بۇل تۋرالى بۇگىن ۇكىمەت وتىرىسىندا ەنەرگەتيكا ءمينيسترى قانات بوزىمباەۆ ايتتى.
«ەلباسىنىڭ «نۇر وتان» پارتياسىنىڭ سەزىندە ايتقان تاپسىرماسىن ورىنداۋ ماقساتىندا, مينيسترلىك تاراپىنان وڭىرلەردەگى بىرقاتار جوبالاردىڭ قۇرىلىسىن جانداندىرۋعا ۇسىنىستار ازىرلەندى. وسى ورايدا, ءبىزدىڭ ۇسىنىستارىمىز بويىنشا 2019-2025 جىلدارعا قوسىمشا 187 ملرد تەڭگە تالاپ ەتىلەدى. سونىڭ ىشىندە, 2019-2021 جىلدارعا 55 ملرد تەڭگە قارالۋى ءتيىس», دەدى ق.بوزىمباەۆ.
ءمينيستردىڭ ايتۋىنشا, 4 گاز تاراتۋ جەلىسىن سالۋ ءۇشىن 84,7 ملرد تەڭگە ءبولۋ ۇسىنىلادى. ونىڭ ىشىندە استانانىڭ گاز ينفراقۇرىلىمىن سالۋعا 44,4 ملرد باعىتتالىپ, جوبا ناتيجەسىندە 370 مىڭ ادام گازبەن قامتىلادى.
«سونىمەن قاتار, بىرنەشە گاز جەلىسىنىڭ قۇرىلىسىن قولداۋدى سۇرايمىز. اتاپ ايتساق, قاراعاندى وبلىسىندا, ياعني قاراعاندى, تەمىرتاۋ, جەزقازعان جانە قوسىمشا 5 ەلدىمەكەنگە 28,7 ملرد تەڭگە قاجەت. بۇل جوبا 270 مىڭ ادامدى قامتيدى. ال, اقمولا وبلىسىندا 10 ملرد تەڭگەگە 100 مىڭ ادام كوگىلدىر وتىنعا قول جەتكىزەدى. «سارىارقا» ماگيسترالدى گاز قۇبىرىن سالۋ بارىسىندا اتالعان جوبالاردى دا ىسكە اسىرۋ وتە ماڭىزدى. جالپى, گازبەن قامتۋ جوبالارىن ىسكە اسىرۋ ناتيجەسىندە ەلىمىزدىڭ شامامەن 740 مىڭ تۇرعىنى گازبەن قامتىلاتىن بولادى», دەدى مينيستر.