بۇگىن شاحماتتان قازاقستان ايەلدەر قۇراماسىنىڭ جاڭا باس باپكەرى تاعايىندالدى. وسى سپورت ءتۇرىنىڭ تىزگىنىن ۇستاعان وتاندىق ماماندار بۇل قىزمەتكە ارمان پاشيكياندى لايىق دەپ تاپتى.
31 جاستاعى ارمەنيالىق گروسسمەيستەر 2005 جىلى بليتستەن جاسوسپىرىمدەر اراسىندا ەۋروپا چەمپيونى اتاندى. 2008 جىلى گيۋمري مەن مارتۋنيدە وتكەن حالاقارالىق تۋرنيرلەردە توپ جاردى. ءوز ەلىنىڭ ىشكى بىرىنشىلىگىندە ءبىر مارتە چەمپيوندىق اتاققا قول جەتكىزىپ, ءبىر رەت جۇلدەگەرلەر قاتارىنان كورىندى. باپكەرلىك قىزمەتتە دە ول ءوزىن جاقسى قىرىنان كورسەتتى. 2012 جىلى ارمان پاشيكيان جەتەكشىلىك ەتكەن ارمەنيانىڭ ەرلەر قۇراماسى ىستامبۇلدا وتكەن شاحماتشىلاردىڭ دۇنيەجۇزىلىك وليمپياداسىندا باس جۇلدەنى ولجالادى.
پاشيكياننىڭ ەڭ ۇزدىك شاكىرتتەرىنىڭ ءبىرى - لەۆون ارونيان ەكەنىن جانكۇيەرلەر جاقسى بىلەدى. ارونيان – الەم كۋبوگىنىڭ ەكى دۇركىن جانە دۇنيەجۇزىلىك وليمپياداسىنىڭ ءۇش دۇركىن جەڭىمپازى جانە باسقا دا كوپتەگەن اسا ءىرى حالىقارالىق دودالاردىڭ جەڭىمپازى.
ال ەلىمىزدىڭ تانىمال شاحماتشىلارىنىڭ ءبىرى – 45 جاستاعى پاۆەل كوتسۋر قازاقستاننىڭ ەرلەر قۇراماسىن جاتتىقتىرسا, 32 جاستاعى ءانۋار يسماعامبەتوۆ بالالار مەن جاسوسپىرىمدەر كومانداسىن باپتايدى.
عالىم سۇلەيمەن,
«Egemen Qazaqstan»