قوستاناي – ەلىمىزدىڭ استىقتى ءوڭىرى. قازاقستاندا سىرتقا شىعارىلاتىن ۇننىڭ تورتتەن ءبىرى قوستانايدا وندىرىلەدى. وڭدەۋ ونەركاسىبىنىڭ شيكىزات وندىرۋدەن اسىپ ءتۇسىپ, ونى كوز ۇشىندا قالدىرۋىنا وبلىستاعى ۇن تارتاتىن ديىرمەندەردىڭ قوسىپ وتىرعان ۇلەسى مول.
ىرگەتاسى 2006 جىلى قالانىپ, بۇگىندە قۋاتى جونىنەن الدىنا قارا سالماعان, سالانىڭ كوشباسشىسىنا اينالىپ وتىرعان «بەست قوستاناي» ديىرمەن كەشەنى بىلتىر جاڭعىرتۋدان كەيىن ەلباسىنىڭ قاتىسۋىمەن 11 جەلتوقساندا وتكەن تەلەكوپىردە تۇساۋىن كەستى. وڭدەۋ كاسىپورنىنا سالىنعان تۇرىك ينۆەستيتسياسى دا از ەمەس – 1,5 ميلليارد تەڭگە. «بەست قوستاناي» كومپانياسى جىلىنا 155 مىڭ توننا ۇن تارتادى.
– بۇل ديىرمەن كەشەنىنىڭ ەۋروپا مەن ازيادا تەڭدەسى جوق. ءتىپتى وسى ديىرمەننىڭ جابدىعى الىنعان تۇركيانىڭ وزىندە مۇنداي قۋاتتى ديىرمەن بولعان ەمەس. تاۋلىگىنە 700 توننا استىق وڭدەيتىن قۋاتى بار ديىرمەننىڭ بارلىق جۇمىس ۇدەرىسى كومپيۋتەرلەندىرىلگەن. مۋلتيجۇيەلىك باقىلاۋدان تۇرادى جانە كومپيۋتەرلىك باسقارۋ وندىرىسكە ادامنىڭ قاتىسۋىنسىز اۆتوماتتىق رەجىمدە جۇمىس ىستەۋگە مۇمكىندىك بەرەدى. ەلەۆاتورعا استىقتىڭ ءتۇسۋى مەن ۇن قالتالارعا سالىنىپ شىققانعا دەيىنگى بۇكىل وندىرىستىك تسيكل بىرىڭعاي كومپيۋتەرلىك ەسەپتە تۇر. تاۋلىكتىڭ قاي ساعاتىندا جانە الەمنىڭ كەز كەلگەن نۇكتەسىندە وتىرىپ, ينتەرنەت ارقىلى ديىرمەن جۇمىسىن باقىلاۋعا بولادى, – دەيدى «بەست قوستاناي» جاۋاپكەرشىلىگى شەكتەۋلى سەرىكتەستىگىنىڭ كوممەرتسيالىق ديرەكتورى ولەگ كۋرتۆاپوۆ.
قوستانايدا زاماناۋي ديىرمەن تەك «بەست قوستاناي» كومپانياسىندا ەمەس, ارينە. الايدا جاڭا ديىرمەن كەشەنىنىڭ باسقادان ارتىقشىلىعى كوپ. وزگە ديىرمەندەر ۇننىڭ ءۇش سۇرپىنا دەيىن شىعارادى. ال ۇزدىك تەحنولوگيانى وندىرىسكە ەنگىزگەن «بەست قوستاناي» ديىرمەن كەشەنىندە ۇننىڭ بەس سۇرىپى وندىرىلەدى. ەڭ باستىسى, بيداي ۇنىنىڭ قۇرامىنداعى اس اتاسىنىڭ قاسيەتىن كەمىتپەيتىن ا دارۋمەنى, تيامين, ريبوفلامين, نيكوتين قىشقىلى جانە تاعى دا سونداي ادام اعزاسىنا پايدالى زاتتار جويىلىپ كەتپەي, تۇتىنۋشىعا جەتەدى. بۇل ءۇشىن اۆتوماتتى لازەرلىك جۇيە ۇننىڭ ىلعالدىلىعىن, اقۋىز بەن مايدىڭ جويىلماۋىن 30 سەكۋند سايىن باقىلايدى.
