مەملەكەتتىك ءتىلدىڭ ءرولىن ارتتىرۋدى نەگىزگە الا وتىرىپ, «وتانداستار قورى» كەاق مەن قر تۇڭعىش پرەزيدەنتى – ەلباسى قورى جانىنداعى مەملەكەتتىك ءتىلدى دامىتۋ قورى ىنتىماقتاستىق تۋرالى مەموراندۋمعا قول قويدى. تاراپتار شەتەلدىك قانداستاردىڭ انا ءتىلىن ەركىن مەڭگەرۋىنە جاعداي جاساۋعا, سونداي-اق ءتىل ساياساتىنىڭ ءتيىمدى ىسكە اسۋىنا اتسالىسۋعا نيەتتى. بۇل تۋرالى «وتانداستار قورى» كەاق ءباسپاسوز قىزمەتى حابارلادى.
«وتانداستار قورىنىڭ» ءبىرىنشى ۆيتسە-پرەزيدەنتى تالعات ادۋوۆتىڭ ايتۋىنشا, جاقىن ارادا شەتەلدەگى قانداستارعا ارنالعان قازاق ءتىلىن قاشىقتىقتان ۇيرەنۋدىڭ تەگىن كۋرستارى باستالادى. ساباقتار Skype ارقىلى ونلاين رەجيمدە وتەتىن بولادى.
"وسى ماقساتتا ءبىز ءار ەلدەگى مۇددەلى قازاق ەتنومادەني جانە قوعامدىق بىرلەستىكتەرمەن تىعىز بايلانىس ورناتپاقپىز. سولاردىڭ كومەگىمەن ينتەراكتيۆتى تاقتالارمەن جابدىقتالاتىن ارنايى قازاق ءتىلى كابينەتتەرىن ۇيىمداستىرامىز. بۇل باستامامىز جەكسەنبىلىك مەكتەپتەر جەلىسى سياقتى بولادى. ياعني, ءتىلدى ۇيرەنۋشىلەر ءوز بەتىنشە وقىپ قانا قويماي, ءوزى سياقتى باسقا دا تالىمگەرلەرمەن بىرگە جينالىپ, ارالاسا الادى, ساباقتى بىرىگىپ وتە الادى. ءتىلدى كەز كەلگەن ۋاقىتتا كابينەتتەن تىس ونلاين وقي الۋ مۇمكىندىگىنەن بولەك, ولاردىڭ بەتپە-بەت جولىعۋ الاڭىن ۇيىمداستىرۋىمىز كەرەك دەپ سانادىق" دەدى ت. ادۋوۆ.
مەملەكەتتىك ءتىلدى دامىتۋ قورىنىڭ باسشىسى ازات شاۋەەۆتىڭ سوزىنە سۇيەنسەك, شەتەلدىك وتانداستار ءۇشىن قازاق ءتىلىن يگەرۋدىڭ يننوۆاتسيالىق ادىستەرگە نەگىزدەلگەن ءتيىمدى جۇيەسى ازىرلەنۋدە.
«قاشىقتىقتان وقىتۋ جۇيەسى تۋرالى ايتار بولساق, ءبىزدىڭ «Soyle.kz» پورتالى نەگىزىندەگى مول تاجىريبەمىز بار. بۇل قازاق ءتىلىن ينتەرنەت ارقىلى ونلاين رەجيمدە ۇيرەتەتىن قازاقستانداعى العاشقى تەگىن جوبا. ول ۇلكەن زەرتتەۋ مەن تالداۋدىڭ, وسى سالاداعى باسقا دا ەلدەردىڭ تاجىريبەسىنە ءۇڭىلۋدىڭ ناتيجەسىندە جۇزەگە استى. سونىمەن قاتار, شەتەلدىك قانداستاردىڭ دا سۇرانىستارىن بارىنشا ەسكەرۋگە تىرىسىپ جاتىرمىز. ماسەلەن, ولاردىڭ ىڭعايلىلىعى ءۇشىن ءبىز پورتالدىڭ اعىلشىن-لاتىن نۇسقاسىن دا جاساپ شىعاردىق. ەندى قازاق ءتىلىن لاتىن الىپبيىمەن ۇيرەنۋگە بولادى» دەدى ول.
سونىمەن قاتار, كەلىسىم اياسىندا ءتىل ساياساتى جونىندەگى ءىس-شارالاردى بىرلەسىپ ۇيىمداستىرۋ, ەلەكتروندىق اقپاراتتىق كەڭىستىكتە مەملەكەتتىك ءتىلدى دامىتۋعا ىقپال ەتەتىن وتاندىق سايتتار جۇمىسىنا جاردەمدەسۋ جانە شەتەلدەگى وتانداستارعا ارنالعان قازاق ءتىلى بويىنشا وقۋ قۇرالىن ازىرلەۋ كوزدەلگەن.