اقمولا وبلىسىنىڭ تسەلينوگراد اۋدانىندا اۋداندىق سوت عيماراتى الدىندا قازاق حالقىنىڭ توبە بيلەرىنە ارنالعان ء«ۇش بي» ەستەلىك ەسكەرتكىشىنىڭ جانە اقمول اۋىلىندا «جەتى جارعى» كوشەسىنىڭ سالتاناتتى اشىلۋ ءراسىمى ءوتتى.
اشىلۋ سالتاناتىنا اۋدان تۇرعىندارى, سوت جۇيەسىنىڭ, اكىمدىكتىڭ, اۋداندىق ماسليحاتتىڭ وكىلدەرى, قۇقىق قورعاۋ ورگاندارىنىڭ, پروكۋراتۋرا, جەرگىلىكتى مەملەكەتتىك ورگانداردىڭ, بيزنەس قۇرىلىمدارىنىڭ باسشىلارى, ەڭبەك جانە سوت جۇيەسىنىڭ ارداگەرلەرى قاتىستى. اتالعان ءىس-شارا اۋدان جانە وبلىس ءۇشىن ماڭىزدى وقيعا بولدى.
سالتاناتتى ءىس-شارادا اقمولا وبلىستىق سوتىنىڭ توراعاسى دوسجان ءامىروۆ, قازاقستان رەسپۋبليكاسى جوعارعى سوتى جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ اقپاراتتىق قامتاماسىز ەتۋ ءبولىمى مەڭگەرۋشىسىنىڭ ورىنباسارى نۇرگۇل قاراعويشينا, «تسەلينوگرادسكوە» كرەديتتىك سەرىكتەستىگى» جشس-ءنىڭ باسقارما توراعاسى, قوعامدىق كەڭەس توراعاسى ساعدات اشەبەكوۆ, اۋدان اكىمىنىڭ ورىنباسارى الما ايتقوجينوۆا جانە تسەلينوگراد اۋداندىق سوتىنىڭ توراعاسى تولەگەن تۇرعامباەۆ قۇتتىقتاۋ سوزدەرىمەن ءسوز سويلەدى.
اقمولا وبلىستىق سوتىنىڭ توراعاسى دوسجان ءامىروۆ ءوز سوزىندە ءۇش ءجۇزدىڭ باس بيلەرى ەل تۇتاستىعىنا, حالىقتىڭ بىرلىگىنە ايرىقشا ىقپال ەتكەندىگىن اتاپ ءوتتى.
–تولە, قازىبەك جانە ايتەكە بيلەرىنە ارنالعان ەستەلىك ەسكەرتكىشتەرى وسى ەلدى مەكەنگە كەلەتىن جۇرتشىلىقتىڭ كوزىن قۋانتاتىن, سۇيىكتى ورىنعا اينالادى. قازاق حالقىنىڭ بىرىگۋىنە جانە مەملەكەتتىڭ تۇتاستىعىن ساقتاۋعا كوپ ەڭبەك ەتكەن قايراتكەرلەردى وسكەلەڭ ۇرپاق بىلەتىن بولادى. ء«ۇش بي» ەسكەرتكىشى دانالىقتى جانە تۇراقتىلىقتى بەينەلەپ, ماقتانىش, كۇش پەن ەرلىكتى سونداي-اق, بىرلىكپەن مىقتى مەملەكەتتى جانە ءادىل قوعامدى ايشىقتاپ تۇرادى,– دەدى دوسجان ءامىروۆ.
اۋدانداعى ەكىنشى ماڭىزدى وقيعا – ول «جەتى جارعى» كوشەسىنىڭ اشىلۋى. اقمول اۋىلىنداعى «جەتى جارعى» كوشەسى 15-19 عاسىرلارداعى حاندىق داۋىردەگى قازاق قۇقىعىنىڭ تاريحىندا بولعان «جەتى جارعى» زاڭنامالىق ەسكەرتكىشىنىڭ اتىمەن قويىلعان. اتالعان زاڭ تاۋكە حان تۇسىندا جەتى بولىمنەن قۇرىلىپ, مەملەكەتتە قۇقىقتىق قاتىناستى رەتتەگەن ءبىرىنشى اتا زاڭ بولىپ تابىلادى.
وبلىستىق سوتتىڭ توراعاسى, سۋديالار قاۋىمداستىعى مەن جەرگىلىكتى اتقارۋشى ورگانداردىڭ قازاق حالقىنىڭ بيلەرىنىڭ ەسىمدەرىمەن اۋىل جانە كوشە اتاۋلارىن وزگەرتۋ بويىنشا تالپىنىستارىن اتاپ ءوتتى. بۇگىنگى تاڭدا وبلىسىمىزدا 13 كوشە جانە 1 كەنتكە بيلەردىڭ ەسىمدەرى بەرىلىپ, وسى ارقىلى قازاق حالقىنىڭ تاريحى جاڭعىرتىلدى. اتالعان جۇمىس قازاقستان رەسپۋبليكاسى جوعارعى سوتىنىڭ باسشىلىعىمەن ەلباسىنىڭ «بولاشاققا باعدار: رۋحاني جاڭعىرۋ» جانە « ۇلى دالانىڭ جەتى قىرى» اتتى باعدارلامالىق ماقالالارىنىڭ نەگىزگى قاعيدالارىن ىسكە اسىرۋ ماقساتىندا جۇرگىزىلۋدە.
قازاقستان رەسپۋبليكاسى جوعارعى سوتى جانىنداعى سوتتاردىڭ قىزمەتىن قامتاماسىز ەتۋ بويىنشا دەپارتامەنتىنىڭ وكىلى نۇرگۇل قاراعويشينا ءىس-شاراعا قاتىسۋشىلارعا قازاقستان رەسپۋبليكاسى جوعارعى سوتىنىڭ توراعاسى جاقىپ اسانوۆتىڭ قۇتتىقتاۋىن جەتكىزدى. ن.قاراعويشينا «رۋحاني جاڭعىرۋ» باعدارلاماسىن ىسكە اسىرۋ اياسىندا ءۇش بيگە ارنالعان ەسكەرتكىشتىڭ اشىلۋى مەن «جەتى جارعى» كوشەسىنىڭ قايتا اتالۋىنىڭ ماڭىزدىلىعىنا توقتالدى.
بايقال ءبايادىل,
«Egemen Qazaqstan»
اقمولا وبلىسى,
تسەلينوگراد اۋدانى.