– ەگەر جالپى وقىرمانعا تۇسىنىكتى تىلمەن ايتار بولسام, ۇننىڭ ديىرمەندە اعىپ جاتقان تاسقىنى لازەر ساۋلەسىنەن وتەدى, بۇل «InNRsCAn» جۇيەسى دەپ اتالادى. ول كامەرالاردان تۇرادى. ال سپەكترومەتر سول ساۋلەلەنگەن ۇننىڭ وزگەرىسىن ولشەيدى, ال كومپيۋتەر ونىڭ سپەكتروگرافيالىق ساراپتاماسىن جاسايدى. ەگەر ساراپتاما ناتيجەسى باعدارلامادا بەرىلگەن ۇننىڭ پارامەترىمەن سايكەس كەلمەسە, وعان تۇتاس كومپيۋتەرلىك باقىلاۋ جۇيەسى سول سەكۋندتا «جاۋاپ بەرەدى» دە, ءوندىرىس توقتاۋعا دەيىن بارادى. مىنە, باقىلاۋ جۇيەسى ءونىم ساپاسىن انىقتاۋدا وندىرىستىك اقاۋدى نەمەسە ادامنان كەتكەن قاتەلىكتى وسىلاي بولدىرمايدى, – دەيدى ولەگ ريشاتوۆيچ.
«بەست قوستاناي» كومپانياسى وندىرگەن ۇننىڭ ساپاسىن قازىر رەسەي, قىتاي, وزبەكستان, قىرعىزستان, تاجىكستان, تۇرىكمەنستان, ازەربايجان, اۋعانستان تۇتىنۋشىلارى ءبىلىپ تە قالعان. ۇن ءوندىرىسىنىڭ حالىقارالىق ستاندارتقا سايكەستىگى ISO – 22000 سەرتيفيكاتىمەن انىقتالادى جانە «حالال» ءونىم. ءوندىرىس قايتا ىسكە قوسىلعان جەلتوقسان ايىنان بەرى 28 مىڭ توننا ۇن ءوندىرىلىپ, سونىڭ 95 پايىزى ەكسپورتقا جىبەرىلدى.
«بەست قوستاناي» جشس 2014, 2015, 2016 جىلدارى قاتارىنان «سالا كوشباسشىسى» اتاعىن العان ەدى. ديىرمەن كەشەنى وندىرگەن ۇن ءتۇرلى دەڭگەيدەگى ازىق-ت ۇلىك تاۋارلارى كورمەلەرى مەن اگروفورۋمداردا ىلعي جۇلدەمەن ورالادى. 2016 جىلى ناۋرىزدا جەنەۆاداعى حالىقارالىق BID ۇيىمى وندىرۋشىلەر اراسىندا تاۋاردىڭ QC-100 ساپا نورماسىنا سايكەستىگىن باعالاعان كونكۋرس ناتيجەسى بويىنشا «بەست قوستاناي» كومپانياسىن «التىن» مەدالمەن ماراپاتتادى. كومپانيا وزىق عىلىمي-زەرتتەۋلەردى وندىرىسكە ەنگىزىپ, جوعارى ساپالى بيداي ۇنىن الادى. ديىرمەن كەشەنى قوستاناي ءوڭىرى ديقاندارى وسىرگەن بيدايدى وڭدەيدى. كومپانيا ماماندارىنىڭ ايتۋىنشا, قوستاناي بيدايىنداي ساپالى استىقتى الەمنەن تابۋ قيىن.
ديىرمەن كەشەنىنىڭ عيماراتى دا, جابدىقتارى دا ەڭ سوڭعى زاماناۋي سيپاتقا يە دەر ەدىك. كەشەن ورنالاسقان وندىرىستىك عيماراتتىڭ جەتى قاباتىنا دا ارنايى بەتون مەن مەتالل توسەلگەن.
– ەپوكسيدتى شايىردىڭ نەگىزىندەگى ەكى قۇرامالى ماستيكا ارنايى مەديتسينا مەكەمەلەرى مەن تاماق وندىرىسىندە قولدانىلادى. بۇل اۋانىڭ شاڭدانىپ جانە جۇمىس ىستەپ تۇرعان جابدىقتاردان مەتالدىڭ ۇشۋىنا كەدەرگى جاسايدى. ءبىز ازىق-تۇلىك وندىرەتىن بولعاندىقتان, ونىڭ تازالىعىن, سانيتارلىق-گيگيەنالىق تالاپتاردى بارىنشا ساقتايمىز, – دەيدى و.كۋرتۆاپوۆ.
وڭدەۋ كاسىپورنىندا سوڭعى جاڭعىرتۋ جۇمىستارىنان كەيىن جۇمىسشىلار سانى تاعى دا 50 ادامعا كوبەيدى, قازىر ديىرمەندە 170 جۇمىسشى ەڭبەك ەتەدى. «بەست قوستاناي» كومپانياسى وڭىردەگى جانە قوستاناي قالاسىنداعى قايىرىمدىلىق اكتسيالارىنا, جالپى الەۋمەتتىك جوبالارعا بەلسەنە قاتىسادى.
ءنازيرا جارىمبەت,
«Egemen Qazaqstan»
قوستاناي