نۇر-سۇلتاندا قازاقستان رەسپۋبليكاسى ۇلتتىق وليمپيادالىق كوميتەتىنىڭ باس حاتشىسى ساكەن مۇسايبەكوۆ پەن قازاقستانداعى جاپونيانىڭ توتەنشە جانە وكىلەتتى ەلشىسى تاتسۋكيحو كاساي كەزدەسۋ وتكىزدى. كەزدەسۋ بارىسىندا 2020 جىلى 24 شىلدە مەن 9 تامىز ارالىعىندا توكيودا وتەتىن وليمپيادا ويىندارىنا دايىندىق بارىسى تالقىلانىپ, ەكى تاراپ ءبىر-بىرىمەن كەڭىرەك تانىستى دەپ جازادى Olympic.kz.
«قازىرگى تاڭدا قر ۇوك پرەزيدەنتى تيمۋر ق ۇلىباەۆتىڭ تاپسىرماسىمەن ەلىمىزدىڭ وليمپيادالىق كوميتەتى 2020 جىلعى وليمپيادا ويىندارىنا ۇلتتىق قۇراما كوماندالاردى ماقساتتى تۇردە دايىنداۋعا كوشتى. بۇگىنگە دەيىن قازاقستان تاراپى جاپونيامەن ارىپتەستىك ورناتىپ ۇلگەردى. قر ۇوك پەن جاپونيانىڭ فۋكۋوكا, كاشيحارا جانە يباراكي پرەفەكتۋرالارى اراسىندا كەلىسىم ورناتىلىپ, قازاقستان سپورتشىلارى جاپونياداعى كليمات جاعدايىنا بەيىمدەلىپ, وقۋ-جاتتىعۋ جيىندارىن وتكىزە باستادى», - دەپ اتاپ ءوتتى قر ۇوك باس حاتشىسى ساكەن مۇسايبەكوۆ.
قازاقستان ۇوك سپورتتا دوپينگ قولدانۋعا «نولدىك توزىمدىلىك» باعىتىن ۇستانادى, سونداي-اق, ەلىمىزدەگى سپورتتىق مەديتسينانىڭ دامۋىنا مۇددەلى. وسى ورايدا, قر ۇوك باس حاتشىسى جاپونيادا مەديتسينا مەن فارماتسەۆتيكا سالاسىنىڭ العا باسقانىن ايتا كەلە, وسى سالادا ارىپتەستىك ورناتۋ تۋرالى ۇسىنىس ءبىلدىردى. جاپونيا ەلشىسى بۇل سۇراققا تولىعىمەن قىزىعۋشىلىق تانىتىپ, اتالعان ۇسىنىس بويىنشا بارلىق مۇمكىندىكتەردى قاراستىراتىنىن جەتكىزدى.
جيىن سوڭىندا قر ۇوك باس حاتشىسى تاتسۋكيحو كاساي مىرزانى قازاقستانداعى ەلشى قىزمەتىنە تاعايىندالۋىمەن تاعى ءبىر مارتە قۇتتىقتاپ, ءارى قاراي ارىپتەستىك دەڭگەيىن كوتەرە تۇسۋگە تىلەكتەستىك ءبىلدىردى. سونداي-اق, قازاقستان سپورتشىلارىنا توكيوداعى وليمپيادا ويىندارىندا ساتتىلىك تىلەدى.