اسكەريلەردىڭ اراسىندا جاياۋ اسكەرلەر باس شتابىنىڭ باستىعى دا كەلگەندىگى حابارلاندى. ولاردىڭ ناقتى نە ماقساتپەن جەتكەنى تۋرالى الدىن الا حابار بەرىلمەدى. بىراق جۋرناليستەر كەلگەندەردىڭ اراسىندا ارناۋلى ماقساتتاعى كۇشتەردىڭ وكىلدەرى, سونىڭ ىشىندە كيبەرقاۋىپسىزدىك ماماندارى بار ەكەندىگىن انىقتاعان سوڭ الاڭداۋشىلىق تۋىندادى. اسكەريلەردىڭ ۇشىپ كەلۋ ماقساتى تۋرالى ەكى كۇن بويى بىلە الماي, ءدۇدامال بولعان جۋرناليستەرگە تەك 26 ناۋرىزدا عانا رەسەي سىرتقى ىستەر مينيسترلىگىنىڭ ارناۋلى وكىلى م.زاحاروۆا مالىمدەمە جاساپ, مامانداردىڭ ءىس-ارەكەتى ماسكەۋ مەن كاراكاس اراسىندا 2001 جىلى قول قويىلعان اسكەري-تەحنيكالىق ىنتىماقتاستىق جونىندەگى كەلىسىممەن رەتتەلەتىنىن ايتتى.
ۆەنەسۋەلادا ءالى كۇنگە ساياسي داعدارىس جالعاسۋدا. ەلدە قازىر ءىس جۇزىندە قوس وكىمەت بولىپ تۇر. ونىڭ ءبىرىن رەسەي زاڭدى دەپ ەسەپتەيتىن نيكولاس مادۋرو باسقارسا, ەكىنشىسىن اقش قولدايتىن ۇلتتىق اسسامبلەيانىڭ (پارلامەنتتىڭ) كوشباسشىسى حۋان گۋايدو باسقارادى.
وسى وقيعادان كەيىن حۋان گۋايدونىڭ جۇبايى, بەلسەندى ساياساتكەر فابيانو روسالەس اقش-قا كەلىپ, ونى پرەزيدەنت دونالد ترامپ اق ۇيدە قابىلدادى. كەزدەسۋدەن كەيىن جۋرناليستەرمەن بولعان بريفينگتە د.ترامپ «رەسەي ۆەنەسۋەلادان كەتۋى كەرەك» دەپ ناقتى جاريالادى. «رەسەيدى كەتىرۋ ءۇشىن اقش ءاسكەر ءجىبەرۋى مۇمكىن بە؟» دەگەن جۋرناليستەردىڭ سۇراعىنا ول «بارلىق شارالار قاراستىرىلاتىنىن» ايتتى. سونىمەن بىرگە پرەزيدەنت د.ترامپ ماسكەۋ اقش-تىڭ پوزيتسياسىن بىلەتىنىن مالىمدەدى.
فابيانو روسالەس ترامپپەن كەزدەسكەنگە دەيىن اقش-تىڭ ۆيتسە-پرەزيدەنتى مايك پەنستىڭ دە قابىلداۋىندا بولعان ەدى. كەزدەسۋدىڭ قورىتىندىسى بويىنشا جۋرناليستەرگە بەرگەن سۇحباتىندا م.پەنس: «رەسەيدىڭ اسكەري ۇشاقتارىنىڭ كەلۋىن امەريكا قۇراما شتاتتارى ارانداتۋ دەپ سانايدى. ءبىز بۇگىن رەسەيدەن مادۋرونىڭ رەجىمىن قولداۋدى توقتاتىپ, بۇكىل الەمنىڭ ۇلكەن بولىگى مەن بارلىق جارتىشار ەلدەرىنىڭ قاتارىنا ەنىپ, ازاتتىق تولىق قالپىنا كەلگەنشە حۋان گۋايدونىڭ جاعىنا شىعۋدى سۇرايمىز» دەدى.
مۇنداي شاقىرۋلاردى رەسەيدىڭ مىسە تۇتپاسى بەلگىلى, ويتكەنى ول ن.مادۋرونى ۆەنەسۋەلانىڭ زاڭدى سايلانعان پرەزيدەنتى دەپ تانيدى. بىلتىر مامىر ايىندا بولعان سايلاۋدا ول 67 پايىز داۋىس جيناپ, پرەزيدەنت سايلانعان. بىراق حۋان گۋايدو باستاعان وپپوزيتسيا سايلاۋدىڭ ادىلەتسىز بولعانىن ايتىپ, ونى پرەزيدەنت دەپ تانۋدان باس تارتقان. قوياتىن كىنالەرىنىڭ قاتارىندا وپپوزيتسيالىق كوشباسشىلاردى كۇماندى ايىپتارمەن تۇرمەلەرگە جاپقانى دا ايتىلعان. وسى سەبەپپەن ەلدەگى دەموكراتيالىق بىرلىك قوزعالىسى بۇل سايلاۋعا قاتىسپاعان.
