العاشقى سەنبىلىك ءساۋىردىڭ 6-سى كۇنى وتەدى. بۇل ءبىر كۇندىك شارا ەمەس, الداعى ۋاقىتتا دا ءجيى جالعاساتىندىقتان, سەنبىلىككە قالا تۇرعىندارىنىڭ بارلىعى, مەملەكەتتىك مەكەمەلەر, كاسىپورىندار, دۇكەن يەلەرى, مەيرامحانا, شاعىن جانە ورتا بيزنەس وكىلدەرى تۇگەلدەي قوسىلۋلارى كەرەك. قالا اكىمى ەرماك ءسالىموۆ, التى اي قىستان بەرى جينالعان قوقىستى كوكتەمدە شىعارىپ, قالانى تازالاۋدى جولعا قويۋ قاجەت دەگەندى العا تارتتى.
قالالىق تۇكش ءبولىمىنىڭ باستىعى امانتاي وتەلباەۆتىڭ اتيۋىنشا, ەكى اي بويى ءارى سەنبى سايىن وتەتىن تازالىق شاراسىنا بارلىق كوممۋنالدى مەكەمەلەر دايىن. ءاربىر تۇرعىن بەلگىلى ءبىر جەردى عانا ەمەس, اۋلاسىنىڭ ماڭىن دا تازالىق قالپىنا كەلتىرۋى كەرەك. ال جينالعان قوقىستاردى «بيگ بەگي» دەپ اتالاتىن ارنايى ۇلكەن قاپتارعا سالۋ كەرەك. سەنبىلىك بارىسىندا تەك قوقىس جيناپ قانا قويماي, ءارى كەتكەن عيماراتتاردى بوياپ, سىرلاپ, گازوندارعا گۇلدەر ورناتىلۋى كەرەك. امانتاي وتەلباەۆتىڭ پىكىرىنشە, قالادا 30 مىڭ اعاش ورناتىلاتىن بولماق. كوشەتتەر جاقىن ارادا وسكەمەننەن جەتكىزىلمەكشى. سەمەيدىڭ كوشەلەرىندە جانە ساياباعىنا تەرەك, شەتەن, كوكتەرەكتەر ەگىلەدى.
قالا اكىمىنىڭ تاپسىرماسىمەن قالاداعى اشىق جاتقان جىلۋ مەن سۋ قۇبىرلارىنىڭ ليۋكتەرىن انىقتاۋ جۇمىستارى باستالىپتى. بۇل ماسەلە ءۇشىن قارجى بولىنگەن. ارنايى كاسىپورىندار اشىق جاتقان قۇبىر قۇدىقتارىنىڭ بەتىن مەتالل, پلاستيك, بەتون قاقپاقتارمەن جاباتىن بولماق. سونداي-اق, العاشقى سەنبىلىك وتىسىمەن, تازالىقتىڭ شىن مانىندە جۇرگەن, جۇرمەگەنىن تەكسەرۋ ءۇشىن ۋچاسكەلىك ينسپەكتورلار تەكسەرۋگە شىعاتىن بولماق. ەگەر كاسىپكەرلەر وزدەرىنىڭ اينالالارىن تازالاماسا, وندا زاڭ جۇزىندە ايىپپۇل سالىناتىن بولادى.
راۋشان نۇعمانبەكوۆا
«ەgemen Qazaqstan»
سەمەي