جاقىندا جارما اۋدانىنىڭ ورتالىعى – قالباتاۋ اۋىلىندا « ۇلى دالانىڭ جەتى قىرى – ۇلتتىق ۇلى قۇندىلىق» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى. الماتىداعى م.اۋەزوۆ اتىنداعى ادەبيەت جانە ونەر ينستيتۋتى ابايتانۋ جانە ادەبيەت تاريحى ءبولىمىنىڭ مەڭگەرۋشىسى, پروفەسسور سەرىكقازى قوراباي, سەمەي قالاسىنداعى شاكارىم اتىنداعى مەملەكەتتىك ۋنيۆەرسيتەتىنىڭ پروفەسسورى, تاريحشى مۇحتاربەك كارىموۆ, وسى وقۋ ورنىنداعى اقىندار مەكتەبىنىڭ جەتەكشىسى ايمان اقتانوۆا سىندى عالىمدار قاتىسقان جيىندا جارما ءوڭىرىنىڭ داڭقتى تۇلعالارىن ۇلىقتاۋ جايى جان-جاقتى ءسوز بولدى.
كونفەرەنتسيانى اۋدان اكىمىنىڭ ورىنباسارى ايدار يبراەۆ اشقاننان كەيىن سەرىكقازى قوراباي ءسوز الىپ, مازمۇندى بايانداما جاساپ, ءسوزىنىڭ سوڭىندا بىرقاتار ۇسىنىستارىن ورتاعا سالدى. «اباي اۋدانى قۇندىزدى اۋىلى شەتىندەگى جۇرەكادىر جوتاسىنا جەرلەنگەن اقتامبەردى جىراۋ مەن سابىرباي, تۇبەك اقىنداردىڭ باسىنا كۇمبەزدى كەسەنەلەر ورناتىلسا, ۇشبيىك اۋىلىندا سىباننان شىققان 17 اقىنعا مۋزەي اشىلسا, قالباتاۋداعى كوشەلەردىڭ بىرىنە «ون جەتى اقىن» اتاۋى بەرىلسە, جارما اۋدانىندا « ۇلى بابالار ىزىمەن» اتتى عىلىمي-تانىمدىق ەكسپەديتسيا ۇيىمداستىرىلسا دەيمىن. اقتامبەردى جىراۋ, اقتايلاق بي, دۋلات, سابىرباي, تۇبەك اقىندارعا اۋداندىق ولكەتانۋ مۋزەيىنەن ارنايى بۇرىشتار اشىلسا, ولاردىڭ ولەڭدەرىن جاتقا ايتۋدان وقۋشىلار اراسىندا اۋداندىق سايىس وتكىزىلسە ارتىق ەتپەس ەدى.
جارما وڭىرىنەن شىققان قازاق تسيرك ونەرىنىڭ نەگىزىن سالۋشى, «اعاشاياق» اتانىپ كەتكەن ايگىلى نازاروللا ءجۇندىباي ۇلى اتىنداعى ايماقتىق ونەر بايقاۋى ۇيىمداستىرىلسا, بۇكىل ورتا جۇزدە بايگە بەرمەگەن اتاقتى تۇلپار قاراشەگىر شىققان كوكەنتوعاي مەكەنىنە بەلگى قويىلسا عيبراتتى ءىس بولار ەدى», - دەيدى س.قوراباي.
ازامات قاسىم,
«Egemen Qazaqstan»
شىعىس قازاقستان وبلىسى,
جارما اۋدانى