«نۇرجول» جەلەكجولىندا, ەسكى ۆوكزالدا, اۋەجايدا كولىك تۇراعى ۋاقىتشا تەگىن بولادى. بۇل تۋرالى استانا قالاسى اكىمدىگىنىڭ رەسمي سايتى حابارلادى.
«استانانىڭ كولىك تۇراعى كەڭىستىگى» جشس-نەن مالىمدەگەندەي, «نۇرجول» جەلەكجولىنداعى كولىك تۇراعىن پايدالانۋ ۋاقىتشا تەگىن بولادى.
«قۇرمەتتى استانا تۇرعىندارى مەن قوناقتارى, سىزدەرگە قازىرگى اۋا رايىنىڭ قولايسىز كەزەڭىندە, ياعني وسى جىلدىڭ 6-7 اقپانىندا «نۇرجول» جەلەكجولىنداعى كولىك تۇراعىن پايدالانعانىڭىز ءۇشىن اقى تولەمەيتىنىڭىزدى حابارلايمىز», – دەلىنگەن كومپانيانىڭ حابارلاماسىندا.
وعان دەيىن, Smart Astana قوسىمشاسىندا ەسكى تەمىرجول ۆوكزالى مەن اۋەجايدا دا اۆتو تۇراقتى پايدالانۋ تەگىن ەكەندىگى حابارلانعان بولاتىن.
«اۋا رايىنىڭ قولايسىزدىعىنا بايلانىستى ەسكى تەمىرجول ۆوكزالى مەن اۋەجاي ماڭىنداعى كولىك تۇراقتارى تەگىن جۇمىس ىستەيدى, ياعني شلاگباۋم كوتەرىلىپ تۇرادى. كىرۋ جانە شىعۋ تەگىن», – دەلىنگەن تاراتىلعان حابارلامادا.