الماتى قالاسىنىڭ تجد-دە بەس بالانى قۇتقارعان 25 جاسار باتىرعا قۇرمەت كورسەتىلدى. ماراپاتتاۋ راسىمىنە قازاقستان رەسپۋبليكاسى قم راديوەلەكترونيكا جانە بايلانىس اسكەري-ينجەنەرلىك ينستيتۋتى وقۋ ورتالىعىنىڭ قىزمەتكەرلەرى قاتىستى. بۇل تۋرالى الماتى قالاسى تجد ءباسپاسوز قىزمەتى حابارلادى.
ادامداردىڭ ءومىرىن قۇتقارۋدا كورسەتكەن باتىلدىعى مەن ەرلىگى ءۇشىن نۇرقانات مۇرات ۇلى دۇيسەن «توتەنشە جاعدايداعى ەرلىگى ءۇشىن» مەدالىمەن ماراپاتتالدى.
ىشكى ىستەر ءمينيسترىنىڭ اتىنان الماتى قالاسى توتەنشە جاعدايلار دەپارتامەنتىنىڭ باستىعى, ءورت ءسوندىرۋ قىزمەتى گەنەرال-مايورى سەرىك اۋباكىروۆ دۇيسەن نۇرقاناتقا اتالعان ماراپاتتى سالتاناتتى تۇردە تابىس ەتتى.
سەرىك عابدول ۇلى جالعىز ءوزى جانىپ جاتقان ۇيدەگى بەس بالانى جالىننان امان-ەسەن الىپ شىققان دۇيسەن نۇرقاناتتىڭ كاسىبي تاعىلىمدامادان وتۋىنە, سونداي-اق وعان ەرەكشە جاعدايلاردا ارقاشاندا دايىن بولۋعا ۇيرەتكەن كومانديرلەرىنە العىس ايتتى.
ءورت 2019 جىلعى 11 ناۋرىز كۇنى ساعات 18.00-دە الماتى قالاسىنىڭ جەتىسۋ اۋدانىنداعى پەرۆومايسكي كوشەسىندە ورنالاسقان جاتاقحانادا بولدى.
ءورت ءسوندىرۋ بريگادالارى كەلگەنگە دەيىن ۇيدىڭ جانىنان ءوتىپ بارا جاتقان دۇيسەن نۇرقانات تەرەزەدەن ايعايلاعان داۋىستى ەستىپ, تەز ارادا كومەككە ۇمتىلعان بولاتىن.