اكىمدىكتىڭ ەلەكتروندى «Open Almaty» قوعامدىق قابىلداۋىندا جاڭا فۋنكتسيالار پايدا بولادى, ونلاين-قىزمەت الۋ ءۇشىن بارلىق قالالىق سەرۆيستەر بىرىكتىرىلەدى جانە اۋدان تۇرعىندارى «اشىق بيۋدجەت» فۋنكتسياسى ارقىلى بيۋدجەت قارجىسىنىڭ ءبىر بولىگىن قالاي جۇمساۋعا بولاتىندىعى تۋرالى ءوز ۇسىنىستارىن ايتىپ, داۋىس بەرە الادى. بۇلاردان وزگە, قالانىڭ ۆيدەوباقىلاۋ كامەرالارىنىڭ ينتەگراتسياسى جانە كوممۋنالدى كولىكتىڭ GPS ترەكينگى بويىنشا مونيتورينگ جۇرگىزۋدىڭ بىرىڭعاي جۇيەسى جاسالادى.
«مەملەكەت باسشىسى جاقىندا اكىمدەرمەن وتكىزگەن كەڭەستە تۇرعىندارمەن كەرى بايلانىس اياسىن كەڭەيتۋدى تاپسىرعان ەدى. ءبىز سول مىندەتتى ورىنداۋدى جۇيەلى تۇردە قولعا الدىق, الەۋمەتتىك جەلىلەردەگى اككاۋنتتار مەن «Open Almaty» قوعامدىق قابىلداۋىنان وزگە ءبىز تۇرعىندارمەن تىكەلەي جۇمىس ىستەيتىن بىرىڭعاي بايلانىس-ورتالىعىن قۇرامىز. ەندى قالا تۇرعىندارى ءتۇرلى نومىرلەردى ىزدەمەيدى, ءبىر ءنومىر ارقىلى اپاتتى قىزمەتتەن باستاپ, انىقتامالىق سيپاتى اقپاراتتارعا قول جەتكىزە الادى», دەپ اتاپ ءوتتى باۋىرجان بايبەك.
ايتا كەتەرلىگى, جەرگىلىكتى اتقارۋشى ورگانداردىڭ اشىقتىعىن ارتتىرۋ جانە ءتۇرلى ومىرلىك جاعدايلار كەزىندە قالالىقتارعا كومەك كورسەتۋ ماقساتىندا 2017 جىلى اكىمدىكتىڭ «Open Almaty» قوعامدىق قابىلداۋى اشىلعان ەدى. وعان جۇگىنگەن ءاربىر ادام ءتيىستى كەڭەس الىپ, اكىمدىكتىڭ, قالا باسقارمالارىنىڭ, پروكۋراتۋرانىڭ, پوليتسيانىڭ كىرىس دەپارتامەنتىنىڭ جانە باسقالارىنىڭ اتىنا ءوز ءوتىنىشىن قالدىرىپ وتىردى. پورتالدان قالا قىزمەتتەرىنىڭ جولداردى, ارىقتاردى, جىلۋ جەلىلەرى مەن اۋلالاردى جوندەۋ جونىندەگى جوسپارلارىن كورۋگە بولادى. قازىرگى كەزدە «Open Almaty» ارقىلى قالا تۇرعىندارىنان 109 مىڭنان استام ءوتىنىش تۇسكەن, ولاردىڭ 88%-ى بىرنەشە كۇن ىشىندە وڭ شەشىمدەرىن تاپتى.
بۇلاردان وزگە, الماتى اكىمدىگىنىڭ بارلىق الەۋمەتتىك جەلىلەردە رەسمي اككاۋنتارى بار. تەك Instagram پاراقشاسىنا 200 مىڭعا جۋىق ادام جازىلعان, وعان كۇنىنە ورتاشا ەسەپپەن 70 ءوتىنىش تۇسەدى. ءوز كەزەگىندە الماتى اكىمى قالا تۇرعىندارىنىڭ وتىنىشتەرىن اۋدان اكىمدىكتەرى مەن قالا باسقارمالارىنىڭ قالاي ورىنداپ جاتقانىن تۇراقتى نازاردا ۇستاۋدا جانە بارلىق اپپاراتتىق كەڭەستەردە ولارعا ەرەكشە ءمان بەرۋدە. وتىنىشتەردىڭ ماڭىزدىلارى ەرەكشە باقىلاۋعا الىنۋدا. قالا بيۋدجەتى وتىنىشتەردى ەسكەرە وتىرىپ سارالانادى جانە ناقتىلانادى. قارجى ناقتىلى ماسەلەلەردى شەشۋگە جۇمسالادى, ناتيجەسىندە شاعىمدار سانى بىرتىندەپ ازايادى.
باۋىرجان بايبەك جۇمىس ساپارى كەزىندە جاقىندا عانا سالىنعان ءارى كاسىپكەرلەردىڭ تارتىلىس ورتالىعىنا اينالاتىن ينۆەستيتسيالار ۇيىندە بولدى. كاسىپكەرلىك جانە ينۆەستيتسيالار باسقارماسىنان, «الماتى» الەۋمەتتىك كاسىپكەرلىك كورپوراتسياسىنان, «Kazakh Invest» وكىلدىگىنەن وزگە مۇندا ءىت سالاسى مەن ەلەكتروندى كوممەرتسيانىڭ جەتەكشى كومپانيالارىنىڭ وفيستەرى ورنالاساتىن بولادى.
ءدال سول كۇنى قالا اكىمى ءال-فارابي داڭعىلى بويىنداعى ءۇش قاباتتى تۇرعىن ءۇي قۇرىلىسىنىڭ قارقىنىمەن تانىستى. ينۆەستورلاردىڭ ايتۋى بويىنشا تۇرعىنداردىڭ العاشقى كەزەگى ورنالاسقان, از قاباتتى قۇرىلىس بولعاندىعىنا قاراماستان جوبا ءوزىنىڭ ەكونوميكالىق جاعىنان رەنتابەلدى ەكەنىن كورسەتتى.
ەسكە سالساق, 2016 جىلى ەلىمىزدىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ ءال-فارابي داڭعىلىنىڭ جوعارى جاعىنا بيىك عيماراتتاردى سالۋعا بولمايتىندىعى تۋرالى تاپسىرماسىنان سوڭ جەرگىلىكتى بيلىك مۇنداعى نىسانداردىڭ ەنىن 15 مەتردەن, ال بيىكتىگىن 12 مەتردەن اسىرماۋ جونىندە رەگلامەنت قابىلداعان ەدى.