قالا اكىمى باقىت سۇلتانوۆ كوپبالالى انالارمەن كەزدەسىپ, كورسەتىلەتىن الەۋمەتتىك كومەك جايلى ايتىپ بەردى, دەپ حابارلايدى ەلوردا اكىمدىگىنىڭ رەسمي سايتى.
اكىم كوپبالالى انالارمەن № 55 مەكتەپتە كەزدەستى. سونداي-اق, كەزدەسۋگە قر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ, ءبىلىم جانە عىلىم ۆيتسە-ءمينيسترى بيبىگۇل اسىلوۆا, دەنساۋلىق ساقتاۋ ۆيتسە-ءمينيسترى ولجاس ابيشەۆ, يدم قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ قاتىستى.
باقىت سۇلتانوۆتىڭ حابارلاۋىنشا, ەلوردادا 10 095 كوپبالالى وتباسى تۇرادى. ولاردىڭ 4 688-ءى – «التىن القا» جانە «كۇمىس القا» يەگەرلەرى, 3458 ادام نەمەسە 684 وتباسى – از قامتىلعاندار. 25 719 مۇمكىندىگى شەكتەۋلى جان بار. ولاردىڭ 5316-ى – مۇگەدەكتىگى بار بالالار.
قازىرگى كۇنى اكىمدىك تۇرعىنداردى كەشەندى الەۋمەتتىك قولداۋ قىزمەتتەرى مەن شارالارىنىڭ كەشەنىن ازىرلەدى, وندا 13 الەۋمەتتىك ءىس توپتاستىرىلعان. سونىمەن قاتار, اكىمدىك 2 مىڭنان استام وتباسىنىڭ كوممۋنالدىق تولەمىن تولەۋدى ارتتىرۋدى, مۇگەدەك جاندى كۇتەتىن جانعا قوعامدىق كولىكتە تەگىن ءجۇرۋ قاراستىرىلعان, كۇتىمدى قاجەت ەتەتىن بالالارعا بەرىلەتىن كومەكتى 25 مىڭعا دەيىن ارتتىرۋ كوزدەلگەن (6,5 اەك-تەن 10 اەك دەيىن). مەملەكەتتىك الەۋمەتتىك تاپسىرىس شەڭبەرىندە تەگىن تەحنيكالىق جانە كاسىپتىك ءبىلىم بەرۋ ۇسىنىلادى.
«قولداۋدى ودان ءارى دە جالعاستىرامىز. ول ءۇشىن ءبىز بيۋدجەتتى وڭتايلاندىرامىز دا ۇنەمدەلگەن قاراجاتتى الەۋمەتتىك سالاعا جۇمسايمىز. وسىعان بايلانىستى قالالىق بيۋدجەتتەن كوپبالالى جانە از قامتىلعان وتباسىلاردى قولداۋعا 3,2 ملرد. تەڭگە بولىنگەن. قوسىمشا 8 الەۋمەتتىك كومەك قاراستىرىلادى. ناقتىراق ايتقاندا, كوپبالالى وتباسىدان شىققان وقۋشىلارعا, ستۋدەنتتەرگە قوعامدىق كولىكتە تەگىن ءجۇرۋ قاراستىرىلعان. كوپبالالى وتباسىدان شىققان 1-11 سىنىپ وقۋشىلارى تەگىن ىستىق تاماقپەن قامتاماسىز ەتىلەدى. وسىعان 971 ملن تەڭگە قاراستىرىلعان, ول قاتارعا 32 مىڭ بالا كىرىپ وتىر», – دەدى اكىم.
ودان بولەك, وسى بالالار تەگىن مەكتەپ فورماسىمەن جانە وقۋعا قاجەت كەرەك-جاراقپەن قامتاماسىز ەتىلەدى.
كوپبالالى جانە از قامتىلعان وتباسىلاردىڭ بالالارىنا, سونداي-اق مۇمكىندىگى شەكتەۋلى بالالارعا بالاباقشالاردان تەگىن ورىن بەرىلەدى.
سونىمەن قاتار, كوپبالالى وتباسىدان شىققان 180 بالاعا قالامىزداعى جوو-نا ارنايى گرانتتار بەرىلەدى.
«كوپبالالى انالارعا ستوماتولوگيالىق قىزمەتتەر (ساناتسيالاۋ, پروتەزدەۋ) تەگىن ۇسىنىلاتىن بولادى. بيۋدجەتتى قاراستىرعان سوڭ كوپبالالى وتباسىلار قاتتى وتىن الاتىندار كاتەگورياسىنا كىرگىزىلەتىن بولادى», – دەدى باقىت سۇلتانوۆ.