بەيسەنبى, 26 ءساۋىر 2012 7:25
«جەتىسۋ جاستارى» ورتالىعى جاقىندا «بولاشاق بۇگىننەن باستالادى» اتتى رەسپۋبليكالىق اكتسيا اياسىندا قىز-جىگىتتەردى ورتالىق الاڭعا جينادى. كەزدەسۋ مەرەكەدەگىدەي ءوتتى. الاڭعا جينالعان جاستاردى قالا باسشىلىعى مەن قوعامدىق بىرلەستىك, جاستار ۇيىمدارىنىڭ كوشباسشىلارى جانە ارداگەرلەر قارسى الدى. «جەتىسۋ جاستارى» ورتالىعىنىڭ ديرەكتورى ر.الپىسباەۆ اتا-بابا اماناتتاعان ەلىمىزدىڭ تىنىشتىعىن ساقتاۋعا, وركەندەتۋگە ايانباي كۇش-قايرات تانىتۋعا مىندەتتىمىز, دەدى.
بەيسەنبى, 26 ءساۋىر 2012 7:25
«جەتىسۋ جاستارى» ورتالىعى جاقىندا «بولاشاق بۇگىننەن باستالادى» اتتى رەسپۋبليكالىق اكتسيا اياسىندا قىز-جىگىتتەردى ورتالىق الاڭعا جينادى. كەزدەسۋ مەرەكەدەگىدەي ءوتتى. الاڭعا جينالعان جاستاردى قالا باسشىلىعى مەن قوعامدىق بىرلەستىك, جاستار ۇيىمدارىنىڭ كوشباسشىلارى جانە ارداگەرلەر قارسى الدى. «جەتىسۋ جاستارى» ورتالىعىنىڭ ديرەكتورى ر.الپىسباەۆ اتا-بابا اماناتتاعان ەلىمىزدىڭ تىنىشتىعىن ساقتاۋعا, وركەندەتۋگە ايانباي كۇش-قايرات تانىتۋعا مىندەتتىمىز, دەدى.
ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىندە كوپتەگەن ۇلتتىڭ باسىن قوساتىن ستۋدەنتتەر وقىپ, ءبىلىم الۋدا. ولار دا اتالعان اكتسيا اياسىندا تۋعان جەردىڭ تۇرلەنىپ, قالانىڭ كوركەيۋىنە ءوز ۇلەستەرىن قوسۋعا جۇمىلعان. ءتىلى باسقا, تىلەگى ءبىر ستۋدەنتتەردىڭ ءوز حالقىنا دەگەن جۇرەكجاردى لەبىزدەرى دە ارناسىنان اسىپ توگىلدى. ءماسەلەن, مادەنيەت جانە ونەر فاكۋلتەتىنىڭ 1-كۋرس ستۋدەنتى انگەلينا كاراپەتيانتس ءوز پىكىرىن بىلاي ءبىلدىردى:
– «تۋعان اناڭداي اق ءسۇتىن بەرىپ, ماپەلەپ وسىرگەن وتاندى ءسۇيۋ – قاسيەتتى بورىشىمىز» دەگەن ۇلىلاردان قالعان تاماشا ءسوز بار ەكەن. ال, قازاقپەن تۋعانىنداي بىتە قايناسىپ, جۇمىلعان جۇدىرىقتاي جۇمىس جاساپ, ۇرپاعىن ءوسىرىپ جاتقان قانشاما ۇلت وكىلدەرى قازاقستاندا تاتۋ-ءتاتتى ءومىر كەشۋدە. قاي ەلدە ءومىر سۇرمەسىن ونىڭ ءتىلىن, تاريحىن, مادەنيەتىن قۇرمەتتەۋ – كىمگە بولسا دا پارىز. وسى ورايدا مەنىڭ ۇلتىم ورىس بولسا دا, قازاقستاندى تۋعان وتانىم, ال قازاق ءتىلىن ءبىلۋدى وتان الدىنداعى پارىزىم دەپ بىلەمىن, – دەدى ول.
اڭگىمەگە ارالاسقان گۋمانيتارلىق فاكۋلتەتتىڭ 4-كۋرس ستۋدەنتى زارا سىدىقوۆا دا تەبىرەنە سويلەدى. «مەن قازاق ءتىلىن بىلگەنىمدى ماقتان تۇتامىن, – دەدى ول. – مەنىڭ ۇيعىر دوستارىممەن بىرگە, قازاق دوستارىم دا وتە كوپ. اتالعان ۋنيۆەرسيتەتتە 10-نان استام وزگە ۇلت وكىلدەرى جوعارى ءبىلىم الىپ جاتىر. ءبىز بارلىق شارالارعا قاتىسىپ, بىرلىكتى, ىنتىماقتى, دوستىقتى دارىپتەيمىز. قازىرگى تاڭدا مەملەكەتتىك ءتىلدىڭ مارتەبەسىن كوتەرۋ, قولدانۋ اياسىن كەڭەيتۋ كەرەكتىگىن اعا بۋىن وكىلدەرى ءجيى كوتەرىپ جاتادى. ال مەن بۇعان قازاق ءتىلىن ءبىلۋ ارقىلى, سول تىلدە سويلەۋ ارقىلى ۇلەسىمدى قوسىپ جاتىرمىن دەسەم ارتىق ايتپاعانىم. «حالقىن سۇيگەن – سالتىن دا سۇيەر» دەگەندەي, قازاق حالقىن قانشالىقتى قۇرمەتتەسەك, تىلىنە دە سونشالىقتى قۇرمەتپەن قاراۋىمىز كەرەك. ەندەشە, بىزدەر – وزگە ۇلت وكىلدەرى قازاق ءتىلىن, سالتىن قۇرمەتتەپ, ۇلتتىق بايلىقتى ساقتاۋعا اتسالىسساق, ودان ۇتپاساق, ۇتىلمايمىز».
ءيا, جاستار – قاشاندا جاقسى ىستەردىڭ جارشىسى. ولاردىڭ بۇگىنگى بەلسەندىلىگى جوعارى سەنىم بىلدىرۋگە ابدەن لايىق.
كۇمىسجان بايجان.
الماتى وبلىسى.