بۇدان بىلاي اۆتوبۋس جۇرگىزۋشىلەرىنىڭ قىزمەتىنە قالا تۇرعىندارى تىكەلەي باعا بەرەدى. شاھارداعى جولاۋشىلار كولىگى مەكەمەلەرىنىڭ قاۋىمداستىعى جۇرگىزۋشىلەر تۋرالى ارنايى دەرەكتەر قورىن جاساعان. مۇندا جۇرگىزۋشىنىڭ ەڭبەك ءوتىلى, جول ەرەجەسىن قانشا رەت بۇزعانى, وعان سالىنعان ايىپپۇلدار مەن جولاۋشىلار تاراپىنان شاعىم العان-الماعانى تۇتاستاي كومپيۋتەردە ساقتالىپ تۇرادى.
وسى مالىمەتتەر ارقىلى قىزمەتكەردىڭ رەيتينگىسى انىقتالادى. ءتىپتى الدىڭعى قاتاردان كورىنبەگەندەر «قارا تىزىمگە» ىلىككەن جاعدايدا باسقا اۆتوپاركتەرگە جۇمىسقا تۇرا الماۋى مۇمكىن. ازىرگە دەرەكتەر قورىنا 3 مىڭ 416 قوعامدىق كولىك جۇرگىزۋشىنىڭ مالىمەتى ەنگىزىلىپتى.
– قالامىزدا كولىك جۇرگىزۋشىلەرى وتە كوپ. سول سەبەپتى, بىرىڭعاي دەرەكتەر قورىن جاسادىق. 600 جۇرگىزۋشىنى «ەڭبەك» باعدارلاماسى بويىنشا قايتا وقۋعا جىبەردىك. جۇمىسىنا سالعىرت قارايتىنداردى بوساتامىز. اتتەستاتسيادان وتكىزۋ بارىسىندا ولاردىڭ جارتىسىنا جۋىعى جول ەرەجەسىن بىلمەيتىن بولىپ شىقتى, – دەيدى الماتى قالاسى اكىمىنىڭ ورىنباسارى ەرلان اۋكەنوۆ.
الماتىداعى اۆتوبۋس پاركتەرى تۇتاستاي جاڭارتىلادى. وسى ماقساتتا 544 سۋ جاڭا اۆتوبۋس ساتىپ الىنعان. سونىمەن قاتار قالاداعى بارلىق قوعامدىق كولىكتەرگە باقىلاۋ كامەرالارى ورناتىلاتىن بولادى.
ارمان وكتيابر,
«ەگەمەن قازاقستان»
الماتى