د.ترامپتىڭ رەسەي ۆەنەسۋەلادان كەتۋىن تالاپ ەتكەن ءمالىمدەمەسىنە رەسەي سىرتقى ىستەر ءمينيسترىنىڭ رەسمي وكىلى م.زاحاروۆا ەشقانداي ىمىراسىز تەكەتىرەستىكپەن جاۋاپ بەردى. جۋرناليستەردىڭ ۆەنەسۋەلاعا اسكەريلەردىڭ نە ءۇشىن بارعانى جانە قانشا ۋاقىت بولاتىنىن بىلمەك بولعان سۇراعىنا وراي ول: «رەسەيدىڭ اسكەريلەرى ۆەنەسۋەلادا وزدەرىنە جانە ۆەنەسۋەلا وكىمەتىنە قانشا ۋاقىت كەرەك بولسا, سونشا بولادى», دەي كەلىپ, ءوزىنىڭ ءمالىمدەمەسى ەكىجاقتى اسكەري-تەحنيكالىق ىنتىماقتاستىق ءجونىندەگى كەلىسىمگە سۇيەنىپ جاسالىپ وتىرعانىن, ەكىجاقتى حالىقارالىق-قۇقىقتىق نەگىز بولعان سوڭ, ولاردىڭ ارەكەتتەرىن ەشكىم ايىپتاي المايتىنىن ايتتى.
رەسەي پرەزيدەنتىنىڭ ءباسپاسوز حاتشىسى د.پەسكوۆ وسى ماسەلەگە قاتىستى مالىمدەمەسىندە ءوز ەلىنىڭ ۆەنەسۋەلانىڭ ىشكى ىستەرىنە ارالاسپايتىنىن جانە باسقا دا ءۇشىنشى ەلدەردىڭ وسىلاي ىستەگەنىن قالايتىنىن ايتىپ, جاقاۋراتتى.
وعان دەيىن ماسكەۋدەگى ۆەنەسۋەلا ەلشىلىگىنىڭ اسكەري اتتاشەسى حوسە رافاەل توررەالبا پەرەس تە ءمالىمدەمە جاساپ, رەسەي اسكەريلەرىنىڭ ۆەنەسۋەلاعا تەك اسكەري-تەحنيكالىق ىنتىماقتاستىق ماسەلەلەرىن تالقىلاۋعا بارعانىن ايتىپ, ەشقانداي بىرلەسكەن وپەراتسيا جاسالمايتىنىن مالىمدەگەن.
سونىمەن تەكەتىرەس ۆەنەسۋەلانىڭ ىشىندە عانا ەمەس, سىرتىندا دا ءجۇرىپ جاتىر. التىنشى ساۋىردە ح.گۋايدو مادۋرونى تاقتان تايدىرۋعا باعىتتالعان بەلسەندى ارەكەتتەرگە باراتىنىن جاريالاپ ۇلگەردى. ونىڭ قانداي ارەكەتتەر ەكەندىگى ازىرگە بەلگىسىز. ەلدەگى ەكونوميكالىق تىعىرىق, سونىڭ ىشىندە ەلەكتر قۋاتىنىڭ ءجيى ءوشىرىلۋى وعان «جاقتاس» بولىپ تۇر. ال مادۋرو بولسا ەلەكتر قۋاتتارى جۇيەسىن اقش قاساقانا ىستەن شىعارۋدا دەپ امەريكانى ايىپتاۋدا. ترامپ مادۋرونى اقش-تىڭ قايىرىمدىق كومەكتەرىنەن باس تارتقانى ءۇشىن ايىپتادى. «ءبىز ۆەنەسۋەلانىڭ ازاماتتارى ءۇشىن بىرنەشە ميلليون دوللاردىڭ كومەگىن جيناعان ەدىك, سودان مادۋرو باس تارتىپ وتىر. ول ءوز ازاماتتارىنىڭ اشىققانىن قالايتىن بولسا كەرەك» دەدى د.ترامپ. بۇل كومەكتەر كولۋمبيا ارقىلى جەتكىزىلمەك بولعان.
ال اقش-تىڭ مەملەكەتتىك حاتشىسى مايك پومپەو ۆاشينگتون ناتو-مەن بىرلەسىپ, الداعى اپتادا جاڭا سانكتسيالار جاسايتىنىن مالىمدەدى. ولار نەگىزىنەن رەسەيدىڭ ۋكرايناداعى بەلسەندىلىگىنە قارسى شارالار بولعانىمەن, ۆەنەسۋەلاداعى تەكەتىرەستى دە ەسكەرىپ جاساعالى وتىر.
الەمنىڭ ەكىنشى شەتىندە ورنالاسسا دا وسىنداي تەكەتىرەستەر ۇلكەن وقيعالارعا سوقتىرۋى مۇمكىن ەكەندىگىن ويلاعاندا, تەك كەلىسىم ۇستەلىندەگى شەشىمدەر عانا وركەنيەتتى جولدىڭ جالعىز قۇرالى ەكەندىگىنە كوز جەتكىزە تۇسەسىڭ. ال كەلىسىم بولماعان جەردە زاڭسىزدىق كۇش الاتىنىن كورىپ ءجۇرمىز.