«تسيفرلى قازاقستان» مەملەكەتتىك باعدارلاماسىن ىسكە اسىرۋ ماقساتىندا تۇركىستان وبلىسى تۇلكىباس اۋدانىندا اۋقىمدى جۇمىستار اتقارىلۋدا. ماسەلەن, اۋدان اكىمدىگىنىڭ جانىنان زامان تالابىنا ساي مەملەكەتتىك قىزمەتتىڭ 95 ءتۇرى بويىنشا ءبىر تەرەزە قاعيداسى ارقىلى قىزمەت كورسەتەتىن «حالىقتىق كەڭسە» جۇمىس ىستەۋدە.
كەڭسەدە اكىمدىكتىڭ ماماندارى تۇرعىندارعا كەڭەس بەرىپ, قاجەتتى قۇجاتتارىن راسىمدەۋگە ادىستەمەلىك كومەك كورسەتەدى. ال قوعامدىق قاۋىپسىزدىكتى ساقتاۋ ماقساتىندا اۋداندا 33 فوتو-بەينەجازبا قۇرىلعىلارى ورناتىلعان. سونىمەن قاتار, 14 اۋىلدىق وكرۋگتەگى ەلدى مەكەندەردە سانيتارلىق-تازالىق جۇمىستارىنا ابونەنتىك تولەماقىنى «24 كاسسا» تەرمينال جۇيەسى ارقىلى تولەۋ مۇمكىندىگى جاسالعان. تەرمينالدار حالىق كوپ شوعىرلاناتىن جەرلەرگە ورنالاستىرىلعان. اۋداندىق اۋرۋحانادا ناۋقاستاردىڭ كەزەكتە تۇرۋىن رەتتەۋ ماقساتىندا ەمحاناعا POST-تەرمينال ورناتىلىپ, دالىزدەرىنە قوسىمشا 3 مونيتور قويىلدى. ال, ەلەكتر قۋاتىن ءتيىمدى پايدالانۋ جانە ۇنەمدەۋ ماقساتىندا, سوڭعى تەحنولوگيالارعا سۇيەنە وتىرىپ, اۋدان اۋماعىنداعى «تۇنعىش پرەزيدەنت» ساياباعى, «تۇركىباسى اۋليە», «بالالار» الاڭشالارىنا جالپى سانى 34 كۇن كوزىنەن قۋات الاتىن اقىلدى شامدار ورناتىلدى.
«تسيفرلى قازاقتان» باعدارلاماسى اياسىندا اۋدان مەكتەپتەرىن «Wi-Fi» جەلىسىمەن قامتۋ ماقساتىندا جەرگىلىكتى بيۋدجەتتەن قارجى قارالىپ, ماكسيمالدى جىلدامدىقتاعى 50 دانا «Wi-fi روۋتەرلەرمەن» اۋداندىق ءبىلىم وشاقتارى جابدىقتالدى. سونداي-اق مايلىكەنت اۋىلدىق وكرۋگىندە ورنالاسقان «تۇلكىباس اۆتوبۋس پاركى» جشس-دا اۋدانىشىلىك باعىتتارعا قاتىنايتىن 18 شاعىن اۆتوكولىكتىڭ 12-سىنە GPS قۇرىلعىلارى ورناتىلعان. مۇمكىندىگى شەكتەۋلى جاندارعا ورتالىق كوشەدەن وتۋگە ىڭعايلى بولۋ ءۇشىن ت.رىسقۇلوۆ اۋىلى, ت.رىسقۇلوۆ كوشەسى بويىنا دىبىستى باعدارشامدار ورناتىلدى. بۇل باعىتتاعى جۇمىستار جالعاسىن تابۋدا.
عالىمجان ەلشىباي,
«Egemen Qazaqstan»
تۇركىستان وبلىسى