ورالدا تۇرعىن ءۇي پايدالانۋعا بەرىلدى

ورال قالاسىندا اپاتتى ءۇي تۇرعىندارىن جاڭا باسپانامەن قامتاماسىز ەتۋدىڭ تىڭ ءتاسىلى تابىلعانىن بۇدان بۇرىن دا جازعان بولاتىنبىز. اپاتتى ۇيلەردى اۋىستىرۋدىڭ ورالدىق تاجىريبەسى بۇگىندە ەلىمىزدىڭ بارلىق وڭىرىنە تاراتىلىپ جاتىر. مەملەكەت-جەكەشەلىك ارىپتەستىگى باعدارلاماسى اياسىندا قالانىڭ قاق ورتاسىندا, كوممۋنيكاتسيا جەلىلەرىن تارتۋعا شىعىن كەتپەيتىن ىڭعايلى جەردە تۇرعان اپاتتى ءۇيدى جەكەمەنشىك قۇرىلىس كومپانيالارىنا بەرۋدىڭ تيىمدىلىگى قازىردىڭ وزىندە انىق كورىندى. ءۇي تۇرعىندارى ۋاقىتشا, قۇرىلىس اياقتالعانشا باسقا جەردە تۇرا تۇرادى, ولاردىڭ باسپانا جالداۋ شىعىنىن جەرگىلىكتى اتقارۋشى ورگاندار نەمەسە قۇرىلىس كومپانياسىنىڭ ءوزى كوتەرەدى.

جاڭا ءۇي سالىنىپ بىتكەن سوڭ تۇرعىندار بۇرىنعى پاتەر كولەمىنە ساي باسپاناعا تەگىن يە بولادى. قالعان پاتەرلەردى كومپانيا ءوزى ساتادى. ەكى جاققا دا ءتيىمدى دەگەن وسى ەمەس پە؟! مىنە, سوڭعى ءتورت جىل ىشىندە ورالدا وسىنداي 11 اپاتتى ءۇي قيراتىلعان ەكەن. 113 پاتەردىڭ تۇرعىندارى باسقا جەرگە كوشىرىلىپ, كونە ءۇي ورىندارىندا قۇرىلىس قايناپ جاتىر. بۇعان دەيىن ءۇش ءۇيدىڭ قۇرىلىسى اياقتالسا, بۇگىن ءتورتىنشى ءۇي يەلەرىن تاپتى.

ياعني, مەملەكەتتىك-جەكەمەنشىك ارىپتەستىك باعدارلاماسى اياسىندا سالىنعان كوپ پاتەرلى ءۇيدىڭ 8 پاتەرى بۇرىن وسى جەردە بولعان كونە ءۇي تۇرعىندارىنا بەرىلسە, قالعانى «7-20-25» باعدارلاماسىنا قاتىسۋشىلارعا جانە «تۇرعىنۇيقۇرىسجيناقبانكى» سالىمشىلارىنا تابىستالدى.

- جىل سايىن مەملەكەت قولداۋىمەن باتىس قازاقستان وبلىسىندا مىڭداعان پاتەر مۇقتاج ازاماتتارعا بەرىلىپ جاتىر. وڭىرىمىزدە اپاتتى جانە توزىعى جەتكەن تۇرعىن ءۇي ماسەلەسىن شەشۋ ءۇشىن اۋقىمدى شارالار اتقارىلۋدا. بۇل جەردە وتكەن عاسىردا سالىنعان, توزىعى جەتكەن, اپاتتى ۇيلەر بولسا, بۇگىن زامان تالابىنا ساي جاڭا كوپ قاباتتى ءۇيدى پايدالانۋعا بەرگەلى تۇرمىز. قالامىزدا توزىعى جەتكەن 200-دەي كونە ءۇي تىركەلسە, سونىڭ 41-ءى رەسمي تۇردە اپاتتى دەپ تانىلعان بولاتىن. بۇل ماسەلەنى جويىپ, تۇرعىنداردى قاۋىپسىز دە جايلى باسپانامەن قامتۋ باعىتىنداعى جۇمىستار الداعى ۋاقىتتا دا جالعاسا بەرەدى, - دەدى وسى شاراعا ارنايى قاتىسقان ءوڭىر باسشىسى التاي كولگىنوۆ.

بۇگىنگى تابىس ەتىلگەن ءۇيدىڭ قۇرىلىسىن «كاز حولل» جشس جەكە ينۆەستيتسيالار ەسەبىنەن جۇرگىزگەنى.

ايتا كەتەيىك, وسىدان ءۇش جىل بۇرىن قالاداعى اپاتتى ۇيلەردىڭ سانى 52 بولعان ەدى. سوڭعى ەكى جىلدا قوس ءۇيدىڭ قۇرىلىسى اياقتالىپ, 58 وتباسى جاڭا پاتەرگە يە بولدى.

قازبەك قۇتتىمۇرات ۇلى,

«Egemen Qazaqstan»

باتىس قازاقستان