«قالامقاس» كەن ورنىنداعى جاعداي بويىنشا قىلمىستىق ءىس قوزعالدى

تىكەلەي ەفيردە وتكەن بريفينگ بارىسىندا «قازمۇنايگاز» ۇك اق باسقارما توراعاسىنىڭ ءوندىرىس جونىندەگى ورىنباسارى ج.ماراباەۆ قالامقاس كەن ورنىنىڭ ۇڭعىماسىندا بولعان جاعداي تۋرالى ايتتى. اعىمداعى جىلدىڭ 13 ناۋرىزىندا «ماڭعىستاۋمۇنايگاز» اق-عا قاراستى قالامقاس كەن ورنىنىڭ كۇردەلى ۋچاسكەسىندە ۇڭعىمانىڭ قۇرىلىسى بارىسىندا كەن ورنىنىڭ ورتالىق بولىگىنە ءتان تەحنوگەندىك سيپاتتاعى گاز-سۋ ارالاس تابيعي بۇرقاعى شىققان. ناۋرىزدىڭ 13-24 كۇندەرى ماماندار كۇردەلەندىرىلگەن بۇرعىلاۋ ەرىتىندىسىمەن ۇڭعىمانى جۋ جونىندەگى جۇمىستاردى, سونداي-اق گريفونداردى جويۋ ءۇشىن جوندەۋ-وقشاۋلاۋ جۇمىستارىن جۇرگىزگەن. وسى جىلعى 25 ناۋرىزدا ساعات 04:46-دا 8232 ۇڭعىمانىڭ اۋماعىندا 16 ناۋرىزدا جەر بەتىنە شىققان گاز-سۋ قوسپاسىنىڭ وشاعى جانا باستادى. 04 ساعات 58 مينۋتتا «سەمسەر-ءورت ءسوندىرۋشى» جشس جاۋىنگەرلىك توبى شاقىرىلعان ورىنعا كەلدى. قۇربان بولعان جانە زارداپ شەككەندەر جوق.

اپات ورنىنا 25 ناۋرىزدا ساعات 14:30-عا قاراي ءورتتى اۋىزدىقتاۋ ءۇشىن قوسىمشا اقتاۋ قالاسىنىڭ موقق 6 ءورت ءسوندىرۋ توبى كەلىپ جەتكەن. ءورتتى سوندىرۋگە 4 اۆتوتسيستەرنا, 1 جىلجىمالى سورعى ستانساسى, 1 گاز-سۋ ءسوندىرۋشى اۆتوكولىگى كەلتىرىلگەن. قازىرگى ۋاقىتتا ءورت شىققان جەردە ماڭعىستاۋ وبلىسىنىڭ تجد, «سەمسەر – ءورت ءسوندىرۋشى» جشس جانە «فاير پروتەكشن لتد» جشس جەكە قۇرامىنىڭ 53 ادامى جانە ءورت ءسوندىرۋ تەحنيكاسىنىڭ 12 بىرلىگى جۇمىلدىرىلعان. ءورتتى ءسوندىرۋ بارىسىندا جانعان جەردى تاسىمالداناتىن لافەتتىك وقپاندارمەن ءسوندىرۋ ءۇشىن بىرنەشە رەت تالپىنىستار جاسالدى, الايدا ءورت وشاعىنا كىرمە جولداردىڭ جوقتىعىنا بايلانىستى ءورتتى اۋىزدىقتاۋ مۇمكىن بولمادى. وپەراتيۆتى ءورت ءسوندىرۋ شتابىن ماڭعىستاۋ وبلىسى تجد باستىعى ق.بازارباەۆ باسقارۋدا. شتاب قۇرامىنا «ماڭعىستاۋمۇنايگاز» اق باس ديرەكتورىنىڭ ءبىرىنشى ورىنباسارى ب. يمانباەۆ, قم يندۋستريالىق دامۋ جانە ونەركاسىپتىك قاۋىپسىزدىك كوميتەتى دەپارتامەنتىنىڭ باسشىسى س.قازاقباەۆ, كااقق روش ماڭعىستاۋ فيليالىنىڭ (بۇرقاققا قارسى قىزمەت), «سيبۋ» جشس وكىلدەرى جانە باسقالار كىردى.

گۇلايىم شىنتەمىرقىزى,

«Egemen Qazaqstan»

ماڭعىستاۋ وبلىسى