتتىرارى ءسوزسىز. ءبارىنەن بۇرىن ەلىمىزدە سول سىننان سۇرىنبەي وتكەن مىقتى دا كاسىبي ماماندار ەل ەرتەڭى ءۇشىن ايانباي ەڭبەك ەتىپ, ساۋاتتى دا ادال جۇمىس جاسايتىنىنا حالىق سەنىم ارتىپ وتىر. وسى سەنىم اقتالسا ەكەن دەيمىز.
ال بۇگىنگى تاڭدا قىزىلوردا وبلىستىق پروكۋراتۋراسى ورگاندارىنىڭ 127 جەدەل قىزمەتكەرىن اتتەستاتتاۋدان وتكىزۋگە دايىندىق جۇمىستارى ءجۇرگىزىلۋدە. ونىڭ ىشىندە پروكۋراتۋرا ورگاندارىندا جيىرما جىل قىزمەت ءوتىلى بار 9, سونداي-اق جاڭا لاۋازىمعا كەمىندە ءبىر جىل بۇرىن تاعايىندالعان 11 قىزمەتكەر بار.
ساپاربەك نۇرپەيىسوۆ, قىزىلوردا وبلىسىنىڭ پروكۋرورى, اعا ادىلەت كەڭەسشىسى.