ەلوردادا شارا جيەنقۇلوۆا اتىنداعى قازاق ءبيى بايقاۋى باستالدى

اشىلۋ سالتاناتىندا قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى بايقاۋ قاتىسۋشىلارىنا ساتتىلىك تىلەي وتىرىپ, مادەنيەت سالاسىنىڭ قىزمەتكەرلەرىن حالىقارالىق تەاتر كۇنىمەن قۇتتىقتادى.

ء«بىز قازىر تاريحي ۋاقىتتا ءومىر سۇرەمىز. تاۋەلسىزدىك جىلدارى قازاقستاننىڭ مادەنيەت سالاسى ۇلكەن بيىكتەرگە قول جەتكىزدى. ءبىزدىڭ ارتىستەر مەن ۇجىمدار الەمنىڭ ۇزدىك تەاترلارىندا ونەر كورسەتەدى. جەكەلەگەن دارىندارىمىزدى بارشا الەم مويىنداپ, قۇرمەت تۇتادى», دەپ اتاپ ءوتتى ارىستانبەك مۇحامەدي ۇلى.

بەسىنشى مەرەيتويلىق بايقاۋعا وڭىرلەردەن 150-دەن استام قاتىسۋشى كەلدى. ولار «انسامبلدەر», «جەكە ورىنداۋ», «بالەتمەيستەرلىك ونەر» نوميناتسيالارى بويىنشا جارىسقا تۇسەدى. ءداستۇرلى بايقاۋ قازاق ەسترادالىق جانە حالىقتىق بي سالاسىنداعى تالانتتى بيشىلەردى, بالەتمەيستەرلەر مەن پەداگوگتاردى انىقتاۋعا باعىتتالعان. بايقاۋ كاسىبي ۇجىمدار, جوعارى وقۋ ورىندارىنىڭ حورەوگرافيا فاكۋلتەتتەرى مەن كافەدرالارىنىڭ انسامبلدەرى اراسىندا وتەدى.

شارا ايماقتىق انسامبلدەردىڭ رەپەرتۋارىمەن, حورەوگرافتاردىڭ جاڭا ىزدەنىستەرىمەن تانىسۋعا, جارقىن ورىنداۋشىلاردى انىقتاۋعا, قاتىسۋشىلارعا قازاق ءبيى سالاسىنداعى شىعارماشىلىق جەتىستىكتەرىمەن, كاسىبي تاجىريبەمەن جانە بىلىممەن ءوزارا الماسۋعا مۇمكىندىك بەرەدى.

سونداي-اق اشىلۋ سالتاناتىنا قازاق ءبيى ونەرىنىڭ مايتالماندارى, وتاندىق جانە شەتەلدىك ارنايى شاقىرىلعان قوناقتار, بايقاۋ قاتىسۋشىلارى مەن جەتەكشىلەرى قاتىستى.   

ءۇش كۇنگە سوزىلاتىن بايقاۋدا قاتىسۋشىلار ءۇشىن قازاق ءبيىنىڭ جەتەكشى پەداگوگتارىنىڭ شەبەرلىك سىنىپتارى, «قازاق ءبيى» دەرەكتى ءفيلمى, قازاق كسر ەڭبەك سىڭىرگەن ءارتىسى, پروفەسسور تويعان ءىزىمنىڭ جەكە كوللەكتسياسىنان ساحنالىق كوستيۋمدەر كورمەسى جانە قازاق ۇلتتىق حورەوگرافيا اكادەمياسىنىڭ قازاق ءبيى زەرتحاناسىنىڭ تۇساۋكەسەرى وتەدى. جەڭىمپازدار 29 ناۋرىز كۇنى «استانا بالەت» تەاترىندا وتەتىن گالا-كونتسەرتتە جاريالانادى.  

شارا جيەنقۇلوۆا اتىنداعى بايقاۋ العاش رەت 1992 جىلى ا.ۆ. سەلەزنەۆ اتىنداعى الماتى حورەوگرافيالىق ۋچيليششەسىندە ءوتتى. II جانە III بايقاۋلاردى ورال قالاسىندا (2001, 2006) م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى وتكىزدى, ال 2012 جىلى قازاق ۇلتتىق ونەر ۋنيۆەرسيتەتىنىڭ ۇيىمداستىرۋىمەن وتكەن بايقاۋ شارا جيەنقۇلوۆانىڭ 100-جىلدىعىنا ارنالدى. بيىلعى شارا جيەنقۇلوۆا اتىنداعى V رەسپۋبليكالىق قازاق ءبيى بايقاۋىنىڭ قۇرىلتايشىسى مەن ۇيىمداستىرۋشىسى – قازاق ۇلتتىق حورەوگرافيا اكادەمياسى.