اتالعان اسسوتسياتسيا قۇرامىندا 6 كاسىپكەر ايەل بار. جەتەكشىسى - «ASU.KZ» ءسان ءۇيىنىڭ باسشىسى ايسۇلۋ ورازباەۆا 20 جىلدان بەرى وسى سالادا ەڭبەك ەتەدى.
- بار بىلەتىنىمدى جاستارعا ۇيرەتكىم كەلەدى. بۇگىنگى جاستاردىڭ تىگىنشىلىك ىسكە, ديزاينەرلىككە دەگەن قىزىعۋشىلىقتارى جوعارى. تالانتتى جاستار كوپ, سولاردىڭ باستارىن قوسىپ, شىعارماشىلىقتارىن شىڭداۋعا, ءوز ىستەرىن باستاۋلارىنا قولداۋ كورسەتۋىمىز كەرەك, - دەيدى كاسىپكەر.
وڭىرلىك كاسىپكەرلەر پالاتاسىنىڭ باسشىسى ابدوللا يدرەسوۆ ەكىجاقتى مەموراندۋم اياسىندا كوپبالالى, جۇمىسسىز, الەۋمەتتىك جاعىنان از قامتىلعان ايەلدەرگە ارنايى سەمينارلار ۇيىمداستىرىلاتىنىن ايتادى.
ايماقتا بۇدان باسقا دا الەۋمەتتىك ماڭىزدى جوبالار قولعا الىنا باستادى. وبلىس اكىمىنىڭ تاپسىرماسىمەن «Isker ana» جوباسى اياسىندا 300-دەن استام اتىراۋلىق قىز-كەلىنشەك جاڭا كاسىپ ءتۇرىن مەڭگەرۋدە. اقىسىز شەبەرلىك ساعاتتارى دا بار. اتىراۋ سەرۆيس كوللەدجىندە وتەتىن كەزەكتى كۋرسقا كوپبالالى, جالعىزباستى, جۇمىسسىز ايەلدەر قاتىسادى دەپ جوسپارلانىپ وتىر. قالاداعى بەلگىلى ۆيزاجيست باقىت مىرزاعاليەۆا مەن كونديتەر دينارا احمەتوۆا, تىگىنشى ايزادا كەنەن سۇلۋلىق الەمىنىڭ قىر-سىرىن ۇيرەتىپ, ءتاتتى تاعامدار ءپىسىرۋدى, ادەمى كويلەك تىگۋدى ۇيرەتەدى. الەۋمەتتىك وسال توپتاعى ايەلدەردىڭ قوعامنان قالىس قالماي, وزدەرىن جەتىلدىرۋلەرى ءۇشىن مۇنداي باستامالاردىڭ ءمانى زور.