الماتىدا جەڭىل اتلەتيكالىق سپورت تۇرلەرىنە ارنالعان زاماناۋي سپورت كەشەنى سالىنادى. بۇل تۋرالى مەدەۋ اۋدانى اكىمى ەرجان جىلقىباەۆ حالىقپەن ەسەپتى كەزدەسۋىندە مالىمدەدى.
حالىقارالىق ستاندارتتارعا ساي جاڭا ستاديون «حالىق ارەنا» مۇز كەشەنى ماڭىندا سالىنادى. عيماراتتا ءبىر مەزگىلدە 5000 ادام جاتتىعا الادى. اۋدان اكىمى بيىل اۋدان تەرريتورياسىن اباتتاندىرۋ بويىنشا 12 جوبا جۇزەگە اساتىنىن ايتتى.
«بۇل قوسىمشا 2500 ادامدى جۇمىسپەن قامتۋعا مۇمكىندىك بەرەدى. اتاپ ايتساق, «دۋمان-2» شاعىن اۋدانىنداعى, «مەڭدىقۇلوۆ», «شۋحوۆ» سكۆەرلەرى, ورتالىق مەشىتتىڭ اينالاسى, جۋرناليستەر سكۆەرىنىڭ, مەملەكەتتىك مۋزەي الدىنداعى الاڭ مەن «28 پانفيلوۆشىلار» ساياباعىنىڭ ماڭايى اباتتاندىرىلادى. Coنىمەن قاتار, 10 كوشەدە ورتاشا جوندەۋ جۇمىستارى جۇرگىزىلمەك. ال 19 كوشەدە جارىقتاندىرۋ جاسالادى. 4 شاقىرىم ارىق جەلىسى جوندەلەدى. دوستىق, ايتەكە بي, تولە بي كوشەلەرى قايتا جاساۋدان وتەدى. سونىمەن قاتار, حالىق ارەنا عيماراتىنىڭ قاسىنان جەڭىل اتلەتيكامەن اينالىساتىندارعا 5000 ورىندىق جابىق ستاديون جاسالادى. اۋداندا 20 جەكەمەنشىك بالاباقشا اشىلادى. دۋمان شاعىن اۋدانىنداعى ءۇش اۋىسىمدىق مەكتەپتە ورىن تاپشىلىعىن شەشۋ ءۇشىن 850 بالاعا ارنالعان قوسىمشا عيمارات سالىنادى», - دەدى ەرجان جىلقىباەۆ.
ونىڭ ايتۋىنشا, ءۇش جىلدا 400 اۋلا اباتتاندىرىلعان. 2020 جىلعا دەيىنگى دامۋ باعدارلاماسىنا سايكەس 47 ۇيدە جوندەۋ جۇمىستارى اياقتالادى. 2018 جىلى قالادا ينجەنەرلىك كوممۋنيكاتسيالىق جەلىلەردى جۇرگىزۋ بويىنشا اۋقىمدى جۇمىس اتقارىلعان. گورنايا, ايتەكە بي, جامبىل كوشەلەرىنىڭ بويىمەن 2,5 شاقىرىمدىق سۋ جانە جىلۋ جەلىسى جاسالدى.
سونداي-اق «بيزنەستىڭ الەۋمەتتىك جاۋاپكەرشىلىگى» باعدارلاماسى اياسىندا الماتىدا ورتالىق پارك جوندەلدى. وعان 1,6 ملرد تەڭگە جۇمسالدى.