مەتالل-پلاستيك بۇيىمدارىن شىعاراتىن كاسىپورىن وتكەن جىلى 1,5 ميلليارد تەڭگەنىڭ ءونىمىن ءوندىردى.
قازىر مۇندا 200-دەن استام ادام ەڭبەك ەتەدى. تسەحتار جاڭارتىلىپ, زاماناۋي قۇرىلعىلار ورناتىلعاننان كەيىن ءوندىرىس كولەمى ەكى ەسەگە, ءونىم تۇرلەرى 30 پروتسەنتكە ۇلعايىپ, قوسىمشا 50 جۇمىس ورنى اشىلدى. بيىل وڭىرلىك يندۋستريالاندىرۋ كارتاسى شەڭبەرىندە 894 ميلليون تەڭگەنىڭ جوباسى جۇزەگە اسىرىلادى.
«پلاستيك بۇيىمدار شىعارۋمەن 2002 جىلدان بەرى اينالىسىپ كەلەمىز. حالىق تۇتىناتىن تاۋارلار جانە تۇرعىن ءۇي-كوممۋنالدىق شارۋاشىلىعىنا قاجەتتى قۇبىرلار مەن مەتالل ونىمدەرىن وندىرەتىن كەشەن ىسكە قوسىلىپ, ءوندىرىس ورىندارى تۇگەلگە جۋىق اۆتوماتتاندىرىلدى. «بيزنەستىڭ جول كارتاسى–2020» باعدارلاماسى شەڭبەرىندە تسەحتار وزىق تەحنولوگيالارمەن جابدىقتالدى» دەيدى مەتالل-پلاستيك زاۋىتىنىڭ ديرەكتورى ەۆگەني لي.
مۇندا شىعارىلاتىن ءونىم تۇرلەرى سان الۋان. ساپتىاياق, شەلەك, شارا, ىلگەشەك, كيىم كەپتىرگىش, ۇتىكتەۋگە ارنالعان تاقتالار سەكىلدى تۇرمىستا كەڭ قولدانىلاتىن زاتتاردىڭ كەز كەلگەن ءتۇرى بار. ساپاسى شەتەلدىك بالامالاردان ەش كەم ەمەس. جەرگىلىكتى شيكىزات پايدالانىلاتىندىقتان باعاسى دا قولجەتىمدى.
كاسىپورىن ءوزىنىڭ ديستريبيۋتسيالىق جەلىسى ارقىلى ونىمدەرىن قازاقستاننىڭ بارلىق وڭىرىمەن قاتار رەسەيدىڭ بىرقاتار قالاسىنا جونەلتەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى