مەديتسينا سالاسىندا قوردالانعان تاقىرىپتىڭ ءبىرى – ارناۋلى جوعارى وقۋ ورىندارىندا پەدياتر مامانداردى بولەك دايارلاپ, ولاردىڭ بىلىكتىلىگىن كوتەرۋ.
ويتكەنى دۇنيە ەسىگىن اشقان ءسابيدىڭ اعزاسى مەن ەرەسەك ادامداردىڭ كەسەلدەرىندە ۇلكەن ايىرماشىلىقتار بولاتىنى قاراپايىم جاندارعا دا ايان. بالا اناتومياسى – قۇرساققا بىتكەن ساتتەن باستاپ بىرتىندەپ جەتىلىپ كەلە جاتقان, بىراق گورموندارى ءالى تۇزىلمەگەن باسقا الەم. بۇل ونى ەگجەي-تەگجەيلى زەرتتەگەن ماماندارعا عانا بەلگىلى. ماسەلەن, مەديتسينا ماماندارى پەدياترلاردىڭ بىلەتىنىن ەرەسەك ادامداردى قارايتىن دارىگەرلەر بىلە بەرمەيتىنىن مويىندايدى.
جاستار جىلى اياسىندا وتكىزىلگەن «جاس زەرتتەۋشى: زاماناۋي پەدياتريا جانە بالالار حيرۋرگياسى دامۋىنىڭ سىن-تەگەۋرىنى مەن كەلەشەگى» تاقىرىبىندا وتكەن عىلىمي-تاجىريبەلىك كونفەرەنتسيانىڭ كوتەرگەن ماسەلەلەرى اۋقىمدى.
حالىقارالىق كونفەرەنتسيادا بالالارداعى اۋرۋلاردى ەمدەۋ مەن دياگنوستيكالاۋدىڭ زاماناۋي ادىستەرى, بالالارعا مەديتسينالىق كومەك بەرۋدى ۇيىمداستىرۋ اسپەكتىلەرى, سيرەك اۋرۋلاردى ەمدەۋدى جەتىلدىرۋ, ءتۇرلى حيرۋرگيالىق جانە سوماتيكالىق اۋىتقۋلارى بار بالالاردى وڭالتۋ, پسيحولوگيالىق جانە مەديتسينالىق-الەۋمەتتىك بەيىمدەۋ, بالالار جاسىنداعى ينتەنسيۆتى تەراپيا مەن انەستەزيولوگيا, ەم بارىسىندا قولدانىلاتىن زاماناۋي مەديتسينالىق تەحنولوگيالار سياقتى وزەكتى ماسەلەلەر تالقىلانىپ, عىلىمي جوبالار ۇسىنىلدى. سونىمەن قاتار پەدياتريا تاجىريبەسىندە سيرەك كەزدەسەتىن ءارتۇرلى كلينيكالىق جاعدايلار كوپتىڭ تالقىسىنا سالىندى.
دەنساۋلىق ساقتاۋ مينيسترلىگى, پەدياتريا جانە بالالار حيرۋرگياسى عىلىمي ورتالىعى, «پەدياترلار وداعى» قوعامدىق بىرلەستىگى مەن س.اسفەندياروۆ اتىنداعى قازۇمۋ-دىڭ بالالار اۋرۋلارى كافەدراسىنىڭ ۇيىمداستىرۋىمەن وتكەن كونفەرەنتسياعا رەسەي, وزبەكستان, قىرعىز جانە ەلىمىزدىڭ 200-دەن استام جاس پەدياترلارى مەن بالالار حيرۋرگ-دارىگەرلەرى دە قاتىستى. كونفەرەنتسيادا سالالىق 100-دەن استام عىلىمي جۇمىستار, ارنايى باياندامالار, ماقالالار جانە پوستەرلىك باياندامالار ۇسىنىلدى. ءارتۇرلى جوو مەن ەلدەردىڭ جاس دەلەگاتتارى پەدياتريا جانە بالالار حيرۋرگياسى سالاسىنداعى تاجىريبەلەرىمەن ءبولىستى.
«زاماناۋي مەديتسينالىق عىلىم مەن پراكتيكانىڭ دامۋى جاس عالىمداردىڭ عىلىمي الەۋەتىنسىز مۇمكىن ەمەس. سوندىقتان ءبىز جاس عالىمداردىڭ عىلىمي الەۋەتىن ارتتىرۋ, جاس ىزدەنۋشىلەردى عىلىممەن اينالىسۋعا شاقىرۋ ماقساتىندا وسى شارانى وتكىزدىك. عىلىمي-زەرتتەۋ جۇمىستارى تاجىريبەمەن ۇشتاسۋى كەرەك. بۇگىنگى كونفەرەنتسيا بالالار جاسىنداعى اۋرۋلاردى دياگنوستيكالاۋ, ەمدەۋ جانە الدىن الۋداعى نەگىزگى ماسەلەلەردىڭ بەتىن اشۋعا مۇمكىندىك بەرەدى دەپ ۇمىتتەنەمىز», دەدى پەدياتريا جانە بالالار حيرۋرگياسى عىلىمي ورتالىعىنىڭ باسشىسى ريزا بورانباەۆا.
س.اسفەندياروۆ اتىنداعى قازۇمۋ-دىڭ رەكتورى تالعات نۇرعوجين: «مەملەكەت باسشىسىنىڭ بيىلعى جىلدى جاستار جىلى دەپ جاريالاۋى قوعامنىڭ قوزعاۋشى كۇشى مەديتسينا سالاسىنداعى جاستارعا جاڭا سەرپىن بەرەدى دەپ ويلايمىن. جاستار قاي كەزدە دە جاستىق جىگەرىنەن تانباي, دەنساۋلىق سالاسىن دامىتۋعا, اسىرەسە بالالار ساۋلىعى جولىندا بار كۇش-جىگەرىن سالا ەڭبەك ەتەدى دەپ سەنەمىن», دەيدى.
عىلىمي جوبالاردى پەدياتريا جانە حيرۋرگيا سالاسىنىڭ بىلىكتى ماماندارىنان قۇرالعان قازىلار القاسى سارالادى. كونفەرەنتسيا بارىسىندا ۇسىنىلعان جۇمىستار «ۇزدىك بايانداما» (پەدياتريا جانە بالالار حيرۋرگياسى سالاسى بويىنشا), «ۇزدىك ماقالا», «ۇزدىك پوستەرلىك بايانداما» اتالىمدارى بويىنشا ارنايى ديپلومدارمەن ماراپاتتالدى. ۇزدىك باياندامالار مەن عىلىمي ماقالالار پەدياتريا جانە بالالار حيرۋرگياسى عىلىمي ورتالىعىنا قاراستى «پەدياتريا جانە بالالار حيرۋرگياسى» عىلىمي جۋرنالىندا جاريالاندى. جۋرنال عىلىمي قىزمەتتەردىڭ ناتيجەلەرىن جاريالاۋ ءۇشىن ءبىلىم جانە عىلىم مينيسترلىگىنىڭ عىلىم جانە ءبىلىم سالاسىن قاداعالاۋ كوميتەتىمەن ۇسىنىلعان, سونداي-اق رەسەيلىك عىلىمي دايەكسوز الۋ يندەكسى (رينتس) مالىمەتتەر بازاسىنا كىرەدى.
الداعى ۋاقىتتا عىلىمي كونفەرەنتسيا ءداستۇرلى شاراعا اينالماق.
ايناش ەسالي,
«Egemen Qazaqstan»
الماتى