اۋا رايىنىڭ ناشارلاۋى تۋرالى دەر كەزىندە حابار العانمەن, كەز كەلگەن ادام قار قۇرساۋىندا قالۋى مۇمكىن.
استاناداعى كەزەكتى قولايسىز اۋا رايىندا جۇرگىزۋشىلەر ادامداردى تەگىن تاسىمالداپ, كاسىپكەرلەر ءوز مەكەمەلەرىندە تۇرعىنداردىڭ جىلىنۋىنا جاعداي جاساۋدا. سونىمەن قاتار, استانا قالاسى تجد كوميتەتى اۋا رايى بولجامدارىن مۇقيات قاراۋعا شاقىرىپ, بىرنەشە ۇسىنىممەن ءبولىستى. ويتكەنى ادەتتە, ءبىزدىڭ ازاماتتارىمىزدىڭ ابايسىزدىعى نەمەسە قاۋىپسىزدىك شارالارى جانە قىسقى جاعدايدا ءوزىن-ءوزى قۇتقارۋ ەرەجەلەرىن بىلمەۋى ماتەريالدىق شىعىندارعا جانە ءتىپتى ادامداردىڭ قازا بولۋىنا اكەپ سوقتىرۋى مۇمكىن.
ءسىز اۆتوكولىكتە كەلە جاتقاندا جەل تۇرىپ نەمەسە بوران سوقسا, توقتاۋ كەرەك, تۇراقتى بەلگىلەپ, جارقىن ءتۇستى ماتانى ءىلۋ كەرەك. ماشينانى جاليۋزيمەن تولىق جاۋىپ, رادياتور جاعىنان قوزعالتقىشتى بۇركەڭىز. ماشينانى جەلگە قاراي كاپوتپەن ورنالاستىرىڭىز. وتىندى ۇنەمدەڭىز, پەشتى ۇزدىكسىز قوسپاڭىز. ىلعال نەمەسە قاردىڭ ءتۇسۋ قاۋپى كەزىندە ەسىكتەردىڭ ءبىرىن ۇنەمى جاۋىپ تۇرىڭىز, سالوننىڭ ىشىندە قامالىپ قالماس ءۇشىن قاردى جىلجىتىپ, تازالاپ تۇرىڭىز. ەگەر ءسىزدىڭ اۆتوكولىگىڭىز جولدا ءسونىپ قالسا, ۇرەيلەنبەڭىز, جاعدايدى, باعدارلاردى, ورنالاسقان جەرىن, ەلدى مەكەنگە دەيىنگى قاشىقتىقتى جانە ت.ب ماڭىزدى بەلگىلەردى جاقسىلاپ قاراپ الىڭىز. جۇرۋگە شەشىم قابىلداعان جاعدايدا تراسسانى, اسفالتتى نازاردا ۇستاڭىز.ەستەرىڭىزگە سالا كەتەيىك, "قازگيدرومەتتىڭ" اقپاراتى بويىنشا, استانا اۋماعىندا 5 اقپاننان باستاپ قار جاۋىپ, بوران سوعادى, سولتۇستىك-شىعىستان سەكۋندىنا 15-20 مەتر جىلدامدىقپەن جەل سوعادى, 6-7 اقپاندا تۇندە 37-39 گرادۋس اياز بولادى. استانا اكىمى قالا تۇرعىندارىن ءبىر-بىرىنە مۇقيات بولۋعا, مۇمكىندىگىنشە قاتتى اياز كەزىندە جاياۋ جۇرگىنشىلەردى تاسىمالداۋعا شاقىردى.