«رۋحاني جاڭعىرۋ» باعدارلاماسىن جۇزەگە اسىرۋ اياسىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ باستاماسىمەن « ۇلى دالا قۇپياسى» اتتى اتتى ادەبي-تاريحي تانىمدىق ەكسپەديتسيا جاساقتالادى. بۇل تۋرالى ۋنيۆەرسيتەتتىڭ ءباسپاسوز قىزمەتى حابارلادى.
ونىڭ ايتۋىنشا, ەكسپەديتسيا قۇرامىنا وقۋ ورنىنىڭ شىعارماشىلىق الەۋەتى جوعارى ۇلتجاندى ستۋدەنتتەرى, ماگيسترانتتارى مەن دوكتورانتتارى مۇشە بولا الادى.
– جوبا قوعامدىق سانانى جاڭعىرتۋعا باعىتتالعان «بولاشاققا باعدار: رۋحاني جاڭعىرۋ» باعدارلاماسى اياسىندا جۇرگىزىلەدى. باستى كوزدەگەن ماقساتىمىز –حالقىمىزدىڭ سان عاسىرلار بويى قالىپتاسقان تاريحي ساناسىن دامىتۋ ارقىلى ۇلتتىق تۇتاستىقتى ساقتاۋ, قازاقستاننىڭ كيەلى جەرلەرىنىڭ مادەني-گەوگرافيالىق اۋماعىن زەرتتەۋ ورايىندا زاماناۋي قازاقستاندىق مادەنيەتتى ناسيحاتتاۋ, – دەيدى ۋنيۆەرسيتەتتىڭ ءباسپاسوز قىزمەتىنىڭ جەتەكشىسى جاندار اسان.
قىزدار ۋنيۆەرسيتەتىنىڭ «رۋحاني جاڭعىرۋ» جوبالىق كەڭسەسىنىڭ جەتەكشىسى, فيلولوگيا عىلىمدارىنىڭ دوكتورى, پروفەسسور تىنىشتىق ەرمەكوۆانىڭ سوزىنە سۇيەنەر بولساق, ەكسپەديتسيا قاتىسۋشىلارى ەلىمىزدەگى تاريحي-مادەني كيەلى جەرلەرگە قاتىستى عىلىمي جوبا جۇرگىزىپ, اتالعان ورىندار تۋرالى اڭىزدار, تىڭ تاريحي مالىمەتتەر جيناماق. سونىمەن قاتار ەكسپەديتسيا مۇشەلەرى ساكرالدى جەرلەردىڭ ينفراسترۋكتۋراسى تۋرالى مالىمەتتەر دەرەكقورىن جيناپ, ونى جاقسارتۋ جونىندە ناقتى ۇسىنىستار دايىندايدى.
« ۇلى دالا قۇپياسى» اتتى ەكسپەديتسيالىق كونكۋرس ەكى كەزەڭ بويىنشا جۇرگىزىلەدى. العاشقى كەزەڭدە ۋنيۆەرسيتەت بىلىمگەرلەرىنىڭ ۇزدىك جوبالارى ىرىكتەلىنىپ, كەلەسى كەزەڭدە جوبادا كورسەتىلگەن تاريحي ورىندارعا ەكسپەديتسياعا شىعۋ جوسپارلانعان.
كونكۋرسقا ۇسىنىلعان جۇمىستاردا زەرتتەۋ نىسانى بولىپ الىنعان ولكە بويىنشا تىڭ مالىمەتتەر بەرىلىپ, ۇلى دالانىڭ جاڭا قىرلارى كەڭىنەن اشىلۋى ءتيىس. سونداي-اق جوبانىڭ دەرەكتىلىگى مەن فاكتوگرافيالىق ماڭىزدىلىعى, تاريحي سانانى جاڭعىرتۋداعى ماتەريالدىڭ اكتۋالدىعى جانە جۇمىستاعى ءتىلدىڭ تياناقتىلىعى مەن ويدىڭ ۇشقىرلىعى دا نازارعا الىنادى.
ەكسپەديتسيا تۋرالى تولىق مالىمەتتى قىزدار ۋنيۆەرسيتەتىنىڭ «رۋحاني جاڭعىرۋ» جوبالىق كەڭسەسىنەن الۋعا بولادى.
ايناش ەسالي,
«Egemen Qazaqstan»
الماتى