جۇما, 19 قازان 2012 8:05
دەنساۋلىق ساقتاۋ سالاسىن دامىتۋدىڭ 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىندا كولىكتىك مەديتسينانى دامىتۋدىڭ كەشەندى شارالارى بەلگىلەنگەن. بۇل شارالار ءاربىر قازاقستاندىقتىڭ ساپالى مەديتسينالىق كومەككە بارىنشا قولجەتىمدىلىگىن قامتاماسىز ەتۋدى كوزدەيدى. بۇل سالانى قارقىندى دامىتۋ مەملەكەتتىڭ ءوز ازاماتتارىنا دەگەن قامقورلىعىن ايقىن پاش ەتەدى.
بۇگىندە رەسپۋبليكامىزدىڭ كولىكتىك مەديتسيناسىنىڭ قۇرامىندا جىلجىمالى مەديتسينالىق كەشەندەر (جمك), «دەنساۋلىق», «جاردەم» جانە «سالاماتتى قازاقستان» سياقتى ەمدەۋ-دياگنوستيكالىق پويىزدارى, سانيتارلىق اۆياتسيا جانە تراسسالىق مەديتسينالىق-قۇتقارۋ پۋنكتتەرى (تمقپ) جۇمىس ىستەيدى.
اۋىل تۇرعىندارىنا قولجەتىمدى مەديتسينالىق قىزمەت كورسەتۋدى 49 جمك ءىس جۇزىنە اسىرادى. وسى جىلجىمالى مەديتسينالىق كەشەندەر ۇستىمىزدەگى جىلدىڭ 9 ايى ىشىندە 530 مىڭ ادامدى دارىگەرلىك تەكسەرىستەن وتكىزدى. 1 ميلليوننان استام لابوراتوريالىق-دياگنوستيكالىق زەرتتەۋلەر, 460 مىڭ كاسىبي مامانداردىڭ كەڭەستەرى جۇرگىزىلدى.
2012 جىلدىڭ 9 ايى ىشىندە 3 ەمدەۋ-دياگنوستيكالىق پويىزدارى رەسپۋبليكامىزدىڭ بارلىق وبلىستارىنداعى 206 ستانسانىڭ تۇرعىندارىن مەديتسينالىق تەكسەرىستەن وتكىزدى. اتاپ ايتقاندا, 41 194 تۇرعىن, ونىڭ ىشىندە 15 796 بالا جان-جاقتى دارىگەرلىك تەكسەرىستەردەن ءوتتى. 199 711 دياگنوستيكالىق ەم ءراسىمدەرى (ونىڭ ىشىندە 44 815 ۋدز-زەرتتەۋلەر, 13 067 ەەگ, 18 036 ەكگ, 3 524 ەفگدس, 12 207 رەنگەنولوگيالىق زەرتتەۋلەر جانە 94 695 كلينيكالىق-بيوحيميالىق ساراپتامالار) اتقارىلدى.
سانيتارلىق اۆياتسيا بويىنشا رەسپۋبليكالىق ۇيلەستىرۋ ورتالىعى 2012 جىلدىڭ 9 ايى ىشىندە 682 ۇشۋ ساپارلارىن ورىندادى. 906 ادامعا كومەك كورسەتىلدى, ونىڭ ىشىندە 552 سىرقات استانا جانە الماتى قالالارىنداعى رەسپۋبليكالىق كلينيكالارعا, سونىمەن بىرگە, وبلىس ورتالىقتارىنا جەتكىزىلدى. 289 سىرقاتقا رەسپۋبليكالىق جانە وبلىستىق دارەجەدەگى ماماندار كەڭەس بەردى, 66 ادامعا وتا جاسالدى.
2011 جىلدىڭ 20 جەلتوقسانىنان باستاپ الماتى, جامبىل, قاراعاندى جانە وڭتۇستىك قازاقستان وبلىستارىنىڭ تراسسالارىندا بولعان جول-كولىك وقيعالارىنان زارداپ شەككەندەرگە جەدەل مەديتسينالىق قۇتقارۋ كومەكتەرىن كورسەتۋ ماقساتىندا 6 تمقپ جۇمىس ىستەۋدە. 2012 جىلدىڭ 9 ايى ىشىندە تمقپ بريگادالارى 311 رەت جول-كولىك وقيعالارى ورىن العان جەرلەرگە اتتاندى. وسى ساپارلار بارىسىندا جول-كولىك وقيعاسىنان زارداپ شەككەن 666 ازاماتقا, ونىڭ ىشىندە 33 بالاعا جەدەل مەديتسينالىق كومەك كورسەتىلدى. 289 ادام, ونىڭ ىشىندە 26 بالا اۋرۋحانالارعا شۇعىل جەتكىزىلدى.
ماتەريالدى قوعامدىق كەلىسىم جانە الەۋمەتتىك جاڭعىرتۋ سالاسىنداعى ساراپشىلىق كەڭەس ۇسىندى