شىعىس مەديتسيناسىنىڭ شيپاسى بار

سەمەيدەگى جەدەل مەديتسي­نالىق جاردەم اۋرۋحاناسىن ارالاۋ بارىسىندا وبلىس اكىمىنىڭ ورىنباسارى اسەم ءنۇسىپوۆا مەن وب­لىس­تىق دەنساۋلىق ساقتاۋ باس­قار­ماسىنىڭ باسشىسى مارات شورانوۆ وسىندا قازاقستان بو­يىن­شا تۇڭعىش رەت اشىلعالى وتىرعان گيبريدتى وپەراتسيالىق زال جايىندا ايتىپ بەردى. ەلور­دالىق دارىگەرلەردىڭ وڭىرگە ساپارىنىڭ العاشقى كۇنىنىڭ قورى­تىندىسىندا ءبىزدىڭ وبلىس­تىڭ 3 اۋرۋحاناسى مەن استا­­ناداعى ۇلتتىق عىلىمي كار­ديو­حيرۋرگيا, ۇلتتىق نەيرو­حيرۋر­گيا, تراۆماتولوگيا جانە ورتوپەديا عىلىمي-زەرتتەۋ ور­تا­لىق­تارىنىڭ باسشىلارى ىن­تىماقتاستىق جونىندەگى مەمو­راندۋمعا قول قويدى. 

وبلىس اكىمدىگىندە وتكەن شارا بارىسىندا ەلىمىزدەگى ەڭ ۇزدىك عىلىمي ورتالىقتاردىڭ جەتەكشىلەرى ءوڭىر مەديتسيناسىنا قاتىستى وزدەرىنىڭ ويلارىمەن, العان اسەرلەرىمەن ءبو­لىستى. «مەديتسينا – وتە نازىك, كۇر­دەلى سالا. ەلىمىزدىڭ بارلىق ازا­مات­تارى ساپالى مەديتسينالىق قىز­مەت الۋعا قاقىلى. مەنىڭشە, مەديتسينالىق مەكەمەلەردى رەس­پۋبليكالىق ورتالىق, وبلىستىق ورتالىق دەپ ءبولۋ دۇرىس ەمەس. بۇل كەشەگى كەڭەستىك زاماننان قالعان سارقىنشاق دەپ ويلايمىن. ال سىزدەردىڭ ءوڭىر مەديتسيناسىن بيىك دەڭگەيگە كوتەرۋ باعىتىنداعى قادامدارىڭىز كوڭىلگە قۋانىش ۇيالاتادى. سە­مەيدەگى جەدەل مەديتسينالىق جاردەم اۋرۋحاناسى بازاسىندا گيبريدتى وپەراتسيالىق زال اشپاق ەكەنسىزدەر. مۇنىڭ كەرەمەتى – بىر­نەشە باعىتتى قامتيتىن امبە­باپتىعىندا, بۇل جەردە تەك كارديوحيرۋرگيا نەمەسە نەيرو­حيرۋرگيا ەمەس, تراۆما­تولوگيا بويىنشا دا وپەراتسيا جاساۋعا بولادى. مۇنداي وپەراتسيالىق زال قازاقستاندا عانا ەمەس, الەمدە سيرەك. سون­دىقتان بۇل قادامدارىڭىز ەلى­مىز­دەگى مەديتسينالىق قىز­مەت كور­سەتۋدى بۇرىن-سوڭدى بول­ما­­عان جاڭا ساپاعا شىعارادى دەپ ۇمىتتەنەمىن. وسكەمەن اۋرۋحا­نالارىنداعى زاماناۋي مە­ديتسينالىق قۇرىلعىلار كو­­­­مەگىمەن بارلىق وپەراتسيا تۇر­­­لەرىن جاساۋعا بولادى دەپ سەنىممەن ايتا الامىن. مۇنى كور­سەتۋ كەرەك. ناسيحاتتاۋ قا­جەت. ىرگەدەگى رەسەيدىڭ وسكەمەن­گە جاقىن قالالارىنىڭ تۇرعىن­دارى وسىندا كەلىپ, ەم السا جا­مان با؟! مۇنداي باعاسى قىم­­بات, جوعارى تەحنولوگيالى قۇ­رىل­عىلار بوس تۇرماۋى كەرەك, كۇنى-ءتۇنى ەل يگى­لىگىنە جۇمىس ىستەۋى كەرەك», دەدى استاناداعى ۇلت­تىق عىلىمي كار­ديوحيرۋرگيا ورتالىعىنىڭ ديرەكتورى يۋري پيا. 

ال كەزدەسۋدە ءسوز العان ۇلت­تىق نەيروحيرۋرگيا ورتالى­عىنىڭ ديرەكتورى سەرىك اقشو­لاقوۆ وبلىس اكىمىنە: «سە­مەيدەگى جەدەل مەديتسينالىق جاردەم اۋرۋحاناسى بازاسىن­دا اشىلاتىن گيبريدتى وپەرا­تسيالىق زالىندا العاشقى وپەراتسيانى ءبىز جاساساق» دەگەن تىلە­گىن جەتكىزدى. سونىمەن قاتار الىس جانە جاقىن شەتەلدەن بىلىكتى دارىگەرلەردى شاقىرىپ, كونفەرەن­تسيا وتكىزسەك دەگەن ۇسىنىسىن ايتتى. 

ورايى كەلگەندە ايتا كەتەيىك, وبلىس اكىمى دانيال احمەتوۆ قاڭ­تار ايىندا ەلورداعا ارنايى بارىپ, ۇلتتىق عىلىمي كار­ديو­حيرۋرگيا, ۇلتتىق نەيروحي­رۋر­گيا, تراۆماتولوگيا جانە ور­تو­پەديا عىلىمي-زەرتتەۋ ور­تا­لىق­تارىنىڭ باسشىلارىمەن كەزدەسىپ, ولاردى ءوڭىر اۋرۋحا­نا­­لا­رىمەن ىنتىماقتاستىق ورنا­تۋعا, فيليال­دارىن اشۋعا شاقىرعان ەدى. بۇل ساپاردى سول كەز­دەسۋدىڭ العاشقى ناتيجەلەرى, ۇلكەن جۇمىستىڭ باسى دەۋگە بولادى. 

وسكەمەن